پاکستان وچ سعودی سرمایہ کاراں دی دلچسپی قابلِ تعریف اے، وزیرِ خزانہ محمد اورنگزیب دی سعودی آسیاد گروپ دے وفد نال ڳالھ مہاڑ

اسلام آباد۔27اگست (اے پی پی) وفاقی وزیرِ خزانہ و محصولات سینیٹر محمد اورنگزیب آکھیے جو حکومت مالیاتی نظم و ضبط، ڈھانچہ جاتی اصلاحات، پائیدار سرمایہ کاری تے نجی شعبے دی قیادت وچ ترقی و نمو کیتے سازگار ماحول پیدا کرݨ تے توجہ مرکوز کیتی اے، سعودی سرمایہ کاراں دی پاکستان وچ سرمایہ کاری وچ دلچسپی قابلِ تعریف اے، حکومت ملک وچ سرمایہ کاری وچ ودھارے کیتے سرمایہ کاراں کوں سہولتاں ݙیوݨ جاری رکھیسی۔ انہاں اے ڳالھ اتھاں سعودی عرب دے آسیاد گروپ دے چیف ایگزیکٹو افسر تے وافی انرجی پاکستان لمیٹڈ دے بورڈ آف ڈائریکٹرز دے چیئرمین غسان احمد آمودی نال ملاقات اچ آکھی۔ ایں موقع تے گروپ دے چیف فنانشل افسر تے وافی انرجی پاکستان لمیٹڈ دے بورڈ ممبر جاوید اختر، وافی انرجی پاکستان لمیٹڈ دے چیف ایگزیکٹو افسر زبیر شیخ تے وافی انرجی پاکستان لمیٹڈ دے کارپوریٹ و حکومتی تعلقات دے ڈائریکٹر عمران حسین قریشی وی موجود ہن۔ ملاقات وچ گروپ دی طرفوں پاکستان وچ سرمایہ کاری، مزید توسیع دے منصوبیں تے اہم شعبیں وچ نویں سرمایہ کاری دے موقع تے ڳالھ مہاڑ کیتی ڳئی جنھاں وچ حکومت دی وسیع تر نجکاری دیاں کوششاں توں پیدا تھیوݨ آلے موقع وی شامل ہن۔ غسان آمودی پاکستان کوں طویل المدتی سرمایہ کاری دی ہک اہم منزل قرار ݙیندے گروپ دے عزم دا اعادہ کیتا تے ملک وچ آپݨے تجربے تے اطمینان دا اظہار کیتا۔ انہاں سعودی عرب توں ٻاہر گروپ دے سرمایہ کاری پورٹ فولیو وچ پاکستان دی اہمیت کوں اجاگر کیتا تے پاکستان وچ آپݨی موجودگی کوں مزید وسعت ݙیوݨ دے منصوبیں دا وی ݙسایا ۔ وزیرِ خزانہ پاکستان وچ سعودی سرمایہ کاراں دی مسلسل دلچسپی دا خیرمقدم کیتا تے نجکاری دے جاری عمل دے ذریعے پیدا تھیوݨ آلے نویں موقع تے روشنی پاتی، انہاں قابلِ اعتماد تے طویل المدتی سرمایہ کاراں کوں راغب کرݨ تے اہم شعبیں وچ تجارتی اعتبار نال قابلِ عمل سرمایہ کاری کوں سہولت ݙیوݨ دی اہمیت تے زورݙتا۔ انہاں سرمایہ کاری، تجارت تے اقتصادی تعاون دے ودھارے کیتے سعودی عرب تے نجی شعبے دے نال کثیرالجہتی رابطے دی اہمیت کوں وی اجاگر کیتا۔ غسان آمودی وزیرِ خزانہ کوں آندے ہوائی اݙیں دی نجکاری دے عمل وچ گروپ دی شرکت وچ دلچسپی تے متعلقہ تکنیکی مہارت رکھݨ آلے سعودی تے بین الاقوامی شراکت داراں کوں ہک جاہ تے کٹھا کرݨ دیاں کوششاں دا ݙسایا۔ انہاں گروپ دی ہوائی اݙیں دے آپریشنز متعلق اڄوکی پیش رفت تے ایں شعبے وچ ایں دے ودھدے بین الاقوامی تجربے تے تفصیل نال روشنی پاتی۔ ملاقات وچ وافی انرجی پاکستان لمیٹڈ دے جاری توسیعی تے سرمایہ کاری منصوبیں تے وی ڳالھ کیتی ، جنھاں وچ ایں دا ودھدا ہویا ریٹیل نیٹ ورک، ذخیرہ کرݨ دا انفراسٹرکچر تے ڈیجیٹلائزیشن دے اقدامات شامل ہن۔ کمپنی وزیرِ خزانہ کوں خیبر پختونخوا تے ملک دے ٻئے حصیں وچ آپݨی سرمایہ کاری تے آپݨے آپریشنز کوں مزید وسعت ݙیوݨ دے منصوبیں دا ݙسایا ۔ غسان آمودی وزیرِ خزانہ کوں پاکستان وچ اضافی سرمایہ کاری دے موقع، جنھاں وچ مالیاتی شعبہ وی شامل اے، ڳولݨ وچ گروپ دی دلچسپی تے ممکنہ منصوبیں کیتے مزید سعودی تے پاکستانی سرمایہ کاراں کوں ہک جاہ تے کٹھا کرݨ دیاں کوششاں دا ݙسایا۔ وزیرِ خزانہ کلی معیشت دے استحکام دی پاسے پیش رفت، جیندے وچ اہم اقتصادی اشاریں تے ملک دے خودمختار کریڈٹ پروفائل وچ بہتری شامل اے، تے روشنی پاتی تے آکھیا جو حکومت دی توجہ مالیاتی نظم و ضبط، ڈھانچہ جاتی اصلاحات، پائیدار سرمایہ کاری تے نجی شعبے دی قیادت وچ ترقی کیتے سازگار ماحول پیدا کرݨ تے مرکوز اے۔