وزِیرِ مملکت وفاقی تعلیم وجیہہ قمر دا نیشنل بک فاؤنڈیشن دا دورہ، گوشہِ اقبال تے گوشہِ قائد اعظم دا افتتاح

اسلام آباد۔24اگست (اے پی پی) وزِیرِمملکت وفاقی تعلیم و پیشہ وارانہ تربیت وجیہہ قمر نیشنل بُک فاؤنڈیشن دا دورہ کیتا تے گوشۂ قائد اعظم تے گوشۂ اقبال دا افتتاح کیتا۔ ایں موقع تے انہاں آکھیا جو اے اقدام وفاقی وزیرمنصوبہ بندی و ترقی احسن اقبال دا علامہ محمد اقبال تے قائد اعظم محمد علی جناح دی 150ویں سالڳنڈھ دیاں تقریبات کوں قومی سطح تے شایانِ شان انداز وچ منعقد کرݨ تے ݙوہیں عظیم رہنماواں دے افکار و نظریات کوں نویں نسل تک موثر انداز وچ پڄاوݨ دے وژن دا حصہ اے۔ انہاں آکھیا جو ایجھے علمی و فکری گوشیں دا قیام پاکستان دے قومی ورثے، فکری روایتاں تے بانیانِ پاکستان دے پیغام کوں اُجاگر کرݨ وچ اہم کردار ادا کریسی۔ایں موقع تے انہاں نیشنل بک میوزیم، انڈونیشین کارنر تے ادارے دے مختلف شعبیں دا جائزہ ڳھدا۔ نیشنل بک میوزیم وچ محفوظ نادر و نایاب کتاباں دے ذخیرے، قدیم قرآنی نسخیں تے تخلیقی فن پاریں دا مشاہدہ کریندے وزیرِ مملکت انہاں کوں پاکستان دے علمی و تہذیبی ورثے دا اہم حصہ قرار ݙتا۔ انہاں قرآنِ پاک دے خصوصی گوشے، صوفیاء کارنر تے عظیم شعراء و ادیباں متعلق نمائش وچ وی دلچسپی دا اظہار کیتا۔وزیرِ مملکت آکھیا جو ایجھے علمی گوشے تے نادر ذخیرے نوجوان نسل وچ مطالعے، تحقیق تے جستجو دا ذوق بیدار کرݨ وچ اہم کردار ادا کریندن۔ انہاں نیشنل بک فاؤنڈیشن دی طرفوں کتاب تے علمی ورثے دے ودھارے سانڳے کیتیاں ونڄݨ آلیاں کوششاں د تعریف کیتی ۔ بعد اچ منیجنگ ڈائریکٹر نیشنل بک فاؤنڈیشن ڈاکٹر کامران جہانگیر وزیرِ مملکت کوں نویں قومی نصاب دے حوالے نال بریفنگ ݙتی جیں دا اطلاق مارچ 2027 توں متوقع اے۔ بریفنگ وچ نصابی کتاباں دی تیاری و ترقی، ٹیکسٹ بک دے معیار وچ بہتری، پاکستانی پبلشرز دے نال اشتراک، معیاری کتاباں دی اشاعت تے طلبہ کیتے موثر علمی و فکری مواد دی فراہمی دے حوالے نال حکمتِ عملی تے ڳالھ تھئی