احتجاج دی آڑ اچ تشدد، توڑ پھوڑ دی مکل نئی ݙتی ونڄ سڳدی، وفاقی وزیرِ داخلہ دا چارسدہ اچ فیڈرل کانسٹیبلری ٹریننگ سینٹر اچ خطاب

چارسدہ۔28اگست (اے پی پی) وفاقی وزیرِ داخلہ محسن نقوی آکھیا جو پرامن احتجاج ہر شہری دا حق اے، قانون احتجاج دا طریقہ کار واضح طور تے متعین کر رکھیے، قانون دے دائرے اچ رہندے ہوئے پرامن احتجاج تے کہیں کوں اعتراض نئی، ملک دے امن و امان تے استحکام کوں کہیں صورت سبوتاژ کرݨ دی اجازت نہ ݙیسوں۔ او جمعہ کوں چارسدہ اچ فیڈرل کانسٹیبلری ٹریننگ سینٹر شب قدر دے دورے دے موقع تے خطاب کریندے پئے ہن۔ وفاقی وزیرِ داخلہ محسن نقوی اینٹی رائٹ ونگ دی خصوصی تربیتی مشقاں دا معائنہ کیتا اتے اہلکاراں دی پیشہ وارانہ صلاحیتاں، جدید تربیت تے آپریشنل تیاری کوں سراہیا۔ وفاقی وزیرِ داخلہ اینٹی رائٹ ونگ دے اہلکاراں دی مختلف عملی مشقاں ݙٹھیاں۔ اہلکاراں ہجوم کوں کنٹرول کرݨ، حساس مقامات دے تحفظ، پرتشدد صورتحال نال نبڑݨ تے امن و امان برقرار رکھݨ بارے آپݨی پیشہ وارانہ مہارت دا عملی مظاہرہ کیتا۔ وزیرِ داخلہ محسن نقوی دا آکھݨ ہئی جو اینٹی رائٹ فورس کوں جدید خطوط تے تربیت ݙتی ڳئی اے، امن و امان دی کہیں وی صورتحال نال نبڑݨ کیتے فورس مکمل طور تے تیار تے بھرپور صلاحیت رکھیندی ہے۔ وفاقی وزیرِ داخلہ محسن نقوی تمام جواناں کوں گیس ماسک فراہم کرݨ دی ہدایت کریندے ہوئیں آکھیا جو تہاݙی تربیت تے خصوصی توجہ ݙتی ڳئی اے، ہر طرح دی ٹریننگ محنت، لگن تے مکمل پیشہ وارانہ جذبے دے نال مکمل کرو۔ وفاقی وزیرِ داخلہ ایف سی ہیڈکوارٹر اچ کھیݙاں دی بہترین سہولتاں فراہم کرݨ دا اعلان کریندیں ہوئیں آکھیا جو عالمی معیار دا سوئمنگ پول وی بݨایا ویسی۔ وفاقی وزیرِ داخلہ بیرکس دا دورہ کیتا، اہلکاراں نال ملاقات کیتی تے انہاں توں مسائل دریافت کیتے۔ وفاقی وزیرِ داخلہ ایف سی ہیڈکوارٹر اچ اہلکاراں دے تمام واش رومز ازسرنو تعمیر کرݨ دی ہدایت کیتی۔  آئی جی فیڈرل کانسٹیبلری، ڈی آئی جی ٹریننگ، ڈی او ایف سی تے ٻئے اعلیٰ افسران وی ایں موقع تے موجود ہن۔