اسلام آباد۔27اگست (اے پی پی) پاکستان آکھیے جو او افغانستان نال ریاستی سطح تے مذاکرات تے ادارہ جاتی رابطہ شروع کرݨ کیتے تیار اے، ایں کیتے ضروری اے جو افغان طالبان حکومت ایں ڳالھ کوں یقینی بݨاوݨ کیتے ٹھوس تے قابلِ تصدیق انسدادِ دہشت گردی اقدامات کرے جو افغان سرزمین پاکستان دے خلاف دہشت گرد گروپاں دے استعمال وچ نہ آوے۔ دفترِ خارجہ دے ترجمان طاہر حسین اندرابی ہفتہ وار …
افغانستان نال مذاکرات قابلِ تصدیق انسدادِ دہشت گردی اقدامات نال مشروط ہن، ترجمان دفترِ خارجہ
اسلام آباد۔27اگست (اے پی پی) پاکستان آکھیے جو او افغانستان نال ریاستی سطح تے مذاکرات تے ادارہ جاتی رابطہ شروع کرݨ کیتے تیار اے، ایں کیتے ضروری اے جو افغان طالبان حکومت ایں ڳالھ کوں یقینی بݨاوݨ کیتے ٹھوس تے قابلِ تصدیق انسدادِ دہشت گردی اقدامات کرے جو افغان سرزمین پاکستان دے خلاف دہشت گرد گروپاں دے استعمال وچ نہ آوے۔ دفترِ خارجہ دے ترجمان طاہر حسین اندرابی ہفتہ وار پریس بریفنگ اچ آکھیے جو کہیں وی مذاکرات کیتے ضروری اے جوافغان طالبان ایں ڳالھ کوں یقینی بݨاون جو افغان سرزمین پاکستان دے خلاف دہشت گردی کرݨ کیتے استعمال نہ تھیوے۔ کابل کوں دوحہ فریم ورک سودھے آپݨیاں بین الاقوامی ذمہ واریاں دی پاسداری کرݨی پوسی تے ایں ڳالھ کوں یقینی بݨاوݨا پوسی جو افغان سرزمین توں پاکستان دے خلاف دشمن پراکسیز بالخصوص ٹی ٹی پی تے بی ایل اے کوں استعمال نہ کیتا ونڄے۔ انہاں واضح کیتا جے افغان حکومت دے اقدامات کہیں ہمسایہ ملک دی ایما تے کیتے ویندے پئے ہوون تے خصوصاً افغان سرزمین توں تھیوݨ آلی دہشت گردی وچ بھارتی مداخلت دے شواہد موجود ہوون تاں پاکستان اِنھاں عناصر کوں پراکسیز قرار ݙیوݨ تے مجبورتھیسی۔ مکہ مشترکہ دفاعی معاہدے وچ بنگلہ دیش سودھے ٻئے ملکاں دی شمولیت وچ دلچسپی دے حوالے نال سوال تے ترجمان ایں کوں ہک ابھردا ہویا دفاعی نظام قرار ݙتا جو مشترکہ سلامتی ذمہ واریاں رکھݨ آلے ملکاں کیتے کھُلیے۔ انہاں آکھیا جو باضابطہ درخواستاں دا ریاض تے انقرہ وچ شراکت داراں نال مشاورت نال جائزہ ڳھدا ویسی۔ انہاں آکھیا جو ہک ارتقا پذیر سلامتی نظام دے طور تے ایم جے ڈی اے اِنھاں ملکاں کیتے کھُلیے جو مشترکہ عزم، اجتماعی ذمہ واریاں تے مشترکہ سلامتی مفادات رکھیندن، کہیں وی باضابطہ درخواست تے ریاض تے انقرہ وچ ساݙے شراکت داراں نال مشاورت توں بعد غور کیتا ویسی، ایم جے ڈی اے کوں عملی شکل ݙیوݨ دا عمل حالی ابتدائی مرحلے وچ اے۔ ترجمان آکھیا جو پاکستان نویں دہلی وچ پاکستانی ہائی کمیشن دے ٻاہر موجود قونصلر سہولتاں کوں یکطرفہ طور تے مسمار کرݨ تے بھارتی حکام دے خلاف سخت سفارتی احتجاج ریکارڈ کرائے۔ انہاں ایں کوں اسلام آباد دی طرفوں سفارتی مشنز وچ تجاوزات دے خلاف پیشگی اطلاع دے نال کیتے ونڄݨ آلے آپریشن توں مختلف قرار ݙتا۔ اقوامِ متحدہ دی جنرل اسمبلی دے آندے اجلاس وچ پاکستان دی شرکت متعلق سوال تے ترجمان آکھیا جو ایں حوالے نال تیاریاں جاری ہن تے پاکستان اِنھاں دستاویزات دی تیاری وچ آپݨیاں تجویزاں پیش کریسی جیڑھی جنرل اسمبلی، ایں دے کہیں ادارے یا کہیں ایجنسی دی طرفوں ایں موقع تے جاری کیتیاں ویسن۔ ترجمان آکھیا جو برطانیہ دے جاری سرکاری دورے دے دوران نائب وزیرِاعظم و وزیرِ خارجہ اسحاق ڈار انٹرنیشنل میری ٹائم آرگنائزیشن دے سیکرٹری جنرل ارسینیو ڈومنگیز نال ملاقات کیتی تے صومالی قزاقاں دی طرفوں یرغمال بݨائے ڳئے 10 پاکستانی بحری کارکناں دی محفوظ رہائی کیتے ادارہ جاتی مداخلت دی درخواست کیتی۔ انہاں صورتحال دی پیچیدگی کوں اجاگر کریندے آکھیا جو حکومت انہاں دی رہائی کیتے فعال کوششاں کریندی پئی اے، اے ہک اوکھا مسئلہ اے جیندے وچ قبائلی معاشرہ تے توانائی متعلق کارگو شامل اے جئیں پاروں براہِ راست کارروائی دے امکانات محدود ہن۔
