پاکستان ٻئے برادر ملکاں دے نال رَل تے ایران تے امریکا وچال جاری تعطل دے حل کیتے مخلصانہ کوششاں اچ مصروف اے، ترجمان دفترِ خارجہ

اسلام آباد۔27اگست (اے پی پی) ترجمان دفترِ خارجہ طاہر حسین اندرابی آکھیا جو پاکستان ٻئے برادر ممالک دے نال رَل تے خلیج تے مشرقِ وسطیٰ دے بحران بالخصوص ایران تے امریکا دے درمیان جاری تعطل دے حل کیتے مخلصانہ کوششاں اچ مصروف اے۔ خمیس کوں اتھاں ہفتہ وار پریس بریفنگ اچ انہاں آکھیا جو علاقائی سطح تے چیف آف آرمی اسٹاف تے چیف آف ڈیفنس فورسز فیلڈ مارشل سید عاصم منیر 24 اگست کوں پاکستان دی جاری سفارتی کوششاں دے سلسلے اچ تہران دا دورہ کیتا جیندے مقصد امریکا تے ایران دے درمیان تنازعے دے خاتمے تے آبنائے ہرمز کوں ولا کھولݨ دی کوششاں کوں اڳوں ودھاوݨ اے۔ انہاں آکھیا جو مذاکرات اچ علاقائی کشیدگی اچ ڳھٹکی، فوجی تعطل دے خاتمے تے علاقائی امن تے استحکام دی بحالی کیتے مذاکرات دے ذریعے تصفیے دے امکانات دا جائزہ گھنݨ تے توجہ مرکوز کیتی ڳئی۔ ترجمان آکھیا جو ایں دورے امریکہ تے ایران وچال اختلافات گھٹ کرݨ اچ پاکستان دے مخلصانہ تے تعمیری کردار کوں اجاگر کیتا۔ انہاں آکھیا جو ایرانی قیادت مذاکرات، کشیدگی اچ ڳھٹکی تے تنازعے دے پرامن حل کیتے پاکستان دی کوششاں کوں سراہیا۔ انہاں واضح کیتا جو کچھ حلقیاں ولوں اے دعوے جو چیف آف آرمی اسٹاف و چیف آف ڈیفنس فورسز صدر ٹرمپ یا امریکا دے ایلچی دی حیثیت نال ایران دا دورہ کیتا، گمراہ کن تے حقائق دے منافی ہن۔ ترجمان آکھیا جو انہاں دا اے دورہ خالصتاً پاکستان دے جاری ثالثی کردار دے تناظر تے پس منظر اچ کیتا ڳیا۔ ترجمان آکھیا جو ایں اہم پیش رفت دے نال نال نائب وزیرِ اعظم تے وزیرِ خارجہ سینیٹر محمد اسحاق ڈار وی خطے اچ آپݨے ہم منصباں دے نال مسلسل رابطے اچ رہیے۔ ترجمان آکھیا جو نائب وزیرِ اعظم 14 اگست کوں مصر دے وزیرِ خارجہ بدر عبدالعاطی نال ڳالھ مہاڑ کیتی جیندے اچ بنیادی طور تے ݙو پاسہ تعلقات تے علاقائی صورتحال تے ڳالھ کیتی ڳئی۔