پمز اچ پیش آوݨ آلے حادثے دے ذمہ واراں دے خلاف کارروائی تھیسی، کہیں کوں نہ چھوڑیا ویسی، سید مصطفیٰ کمال دا قومی اسمبلی اچ بیان

اسلام آباد۔28اگست (اے پی پی): فاقی وزیرِ قومی صحت خدمات سید مصطفیٰ کمال آکھیا جو پاکستان انسٹی ٹیوٹ آف میڈیکل سائنسز (پمز) اچ پیش آوݨ آلے حادثے دے ذمہ واراں دے خلاف کارروائی تھیسی اتے کہیں کوں نہ چھوڑیا ویسی۔ جمعہ کوں قومی اسمبلی دے اجلاس اچ ہسپتال اچ پیش آوݨ آلے حادثے تے بحث کوں نبیڑیندیں ہوئیں انہاں آکھیا جو پمز اچ تھیوݨ آلا سانحہ ٻہوں وݙا اے اتے معصوم جاناں دا کوئی نعم البدل نئی، 14 ٻالاں دی شہادت تھئی اے اتے اساں ایں دی ذمہ داری گھندوں۔ وفاقی وزیر آکھیا جو وزیرِ اعظم اعلیٰ اختیارات دی حامل کمیٹی بݨائی اے اتے ٹی او آر اچ اہم شیاں شامل ہن، پچھلے 24 گھنٹیاں اچ ایں حوالے نال ٻہوں کام تھیے، شہادتاں، جیندے اچ ڈیجیٹل تے ویڈیو ثبوت، موقع تے موجود لوکاں دے بیانات شامل تھیسن، دی بنیاد تے فیصلہ تھیسی، کمیٹی دی ابتدائی رپورٹ اڄ جمع کرائی ویسی۔ انہاں ایوان کوں یقین ݙوایا جو واقعہ دا جو وی ذمہ دار ہوسی اونکوں نہ چھوڑیا ویسی۔ انہاں آکھیا جو سینیٹ توں وی تجاویز آئن، ایم این ایز تے سینیٹرز دی ہک کمیٹی تھیوݨی چاہیدی اے اتے ایں کیتے نظام الاوقات نئی ݙیوݨا چاہیدا، اے صرف 14 ٻالاں دا معاملہ نئی ، ہر سال پاکستان اچ 4 لکھ نو مولود ٻالاں دی جاناں ویندی پئن یومیہ اے تعداد 1300 بݨدی اے، اساکوں آپݨے ٻالاں کوں حادثات توں بچاوݨا اے۔ انہاں اکھیا جو انہاں دی وزارت ایوان دے سامݨے تمام مطلوبہ تفصیلات ݙیسی۔