نائب وزیرِ اعظم اسحاق ڈار دے برطانوی وزیرِ خارجہ ایڈ ملی بینڈ نال وفود دی سطح تے مذاکرات

اسلام آباد۔27 اگست(اے پی پی)نائب وزیرِ اعظم و وزیرِ خارجہ سینیٹر محمد اسحاق ڈار برطانیہ دے سرکاری دورے اچ لندن اچ برطانوی وزیرِ خارجہ ایڈ ملی بینڈ نال وفود دی سطح تے مذاکرات کیتن۔ فریقین پاکستان اتے برطانیہ دے ݙو طرفہ تعلقات دے پہلوواں دا جائزہ ڳھدا اتے ݙوہائیں ملکاں دی وزارتِ خارجہ وچال باضابطہ مذاکرات کیتے ہک منظم طریقہ کار اپناوݨ تے اتفاق کیتے جیندے تحت تعاون دے سارے شعبیاں تے توجہ ݙتی ویسی اتے ݙو طرفہ تعلقات کوں ٻیا تکڑا کیتا ویسی۔ ݙوہائیں وزرائے خارجہ باہمی دلچسپی دے امور اتے اعلیٰ سطح مسلسل روابط و قریبی رابطہ کاری تے الیندے اہم علاقائی اتے بین الاقوامی پیش رفت بشمول مشرقِ وسطیٰ دی بدلدی صورتحال تے وی الایا۔ نائب وزیرِ اعظم و وزیرِ خارجہ خطے اچ پاکستان دیاں سفارتی اتے ثالثی کوششاں اتے اِنھاں روابط نال تھیوݨ آلی اڳونہی دا ݙسایا۔ برطانوی وزیرِ خارجہ ایڈ ملی بینڈ مشرقِ وسطیٰ اچ مذاکرات، سفارت کاری اتے استحکام سانڳے پاکستان دے تعمیری کردار اتے سہولت کاری دیاں کوششاں کوں سراہیا۔ مذاکرات اچ سندھ طاس معاہدے تے پیش رفت اتے خطے دی سکیورٹی صورتحال تے ڳالھ تھئی۔ فریقین خطے اتے ایں توں ٻاہرو امن، استحکام اتے تعاون سانڳے مسلسل روابط تے زور ݙیندے آپسی تعلقات اتے عوامی روابط ٻئے تکڑے کرݨ کیتے کٹھیاں کوششاں جاری رکھݨ تے اتفاق کیتے۔