وزیرِ اعظم سابق سیکرٹری داخلہ شاہد خان کوں پمز واقعہ دی ݙو ݙینہ اچ انکوائری رپورٹ، 7 ݙینہ اچ تفصیلی رپورٹ ݙیوݨ دی ہدایت کیتی اے، وفاقی وزیرِ قانون دی قومی اسمبلی اچ ڳالھ مہاڑ

اسلام آباد۔28اگست (اے پی پی) وفاقی وزیرِ قانون اعظم نذیر تارڑ آکھیا جو پمز اچ تھیوݨ آلا سانحہ اندوہناک اے، مستقبل اچ ایں طرح دے حادثات توں بچݨ کیتے ٹھوس تجاویز تے سفارشات آوݨی چاہیدن۔ جمعہ کوں قومی اسمبلی اچ پاکستان انسٹی ٹیوٹ آف میڈیکل سائنسز اچ پیش آوݨ آلے سانحے تے بحث دے آغاز تے انہاں ایوان کوں ݙسایا جو پمز اچ پیش آوݨ آلا حادثہ تکلیف دہ اے جیندے تے پوری قوم ݙکھی اے۔ وفاقی وزیر آکھیا جو حادثات اچانک رونما تھیندن جو تھیا او درست نئی، حادثے دے عوامل تے وجوہات جاݨݨ کیتے وزیرِ اعظم محمد شہباز شریف کمیٹی بݨائی، ایں ݙینہہ ہک اہم اجلاس تھیا، جو ݙو گھنٹے جاری رہیا ایں اجلاس اچ اسلام آباد تے ہسپتال انتظامیہ دے سینئر حکام شریک ہن، وزیرِ اعظم سابق سیکرٹری داخلہ شاہد خان کوں ݙو ݙینہ اچ انکوائری رپورٹ ݙیوݨ دی ہدایت کیتی جیندی عبوری رپورٹ اج شام تئیں آویسی، انہاں کوں تفصیلی رپورٹ 7 ݙینہ اچ ݙیوݨ دی وی ہدایت کیتی ڳئی اے، سابق سیکرٹری داخلہ شاہد خان ماضی اچ وی ایں طرح دی تحقیقات کیتی ہوئی اے۔ وزیرِ قانون اکھیا جو پمز ہسپتال دے امور اچ بہتری کیتے اظہر کیانی دی قیادت اچ چار رکنی کمیٹی وی قائم کیتی ڳئی اے جو پمز ہسپتال کوں بہتر بݨاوݨ بارے رپورٹ پیش کریسی۔