54ویں کامن ٹریننگ پروگرام دے زیرِ تربیت افسراں دا وزارتِ اطلاعات دے ڈیجیٹل کمیونیکیشن ڈیپارٹمنٹ دا دورہ، سرکاری افسراں دی پیشہ ورانہ صلاحیتاں تے موثر عوامی خدمت کیتے کامن ٹریننگ پروگرام اہم کردار ادا کریندا پئے: عطاء اللہ تارڑ

اسلام آباد۔23اگست (اے پی پی) 54ویں کامن ٹریننگ پروگرام (سی ٹی پی) دے 217 زیرِ تربیت افسراں وزارتِ اطلاعات تے نشریات دے ڈیجیٹل کمیونیکیشن ڈیپارٹمنٹ دا دورہ کیتا اتے وفاقی وزیرِ اطلاعات تے نشریات عطاء اللہ تارڑ نال ملاقات کیتی۔ وفد اچ وفاقی حکومت دے 12 مختلف پیشہ ورانہ گروپس/سروسز نال تعلق رکھݨ آلے 217 پروبیشنرز (117 مرد تے 100 تریمتیں) شامل ہن۔ زیرِ تربیت افسراں کوں وزارتِ اطلاعات تے نشریات دے کردار، حکومتی ابلاغ، قومی بیانیے دی تشکیل تے ترویج، ڈیجیٹل کمیونیکیشن، عوامی آگاہی تے غلط معلومات دے تدارک دے حوالے نال تفصیلی بریفنگ ݙتی ڳئی اتے غلط معلومات دے تدارک تے عوامی رابطہ کاری دے حوالے نال آگاہ کیتا ڳیا۔ وفاقی وزیرِ اطلاعات زیرِ تربیت افسران نال بدلدی ہوئی میڈیا دی صورتحال تے ڳالھ مہاڑ کریندیں ہوئیں آکھیا جو سرکاری افسراں دی پیشہ ورانہ صلاحیتاں تے موثر عوامی خدمت کیتے کامن ٹریننگ پروگرام اہم کردار ادا کریندا پئے۔ عطاء اللہ تارڑ آکھیا جو مؤثر حکومتی ابلاغ شفافیت دے فروغ، عوام کوں درست معلومات دی فراہمی تے ریاستی اداریاں تے عوام دے اعتماد کوں مضبوط بݨاوݨ اچ اہم کردار ادا کریندے۔ انہاں آکھیا جو موجودہ ڈیجیٹل دور اچ غلط معلومات تے گمراہ کن مواد دا مؤثر تدارک ناگزیر اے، ایں مقصد کیتے پیشہ ورانہ، ویلے سر تے ذمہ دارانہ ابلاغی حکمتِ عملی اختیار کرݨا ضروری اے۔ عطاء اللہ تارڑ آکھیا جو نوجوان افسران عاجزی، عزم تے احساسِ ذمہ داری دے نال پاکستان دی خدمت کرݨ تے سرکاری ذمہ داریاں دیانت داری، پیشہ ورانہ مہارت تے قومی مفاد کوں مقدم رکھیندیں ہوئیں انجام ݙیون۔ وفد کوں ڈیجیٹل کمیونیکیشن دے ذریعے عوامی رابطہ کاری، قومی پالیسیاں تے حکومتی اقدامات توں عوام کوں آگاہ کرݨ دے طریقہ کار بارے وی ݙسیا ڳئیا۔ 54ویں کامن ٹریننگ پروگرام دے زیرِ تربیت افسران ڈیجیٹل کمیونیکیشن ڈیپارٹمنٹ ولوں فراہم کردہ بریفنگ کوں مفید قرار ݙیندیں ہوئیں حکومتی ابلاغ تے ڈیجیٹل میڈیا دے کردار دے حوالے نال گہری دلچسپی دا اظہار کیتا۔