لاہورسودھے صوبے اچ جشنِ عید میلاد النبی ﷺ دے جلوساں کوں بھرپور سیکیورٹی ݙتی ویسی، آئی جی پنجاب

لاہور۔24اگست (اے پی پی) آئی جی پنجاب عبدالکریم آکھیے جو لاہور سودھے صوبے وچ جشنِ عید میلاد النبی ﷺ دیاں پرنور محفلاں، ریلیاں تے جلوساں کوں بھرپور سیکیورٹی ݙتی ویسی، ایں حوالے نال پنجاب پولیس سارے انتظامات مکمل کرڳھدن۔ ترجمان پنجاب پولیس موجب آئی جی پنجاب ہدایت کیتی جو 12 ربیع الأول تے سیکیورٹی ہائی الرٹ رکھی ونڄے تے شرپسنداں و ملک دشمن عناصر تے کڑی نظر رکھی ونڄے۔صوبے بھر وچ عید میلاد النبی ﷺ تے 1436 محفلاں تے 2479 جلوساں دی سیکیورٹی کیتے 55 ہزار توں ودھ افسران و اہلکار تعینات کیتے ویسن۔ ترجمان موجب لاہور وچ جشنِ عید میلاد النبی ﷺ دے موقع تے 216 جلوس تے 111 محافلِ میلاد منعقد تھیسن، جنہاں دی سیکیورٹی کیتے 8 ہزار توں ودھ افسران، اہلکار تے رضاکار فرائض سرانجام ݙیسن۔آئی جی پنجاب ہدایت کیتی جو سارے جلوساں، ریلیاں تے محفلاں کیتے ایس او پیز موجب سخت سیکیورٹی انتظامات یقینی بݨائے ونڄن، حساس جہیں تے اضافی نفری تعینات کیتی ونڄے جݙاں جو سیف سٹی کیمریں دی مدد نال محفلاں تے ریلیاں دی مانیٹرنگ کیتی ونڄے۔ انہاں آکھیا جو سیکیورٹی آرڈر تشکیل ݙیندے ویلھے امن کمیٹیاں، علماء کرام تے کمیونٹی لیڈرز دی مشاورت تے تجویزاں کوں سامݨے رکھیا ونڄے۔ سارے آر پی اوز، سی پی اوز تے ڈی پی اوز 12 ربیع الأول دے سیکیورٹی انتظامات دی خود نگرانی کرن تے کنٹرول رومز توں پروگراماں دی سیکیورٹی دی لمحہ بہ لمحہ مانیٹرنگ یقینی بݨاون۔ ترجمان دے مطابق پولیس، ٹریفک پولیس، ایلیٹ، سپیشل برانچ تے سی ٹی ڈی ٹیماں سیکیورٹی انتظامات وچ معاونت کریسن جݙاں جو محفلاں، جلوساں تے ریلیاں دی سیکیورٹی کیتے روایتی و جدید پولیسنگ دے سارے وسائل بروئے کار آندے ویسن۔