وزیرِ اعظم دی دلچسپی اتے سرپرستی، پاکستان اتے سعودی عرب دے زرعی شعبے اچ تعاون سانڳے اہم پیش رفت

اسلام آباد۔30 اگست(اے پی پی)وزیرِ اعظم محمد شہباز شریف دی ذاتی دلچسپی اتے سرپرستی نال پاکستان اتے سعودی عرب دے زرعی شعبے اچ تعاون کیتے اہم پیش رفت تھئی اے، ݙوہائیں ملکاں آندے ݙو سالاں اچ سعودی عرب کیتے پاکستان دی زرعی و غذائی مصنوعات دی برآمدات 3 ارب ڈالر تئیں پڄاوݨ دا عزم دوہریندے لائیو سٹاک، ایگری فوڈ پراسیسنگ اتے چاول دی ویلیو چین دے شعبیاں اچ تعاون کیتے رابطہ کاری جاری رکھݨ تے اتفاق کیتے ڄݙاں جو سعودی عرب پاکستان توں سرخ گوشت دی درآمد بتدریج ݙوڑی کرݨ اتے چاول دی ݙو طرفہ تجارت ٻئی ودھاوݨ اچ دلچسپی ݙکھائی اے۔ وزیرِ اعظم محمد شہباز شریف دی ذاتی دلچسپی نال سعودی وزیرِ ماحولیات، پاݨی و زراعت اتے وزارتِ قومی غذائی تحفظ و تحقیق دے کامیاب مذاکرات تھئن، مذاکرات توں بعد پاکستان اتے سعودی عرب دے زرعی اتے غذائی تحفظ دی شراکت داری دے ودھارے کیتے مشترکہ اعلامیہ جاری کیتا ڳئے جو حکومتِ پاکستان دی دعوت تے وزیرِ ماحولیات، پاݨی و زراعت انجینئر عبدالرحمٰن اے الفضلی دی قیادت اچ سعودی وفد 26 توں 28 اگست 2026ء تئیں اسلام آباد دا دورہ کیتے، وفد اچ وزارتِ ماحولیات، پاݨی و زراعت، جنرل فوڈ سکیورٹی اتھارٹی اتے متعلقہ اداریاں دے اعلیٰ حکام شامل ہن۔ وفد وزیرِ اعظم پاکستان محمد شہباز شریف نال ملاقات کیتی اتے ممکنہ تعاون دے حوالے نال تفصیلی الائے۔ پاکستان دے وفد دی قیادت وفاقی وزیر قومی غذائی تحفظ و تحقیق رانا تنویر حسین کیتی، وفد اچ سیکرٹری تجارت جواد پال، سیکرٹری قومی غذائی تحفظ و تحقیق عامر علی احمد، وزیرِ اعظم دے کوآرڈینیٹر برائے زراعت و غذائی تحفظ احمد عمیر اتے پاکستان دے چاول، سرخ گوشت، پراسیسڈ فوڈ/فروٹ کنسنٹریٹ اتے ساوے چارے دے شعبیاں دے نجی شعبے دے نمائندگان شامل ہن۔ دورے اچ پاکستان-سعودی عرب ایگریکلچر اینڈ فوڈ اسٹریٹجک پلان تے بریفنگ، اسپیشل انویسٹمنٹ فیسیلیٹیشن کونسل، فوجی فاؤنڈیشن، پاکستان-سعودی عرب ایگری بزنس فورم نال ملاقاتاں اتے نیشنل ایگریکلچرل ریسرچ سینٹر دا دورہ وی کیتا ڳیا۔ ݙوہائیں فریقاں 1947ء توں جاری پاکستان اتے مملکتِ سعودی عرب دے تکڑے تاریخی اتے برادرانہ تعلقات دا عزم دوہرایا۔ ݙوہائیں پاسوں سعودی عرب دے ویژن 2030ء دے تحت غذائی تحفظ دیاں ترجیحات اتے پاکستان دے زرعی و غذائی برآمدی شعبے وچال موجود مضبوط باہمی ہم آہنگی کوں اڳونہا کیتا ڳیا جو پاکستان دی زرعی و غذائی مصنوعات دی سعودی عرب کیتے برآمدات کوں 3 ارب ڈالر تئیں پڄایا ونڄے جیندے کیتے آندے ݙو سالاں اچ ایں ہدف کوں پورا کرݨ دی کوشش کیتی ویسی۔ ݙوہائیں فریقاں نجی شعبے دے درمیان کاروباری روابط اتے میچ میکنگ کوں سوکھا بݨاوݨ اتے معیار دی سرٹیفکیشن دی باہمی منظوری کیتے اقدامات دی حوصلہ افزائی کیتی۔ سعودی فریق ساوے چارے کوں تجارت اچ وسعت تے طویل المدتی سپلائی پارٹنرشپ دے قیام کیتے ہک امید افزا شعبہ قرار ݙتا، ݙوہائیں ملکاں بھکر، پنجاب اچ پاݨی دے مؤثر استعمال تے مبنی آبپاشی پروگرام دے پہلے مرحلے دی کامیاب تکمیل دا خیرمقدم کیتا تے چھوٹے کاشتکاراں کیتے مجوزہ ݙوجھے مرحلے اچ دلچسپی ݙکھائی، سعودی وفد پاکستان کوں انٹرنیشنل ڈیٹس کونسل اچ شمولیت دی وی ترغیب ݙتی۔ ݙوہائیں فریقاں لائیو سٹاک، ایگری فوڈ پراسیسنگ تے چاول دی ویلیو چین دے شعبیاں اچ پاکستان دے نجی شعبے دی جانب توں پیش کیتیاں ڳیاں سرمایہ کاری تجاویز دا وی جائزہ گھدا تے باہمی تعاون کیتے رابطہ کاری جاری رکھݨ تے اتفاق کیتا۔ سعودی عرب اچ تھیوݨ والی 43ویں سعودی ایگریکلچر نمائش جیڑھی 19 توں 22 اکتوبر 2026ء کوں ریاض اچ تھیسی، اچ شرکت دی دعوت دا خیرمقدم کیتا ڳیا۔ ݙوہائیں فریقاں دورے دے نتائج تے اطمینان کریندے باہمی مفاہمتاں کوں عملی شکل ݙیوݨ کیتے رابطے جاری رکھݨ تے اتفاق کیتے۔