لارڈز ٹیسٹ، محمد عباس انگلینڈ دے خلاف تاریخی اعزاز آپݨے ناویں کر گھدا

لارڈز۔ 30 اگست(اے پی پی)انگلینڈ دے خلاف لارڈز ٹیسٹ دی ݙوجھی اننگز اچ پاکستان دے تجربہ کار فاسٹ باؤلر محمد عباس شاندار باؤلنگ ݙکھیندے 57 رنز ݙے تے 5 انگلش کھلاڑیاں کوں پویلین دی راہ ݙکھائی۔ ایں کارکردگی نال محمد عباس لارڈز دے تاریخی میدان تے ہک اننگز اچ 5 وکٹاں گھنݨ والے 7ویں پاکستانی باؤلر ٻݨ ڳئن۔ سیالکوٹ دے 36 سالہ فاسٹ باؤلر 22 اوورز کرائے، جنھاں اچ 3 میڈن اوورز وی شامل ہن، آپݨی نپی تلی باؤلنگ نال انگلش بلے بازاں کوں اوکھا کیتی رکھیے۔ محمد عباس دے ٹیسٹ کیریئر دا اے 32 واں میچ اے، 57 اننگز اچ اے 8 واں موقع اے ڄݙاں انہاں ہک اننگز اچ 5 یا ایں توں ودھ وکٹاں ڳھدن۔ محمد عباس اپریل 2017ء اچ کنگسٹن، جمیکا اچ ویسٹ انڈیز دے خلاف ٹیسٹ ڈیبیو کیتا ہا۔ او آپݨی نپی تلی اتے عمدہ باؤلنگ پاروں ٹیسٹ کرکٹ اچ نویکلا ناں رکھیندن۔ ہݨ تئیں محمد عباس ٹیسٹ کرکٹ اچ 1121.3 اوورز کرویندے ہوئیں 128 وکٹاں ڳھدن، انہاں دی باؤلنگ اوسط 22.25 رنز فی وکٹ اے۔