وزیرِ اعظم محمد شہباز شریف 31 اگست توں 2 ستمبر تئیں کرغزستان دا ترائے ݙینہوار سرکاری دورہ کریسن

اسلام آباد۔31اگست (اے پی پی) وزیرِ اعظم محمد شہباز شریف کرغزستان دے صدر صادر نورگوزوئیوچ ژاپاروف دی دعوت تے 31 اگست توں 2 ستمبر تئیں کرغزستان دا ترائے ݙینہوار سرکاری دورہ کریسن۔ سنوار کوں وزارتِ خارجہ توں جاری بیان دے مطابق دورے دے دوران وزیرِ اعظم محمد شہباز شریف شنگھائی تعاون تنظیم (ایس سی او) دے سربراہانِ مملکت دی کونسل دے اجلاس اچ شرکت توں علاوہ کرغزستان دے نال ݙو پاسہ ملاقاتاں تے ٻیاں اہم سرگرمیاں اچ شریک تھیسن۔ وزیرِ اعظم دے نال نائب وزیرِ اعظم تے وزیرِ خارجہ سینیٹر محمد اسحاق ڈار، وزیرِ تجارت جام کمال خان، وزیرِ مواصلات عبدالعلیم خان، وزیرِ اطلاعات تے نشریات عطااللہ تارڑ اتے اعلیٰ سرکاری حکام وی ہوسن۔ بشکیک اچ قیام دے دوران وزیرِ اعظم شنگھائی تعاون تنظیم دے سربراہانِ مملکت دی کونسل دے اجلاس تے ایس سی او پلس سربراہی اجلاس اچ شرکت کریسن۔ وزیرِ اعظم 2026-27ء کیتے ایس سی او کونسل آف ہیڈز آف سٹیٹس (سی ایچ ایس) دی پاکستان دی چیئرمین شپ وی سنبھلیسن۔ ایس سی او اجلاساں دے موقع تے وزیرِ اعظم شریک ملکاں دے رہنماواں نال ݙو پاسہ ملاقاتاں وی کریسن۔ وزیرِ اعظم 31 اگست کوں ورلڈ نومیڈ گیمز دی افتتاحی تقریب اچ وی شرکت کریسن۔ 2 ستمبر کوں وزیرِ اعظم محمد شہباز شریف صدر صادر ژاپاروف دے نال پاکستان تے کرغزستان دے تعلقات دے تمام پہلواں تے ݙو پاسہ مذاکرات کریسن۔ ݙوہائیں پاسوں پاکستان تے کرغزستان دے آپسی تعلقات دا مجموعی جائزہ گھدا ویسی اتے ݙو پاسہ تعاون کوں ٻیا ودھاوݨ دے طریقیاں تے ڳالھ مہاڑ کیتی ویسی بالخصوص تجارت و سرمایہ کاری، توانائی، علاقائی رابطہ کاری، تعلیم، سیاحت تے عوامی روابط دے شعبیاں اچ تعاون کوں ٻیا مستحکم کرݨ تے توجہ مرکوز کیتی ویسی۔ ݙوہائیں رہنما آپسی دلچسپی دے علاقائی تے عالمی امور تے علاقائی تے کثیر الجہتی فورمز تے تعاون دے حوالے نال وی ڳالھ مہاڑ کریسن۔ پاکستان تے جمہوریہ کرغزستان وچال گرم جوش تے برادرانہ تعلقات قائم ہن جو مشترکہ تاریخ، مذہبی و ثقافتی وابستگی تے جنوبی تے وسطی ایشیا اچ امن، رابطہ کاری تے خوشحالی دے مشترکہ عزائم تے استوار ہن۔ وزیرِ اعظم دا دورہ حالیہ اعلیٰ سطحی رابطیاں توں پیدا تھیوݨ آلی مثبت پیش رفت کوں ٻیا مستحکم کرݨ، سیاسی خیرسگالی کوں عملی تے مؤثر تعاون اچ تبدیل کرݨ تے پاکستان تے کرغزستان وچال دیرینہ شراکت داری کوں ٻیا مضبوط بݨاوݨ دا ہک اہم موقع فراہم کریسی۔