پمز ہسپتال اچ ٻھاہ لڳݨ دی کال موصول تھیوݨ دے 7 منٹ اچ فائر اینڈ ریسکیو موقع تے پڄ ڳئیاں، تحقیقات کیتے اے ڈی سی جی دی سربراہی اچ کمیٹی قائم، کیپٹل ایمرجنسی سروس

اسلام آباد۔26اگست (اے پی پی) کیپٹل ایمرجنسی سروس (سی ای ایس) تے سی ڈی اے دے فائر ڈیپارٹمنٹ بدھ کوں علی الصبح پمز ہسپتال دے میٹرنل اینڈ چائلڈ ہیلتھ (ایم سی ایچ) سینٹر اچ ٻھاہ لڳݨ دی اطلاع دی کال دے حوالے نال آکھیا جو فائر کال سویلے 6 وڄ تے 54 منٹ تے موصول تھئی اتے فائر اینڈ ریسکیو ٹیماں ست منٹ اچ جائے وقوعہ تے پڄ ڳئیاں۔ سی ای ایس ولوں جاری تفصیلات دے مطابق اطلاع ملݨ تے فائر بریگیڈ دے چھی یونٹ تے چار ایمبولینسز تعینات کیتی ڳئیاں، ٻھاہ تے فوری طور تے قابو پا گھدا ڳیا جڈانجو ریسکیو کیتے ڳئے ٻالاں کوں فوری علاج کیتے آئی سی یو منتقل کر ݙتا ڳیا۔ ٻھاہ تے مکمل طور تے قابو پا گھدا ڳیا ، کولنگ تے اسسمنٹ آپریشن مکمل کر گھدے ڳئن۔ کیپٹل ایمرجنسی سروس آکھیا جو اموات تے زخمیاں دے درست اعداد و شمار دی تصدیق کیتے اے سی، ایس پی تے ریسکیو ٹیماں ہسپتال انتظامیہ دے نال رل تے کم کریندی پئن۔ واضح رہے جو اسلام آباد دی ضلعی انتظامیہ ایڈیشنل ڈپٹی کمشنر جنرل دی سربراہی اچ ہک کمیٹی وی بݨا ݙتی اے جو ٻھاہ لڳݨ دی وجوہات جاݨݨ کیتے تحقیقات کریسی، ریسکیو ردعمل تے ہسپتال اچ فائر سیفٹی دے اقدامات دا وی جائزہ گھنسی۔