پمز ہسپتال اچ ٻالاں دے آئی سی یو اچ ٻھاہ لڳݨ دا افسوسناک واقعہ پیش آیا، فرانزک دے ماہر جائزہ گھندے پئن، ڈاکٹر طارق فضل چوہدری

اسلام آباد۔26اگست (اے پی پی) وفاقی وزیر پارلیمانی امور ڈاکٹر طارق فضل چوہدری آکھیا جو پمز ہسپتال اچ ٻالاں دے آئی سی یو اچ ٻھاہ لڳݨ دا افسوسناک واقعہ تھیا جیندے اچ 14 نومولود ٻال جاں بحق تھی ڳئے، ہݨ تئیں دی اطلاعات دے مطابق ٻھاہ شارٹ سرکٹ نال لڳی، فرانزک دے ہیڈ ایں دا جائزہ گھندے پئن۔ بدھ کوں پمز دے دورے دے دوران میڈیا نال ڳالھ مہاڑ کریندیں ہوئیں انہاں آکھیا جو پمز دے ایم سی ایچ دی نرسری وارڈ اچ پوݨے ست وڄے ٻھاہ لڳݨ دا افسوسناک واقعہ پیش آیا۔ ہݨ تئیں دی اطلاعات دے مطابق ٻھاہ شارٹ سرکٹ دی وجہ توں شروع تھئی، آئی سی یو اچ گیس دے سلنڈرز، لائن، پلاسٹک دے آلات دی وجہ توں ٻھاہ تیزی نال کھنڈ ڳئی، بدقسمتی نال ٻالاں دے جاں بحق تھیوݨ دا واقعہ ہک المیہ تے افسوسناک اے۔ انتظامیہ دے مطابق اتھاں ڈیوٹی تے ݙو ڈاکٹرز تے ݙو نرساں موجود ہن، او محفوظ رہیاں، نومولود دی اماں محفوظ رہی، ہک ٻال کوں عملے بچایا۔ انہاں آکھیا جو ہسپتال اچ تمام حفاظتی انتظامات موجود ہن، ٻھاہ لڳݨ دی حتمی وجوہات دا تعین نئی تھیا، اساݙے فرانزک دے ماہر جائزہ گھندے پئن۔