حکومت زرعی انقلاب کیتے کساناں نال پورا ہتھ ونݙیسی، زیتون سودھا جدید زرعی شعبے سانڳے اقدامات جاری رکھیے ویسن، وزیرِ اعظم شہباز شریف دا ’’پاکستان نیشنل اولیو ویلیو چین پالیسی‘‘ دے اجراء دی تقریب نال خطاب

اسلام آباد۔24 اگست(اے پی پی)وزیرِ اعظم محمد شہباز شریف زرعی انقلاب کیتے عملی اقدامات لازمی قرار ݙیندے آکھیے جو حکومت زرعی انقلاب کیتے کساناں نال پورا ہتھ ونݙیسی، زیتون سودھا جدید زرعی شعبے سانڳے اقدامات جاری رکھیے ویسن، انہاں اے ڳالھ اسلام آباد اچ’’پاکستان نیشنل اولیو ویلیو چین پالیسی‘‘ دے اجراء دی تقریب نال خطاب اچ آکھی۔ ایں موقع تے وفاقی وزراء، غیر ملکی سفارت کاراں توں علاوہ زیتون دی کاشت اتے ایں شعبے نال جڑیے کساناں، ماہرین اتے محققین شرکت کیتی۔ وزیرِ اعظم آکھیا جو کساناں اتے ماہرین دی ڈینہہ رات محنت نال زیتون دے شعبے اچ شاندار کامیابیاں ملین۔ انہاں لورالائی توں عبدالجبار، مردان توں قرۃ العین اتے چکوال توں یعقوب اظہار دی محنت تے خراج تحسین پیش کریندے آکھیے جو او زیتون دی کاشت سانڳے صوبائی حکومتاں دے تعاون تے مشکور ہین۔ وزیراعظم زیتون دی کاشت کوں فروغ ݙیوݨ والے کساناں کوں خراجِ تحسین پیش کریندے ہوئیں اکھیا جو کساناں ثابت کیتے جو عزم، محنت اتے جدید سوچ نال وݙے نتائج حاصل کیتے ونڄ سڳدن، زرعی انقلاب کیتے کساناں کوں ہر ممکن معاونت ݙیسوں، وفاقی اتے صوبائی حکومتاں مل تے کساناں کوں سوکھ فٰسن کیوں جو ملک اچ زرعی انقلاب کیتے عملی اقدامات کرݨ ٻہوں ضروری تھی چکیے۔ وزیرِ اعظم اکھیا جو پاکستان ہر سال تقریباً 4 ارب ڈالر دا کھاوݨ والا تیل درآمد کریندے، درآمدی بل اچ سالانہ صرف 400 ملین ڈالر دی وی کمی آندی اے تاں اے وݙی خدمت ہوسی۔ درآمدی بل اچ کمی کیتے انہاں پام آئل اتے سورج مکھی دی کاشت ودھاوݨ دی وی ہدایت کیتی۔ وزیرِ اعظم پاکستان اتے اٹلی دے تجارتی تعلقات دی تعریف کریندے آکھیے جو زراعت، ٹریکٹر مینوفیکچرنگ اتے ٻئے شعبیاں اچ ݙوہیں ملکاں دا تعاون بہترین اے، ݙوہین ملک زیتون دی پیداوار، ویلیو ایڈیشن، جدید پروسیسنگ اتے برآمدات دے شعبے اچ تعاون ٻیا ودھیسن۔ وزیراعظم 100 نوجوان زرعی گریجویٹس کوں اٹلی بھیڄݨ دا اعلان کریندے آکھیا جو اے نوجوان زیتون دی کاشت، پروسیسنگ، مارکیٹنگ اتے ویلیو چین دے مختلف شعبیاں اچ جدید تربیت حاصل کریسن۔ ایں توں پہلے وزیراعظم محمد شہباز شریف زیتون دے کاشتکاراں، ایں شعبے دے محققین اتے ماہرین کوں شیلڈز وی ݙتن۔ انہاں مختلف سٹالز دا دورہ وی کیتا اتے زیتون دی مختلف مصنوعات اچ خصوصی دلچسپی ݙکھیندے زیتون دے کاشتکاراں نال وی الائے۔ تقریب نال وفاقی وزیرِ قومی غذائی تحفظ و تحقیق رانا تنویر حسین، سیکرٹری قومی غذائی تحفظ و تحقیق عامر علی احمد، کوآرڈینیٹر زراعت و غذائی تحفظ احمد عمیر اتے پاکستان وچ اطالوی سفیر اوگو چیار تلانی وی خطاب کیتے۔