نبی کریمﷺ دے اسوہِ حسنہ دی روشنی اچ نویں نسل دے اخلاق تے شخصیت دی تعمیر دی ضرورت اے، وحدت دے فروغ تے فتنہ پرور تے مفاد پرست عناصر توں عوام کوں بچاوݨ کیتے علماء کرام آپݨا کردار ادا کرن، وزیرِ اعظم شہباز شریف دا قومی سیرت کانفرنس توں خطاب

اسلام آباد۔26اگست (اے پی پی) وزیرِ اعظم محمد شہباز شریف نبی کریم صلی اللہ علیہ وآلہ وسلم دے اسوہِ حسنہ دی روشنی اچ نویں نسل دے اخلاق تے شخصیت دی تعمیر دی ضرورت تے زور ݙیندیں ہوئیں آکھیا جو زندگی دا کوئی ایجھا پہلو نئی جینکوں آپ ﷺ آپݨے اسوہِ حسنہ نال منور نہ کیتا ہووے، آپ دی حیاتِ مبارکہ دا ہر واقعہ اساݙے کیتے ہدایت دا مکمل پیغام اے، اساکوں تحریکِ پاکستان دی روح کوں کݙاہیں نئی بھولݨا چاہیدا جݙاں سارے مسلمان مسلکی شناخت کوں پاسے تے رکھیندے ہوئیں قائدِ اعظم دی قیادت اچ متحد تھی ڳئے، اللہ تعالیٰ موقع ݙتا تاں اساں امتِ مسلمہ کوں متحد کرݨ دی مخلصانہ کوشش کیتی، سعودی عرب تے ترکیہ پاکستان دے نال آہنی دیوار وانگوں کھڑن، وحدت دے فروغ تے فتنہ پرور و مفاد پرست عناصر توں عوام کوں بچاوݨ کیتے علماء کرام کوں آپݨا کردار ادا کرݨا چاہیدے۔ اے ڳالھیں انہاں بدھ کوں اتھاں 12 ربیع الاول عید میلاد النبی صلی اللہ علیہ وآلہ وسلم دی مناسبت نال قومی سیرت کانفرنس توں خطاب کریندیں ہوئیں کیتا۔ کانفرنس اچ وفاقی وزراء، ارکانِ پارلیمنٹ، غیر ملکی سفارتکاراں، علماء کرام، مشائخ عظام تے ٻیاں شرکت کیتی۔ وزیرِ اعظم اکھیا جو 12 ربیع الاول دی اے عظیم الشان کانفرنس، ساݙی قابلِ فخر قومی روایت اے، ایں مبارک تے بابرکت ݙینہہ ہر سال ملک دے ہر حصے توں ہر مسلک دے علمائے کرام، محققین، مشائخ عظام تے سکالرز ہک چھت تلوں جمع تھیندن۔ انہاں اکھیا جو اے عظیم اجتماع ایں ڳالھ دی یاد دہانی اے جو اساں سارے اللہ دے آخری رسول نبی کریم حضرت محمد ﷺ دی رحمت دے سائے اچ ہک ملت ہیسے، آپ دی بے مثال تے بابرکت ہستی اساݙی سنڄاݨ اے، آپ صلی اللہ علیہ وسلم ساݙی عزت تے اساݙی جان ہن، آپ دا اُمتی ہووݨ اساݙا ایمان اے، آپ دی بعثت پوری انسانیت کیتے اللہ دا احسان ہے۔وزیرِ اعظم اکھیا جو جنھاں کتاباں کوں اج انعام دا حقدار قرار ݙتا ڳئے میں انہاں دے مصنفین کوں وی ہدیہِ تبریک پیش کرینداں۔ وزیرِ اعظم اکھیا جو اج دی کانفرنس کیتے جو عنوان منتخب کیتا ڳئے، او با معنی وی اے تے بر وقت وی، نسلِ نو دا تحفظ، تعمیر تے کردار، سیرت النبی دی روشنی اچ۔ نویں نسل اساݙی امیداں دا مرکز اے، اے اساݙا تابناک مستقبل اے۔ ایں نسل دی تعلیم و تربیت اساݙی اولین ترجیح اے۔وزیرِ اعظم اکھیا جو زندگی دا کوئی ایجھا پہلو نئی جینکوں نبی کریم ﷺ آپݨے اسوہِ حسنہ نال منور نہ کیتا ہووے۔ آپ صلی اللہ علیہ وآلہ وسلم دی حیاتِ مبارکہ دا ہر واقعہ اساݙے کیتے ہدایت دا مکمل سنیھا اے، صلح حدیبیہ اچ آپ اساکوں عقل و بصیرت دا پیکر نظر آندن، مشکل کوں آپݨی دانش نال آسانی اچ بدل ݙیندن۔ نبی کریم صلی اللہ علیہ وآلہ وسلم صحابہ کرام کوں سنیھا ݙٰیندن جو اج اساں حکمت تے دور اندیشی نال کم گھدا تاں آوݨ آلے ݙینہاں اچ فتحِ مبین اساݙی منتظر اے۔ وزیرِ اعظم اکھیا جو نبی کریم صلی اللہ علیہ وآلہ وسلم اختلاف دے آداب وی سکھائے، مکالمہ سکھایا، اہلِ کتاب توں اکھیا: “آؤ انہاں ڳالھیں آلے پاسے جو اساݙے تے تہاڈے درمیان مشترک ہن”، فتحِ مکہ دے موقع تے جݙاں آپ عظیم الشان لشکر دے نال شہر اچ داخل تھیندن تاں عاجزی دا پیکر بݨ ویندے ہن، او لوک جو آپ دی جان دے درپے ہن آپ انہاں کیتے عام معافی دا اعلان کر ݙیندے ہن، حجۃ الوداع دے موقع تے ہک عظیم الشان ریاست دے حکمران دی حیثیت نال آپ اعلان فرمیندے ہن جو کہیں عربی کوں عجمی تے، کہیں عجمی کوں عربی تے، کہیں کالے کوں گورے تے، تے کہیں گورے کوں کالے تے کوئی برتری حاصل نئی، آپ اعلان فرمیندے ہن جو ہک مسلمان دی جان دی اوہا حرمت اے، جو ایں شہر، ایں ݙینہہ تے ایں مقام دی حرمت اے، اِنھاں سبھ اوصافِ حمیدہ دے نال اساں نویں نسل کوں ݙساوݨا اے جو آپ نبوت دی سبھ توں پہلی دلیل دے طور تے لوکاں دے سامنے آپݨا کردار پیش کیتا۔وزیرِ اعظم اکھیا جو اج اساں ایں اسوہِ حسنہ دی روشنی اچ نویں نسل دے اخلاق تے شخصیت دی تعمیر کرݨی اے۔وزیرِ اعظم اکھیا جو میݙی خواہش اے جو دینی مدارس اچ علماء دی جیڑھی نویں نسل تیار تھیندی پئی اے او اخلاق تے کردار اچ ممتاز ہووے تے جݙاں او محراب و منبر دی ذمہ داری سنبھالن تاں او اسوہِ حسنہ دی روشنی اچ قوم کوں وحدت دا سنیھا ݙیون، او نماز دے نال نال اخلاق اچ وی امام ہوون، انہاں دے پچھوں نماز پڑھݨ آلے انہاں دا خطبہ سݨݨ آلے آپݨے کردار تے پیشہ ورانہ زندگی اچ، محنت تے دیانت دا نمونہ بݨ ونڄن۔وزیرِ اعظم اکھیا جو اللہ تعالیٰ اساکوں موقع ݙتا تاں اساں امتِ مسلمہ کوں متحد کرݨ دی مخلصانہ کوشش کیتی، مشرقِ وسطیٰ ہک وݙے بحران دے دہانے تے کھڑا ہئی، اساں ہک پاسے جنگ بندی کیتے مسلسل کوشش کیتی تے ٻئے پاسے مسلماناں اچ اتحاد کیتے وی ݙینہہ رات ہک کیتے رکھے، فیلڈ مارشل سید عاصم منیر ایں سارے عرصے اچ بھرپور طور تے مصروفِ عمل رہے، الحمد للہ! ساݙی اے مشترکہ محنت رنگ ڳھن آئی اتے عارضی جنگ بندی ممکن تھئی۔وزیرِ اعظم اکھیا جو اج امتِ مسلمہ کوں جو فکری چیلنج درپیش اے، تساں ایں توں چنڳی طرح واقف ہو، گمراہ کن خیالات نویں نسل کوں آپݨا شکار بݨیندے پئن، فرقہ واریت نوجواناں دے ذہن آلودہ کریندی پئی اے، انتہا پسندی انہاں کوں دہشت گردی دا راستہ ݙکھیندی پئی اے، سیاسی مفاد پرست انہاں دے اخلاق تے ڈاکہ سٹیندے پئن، اساکوں آپݨے ٻالاں کوں اِنھاں تمام فتنیاں توں بچاوݨا اے، نویں نسل دی اخلاقی تربیت کیتے سبھ توں پہلے انہاں دے ذہن کوں مطمئن کرو، ایں کیتے تساں جیسے جید علماء تے سکالرز دی شدید ضرورت اے، اساݙے نبی کریم ﷺ اساکوں نصیحت فرمائی جو حکمت مومن دی ونڄی ہوئی میراث اے۔ اساں اسوہِ حسنہ توں رہنمائی گھندے ہوئیں ایں حکمت دے نال نویں نسل دے ذھناں کوں مطمئن کرݨا اے، ایں دے نال جدید علوم وی سکھاوݨے ہن۔