پمز ہسپتال دے ٻالاں دے انتہائی نگہداشت وارڈ اچ اے سی بلاسٹ تھیوݨ پاروں ٻھاہ لڳی، مصطفیٰ کمال

اسلام آباد۔26اگست (اے پی پی) وفاقی وزیر صحت مصطفیٰ کمال آکھیا جو پمز ہسپتال دے ٻالاں دے انتہائی نگہداشت وارڈ اچ اے سی بلاسٹ تھیوݨ پاروں ٻھاہ لڳی، وارڈ اچ آکسیجن دی موجودگی پاروں ٻھاہ شدت اختیار کیتی۔ بدھ کوں اتھاں میڈیا نال ڳالھ مہاڑ کریندیں ہوئیں انہاں آکھیا جو 14 ٻالاں دے جاں بحق تھیوݨ دی تصدیق تھی ڳئی اے۔ انہاں اکھیا جو ڈی جی ہیلتھ تے ٻئے حکام ہسپتال اچ موجود ہن، متعلقہ حکام والدین دے نال رابطے اچ ہن۔ وفاقی وزیر واضح کیتا جو اگر اے واقعہ کہیں دی لاپرواہی نال تھیے تاں ایں دی تحقیقات تھیسن اتے ذمہ داراں دے خلاف سخت کارروائی کیتی ویسی۔ انہاں آکھیا جو میں آپݨے آپ کوں وی احتساب کیتے پیش کرینداں اتے اگر ایں اچ میݙی وی غلطی ہوسی تاں میکوں وی نہ چھوڑیا ویسی۔ انہاں اکھیا جوٻھاہ لڳݨ دے نال ای ہسپتال اچ بجلی بند تھی ڳئی۔ انہاں آکھیا جو نرسری وارڈ تے موجود عملہ ریسکیو کوں سݙݨ کیتے ڳیا، لیکن ٻھاہ بہوں تیزی نال کھنڈ ڳئی۔ وفاقی وزیر آکھیا جو ہسپتال اچ ٻھاہ وسماوݨ آلات کم کریندے پئے ہن۔ انہاں آکھیا جو پمز ہسپتال آپݨی صلاحیت توں ودھ کم کریندا پئے۔ مصطفیٰ کمال ٻیا آکھیا جو نومولود ٻالاں دی جاناں دا ضیاع ہک انتہائی دلخراش سانحہ اے، ایں ناقابلِ تلافی نقصان تے متاثرہ خانداناں دے ݙکھ کوں الفاظ اچ بیان نئی کیتا ونڄ سڳدا۔ انہاں آکھیا جو واقعے دی جامع تحقیقات کیتی ویندی پئن، ذمہ داراں دے کڑے احتساب کوں یقینی بݨایا ویسی۔