وفاقی وزیرِ داخلہ دی صدارت اچ ایف آئی اے زونل آفس لاہور اچ اجلاس، انسانی سمگلنگ، حوالہ ہنڈی، جرائم پیشہ گینگز دے خلاف کارروائیاں دا جائزہ گھدا ڳیا

لاہور۔27اگست (اے پی پی) وفاقی وزیرِ داخلہ محسن نقوی ایف آئی اے زونل آفس لاہور دا دورہ کیتا اتے خصوصی اجلاس دی صدارت کیتی۔ اجلاس اچ ایف آئی اے زونل آفس دے اپ گریڈیشن پراجیکٹ، انسانی سمگلنگ، حوالہ ہنڈی اتے جرائم پیشہ گینگز دے خلاف کارروائیاں سمیت ٻئے معاملیاں دا جائزہ گھدا ڳیا۔ ترجمان ایف آئی اے دے مطابق وزیرِ داخلہ محسن نقوی ایف آئی اے زونل آفس دے اپ گریڈیشن پراجیکٹ تے پیش رفت دا جائزہ گھندیں ہوئیں منصوبہ تیکھے مکمل کرݨ دی ہدایت کیتی۔ انہاں انسانی سمگلنگ تے حوالہ ہنڈی اچ ملوث مافیا دے خلاف مؤثر کارروائی دے احکامات جاری کریندیں ہوئیں آکھیا جو انسانی سمگلنگ تے حوالہ ہنڈی مافیا دی پوری چین کوں قانون دی گرفت وچ ڳھدا ونڄے۔ محسن نقوی آکھیا جو جرائم پیشہ گینگز دے خلاف بھرپور کریک ڈاؤن ایف آئی اے دی ذمہ داری اے، ایں بارے عملی نتائج نظر آوݨے چاہیدن۔ ایف آئی اے افسراں تے عملے کوں ہر ممکن سہولتاں تے وسائل فراہم کریندے پئیوں اتے مزید وی کریسوں۔ اجلاس اچ ملک بھر دے ایئرپورٹس تے امیگریشن کاؤنٹرز تے نصب پراݨے کیمریاں کوں تبدیل کرݨ دا فیصلہ کیتا ڳیا جڈانجو جدید ترین ٹیکنالوجی دے حامل کیمریاں دی تنصیب دی اصولی منظوری وی ݙتی ڳئی۔ شکایات دے اندراج کیتے پاک آئی ڈی ایپ دیاں خدمات حاصل کرݨ دا وی اصولی فیصلہ کیتا ڳیا۔ ڈائریکٹر ایف آئی اے زونل آفس لاہور اجلاس کوں اپ گریڈیشن پراجیکٹ تے پیش رفت تے کارکردگی دے بارے وی بریفنگ ݙتی۔ بریفنگ اچ ݙسایا ڳیا جو گزشتہ ہک سال دے دوران 1670 ایف آئی آرز درج کیتی ڳئن جڈانجو 5 ہزار انکوائریاں اچوں 4 ہزار انکوائریاں نبیڑی ڳئن۔ ایں دوران 295 اشتہاری ملزمان کوں گرفتار کیتا ڳیا۔ اجلاس اچ ڈی جی ایف آئی اے، ڈائریکٹر ایف آئی اے زونل آفس لاہور تے تمام سرکل انچارجز شرکت کیتی۔