سکیورٹی فورسز دی خیبرپختونخوا تے بلوچستان وچ فتنہ الخوارج تے فتنہ الہندوستان دے دہشت گرداں دے خلاف کامیاب کارروائیاں جاری

راولپنڈی۔27اگست (اے پی پی) سکیورٹی فورسز دی خیبرپختونخوا تے بلوچستان وچ فتنہ الخوارج تے فتنہ الہندوستان دے دہشت گرداں دے خلاف کامیاب کارروائیاں جاری ہن، سکیورٹی فورسز دے انٹیلی جنس بیسڈ آپریشنز وچ فتنہ الخوارج تے فتنہ الہندوستان دے 11 دہشت گرد جہنم واصل تھئے۔ سکیورٹی ذرائع موجب سکیورٹی فورسز خیبرپختونخوا دے علاقیں جنوبی وزیرستان تے بنوں جݙاں جو بلوچستان دے ضلع خضدار وچ انٹیلی جنس بیسڈ آپریشنز کیتے۔ سکیورٹی فورسز دے انٹیلی جنس بیسڈ آپریشنز وچ فتنہ الخوارج تے فتنہ الہندوستان دے 11 دہشت گرد جہنم واصل تھئے۔ سکیورٹی فورسز دے بنوں وچ فتنہ الخوارج دے خلاف انٹیلی جنس بیسڈ آپریشن وچ 2 دہشت گرد جہنم واصل تھئے جݙاں جو اسلحہ تے گولہ بارود وی برآمد تھیا۔ سکیورٹی فورسز کامیاب کارروائی کریندے ہوئیں بارودی مواد نال دہشت گرداں دے ٹھکاݨے کوں تباہ کرݙتا۔ سکیورٹی ذرائع موجب جنوبی وزیرستان دے علاقے لدھا وچ سکیورٹی فورسز دے خفیہ اطلاع تے آپریشن وچ 5 خوارج جہنم واصل تھئے، سکیورٹی فورسز فتنہ الخوارج دے دہشت گرداں دی نقل و حرکت دا سراغ لاتا تے گھیرے وچ گھن تے مؤثر کارروائی کیتی۔ سکیورٹی ذرائع موجب بلوچستان دے ضلع خضدارساسول وچ فتنہ الہندوستان دے خلاف کارروائی وچ 4 دہشت گرد جہنم واصل تھئے۔ سکیورٹی فورسز فتنہ الہندوستان دے دہشت گرداراں کوں کواڈ کاپٹر دی مدد نال مؤثر انداز وچ نشانہ بݨایا، کارروائیاں وچ ایں ڳالھ کوں یقینی بݨایا ڳئے جو عوام دی جان تے مال دا تحفظ رہے تے مقامی آبادی کوں کوئی ضیان نہ پُڄے۔ سکیورٹی ذرائع آکھیے جو ملک توں دہشت گردی دے ناسور دے منڈھوں خاتمے تئیں سکیورٹی فورسز دی عزمِ استحکام وژن دے تحت کارروائیاں جاری ہن