آئی ایس پی آر پاکستانی فنکاراں دی آواز اچ پاک ترک دوستی دا خصوصی نغمہ جاری کر ݙتا

راولپنڈی۔31اگست (اے پی پی) آئی ایس پی آر پاکستانی فنکاراں دی آواز اچ پاک ترک دوستی دا خصوصی نغمہ جاری کر ݙتا۔ آئی ایس پی آر ترکیہ دے 104ویں یومِ فتح تے منفرد نغمہ “دو دل، ایک جان” جاری کر ݙتے، نغمے اچ پاکستانی فنکاراں اردو تے ترک زبان اچ آواز دا جادو ڄڳا تے پاک ترک تاریخی برادرانہ تعلقات دی عکاسی کیتی اے، نغمے دی موسیقی علی مصطفیٰ تیار کیتی جڈانجو کمپوزیشن کامران اللہ خان تے سامعہ گوہر دی اے، ایں خوبصورت نغمے کوں عثمان رئیس تے ڈاکٹر مبشرہ حفیظ ڳایا اے، نغمے دی منفرد خصوصیت اے جو اردو تے ترک زبان تے روایتی سازاں تے مشتمل ایں دے تمام گائیک تے فنکار پاکستانی ہن، ترک زبان اچ پیش کیتے ڳئے نغمے اچ پاک ترک دوستی، مشترکہ ثقافت تے باہمی محبت دا اظہار وی کیتا ڳئے۔ نغمے اچ رباب، باقلاما (Türkiye’s Bağlama) تے دربوکا (Darbuka) دیاں دھناں توں پاک ترک دوستی دی خوبصورت تصویر پیش کیتی ڳئی اے، اردو تے ترک زبان دے حسین امتزاج تے مشتمل نغمے اچ پاکستان تے ترکیہ دی مشترکہ اقدار کوں وی بھرپور اجاگر کیتا ڳئے، نغمے اچ پاکستان تے ترکیہ دے درمیان لازوال دوستی، بھائی چارے تے محبت دی خوبصورت عکاسی کیتی ڳئی اے۔ نغمے دی ریلیز توں بعد اینکوں ترکیہ دے اہم ڈیجیٹل تے سوشل میڈیا پلیٹ فارمز تے بھرپور پذیرائی ملدی پئی اے۔ ترکیہ دے معروف نشریاتی ادارے ٹی آر ٹی نیٹ ورک سوشل میڈیا تے نغمہ اپ لوڈ کر تے ݙوہائیں ملکاں دے ثقافتی تعلقات کوں اجاگر کیتا۔ ترکیہ دی معروف خبر رساں ایجنسی انادولو مختلف زباناں دے ڈیجیٹل پلیٹ فارمز تے نغمے دی ثقافتی پیشکش کوں سراہیا۔ معروف ترک اخباراں شَفَق تے صباح دے ڈیجیٹل پلیٹ فارمز ویڈیو کوں نمایاں کریندیں ہوئیں پاک ترک ثقافتی امتزاج کوں اجاگر کیتا، یوٹیوب، ایکس، انسٹاگرام تے ٹک ٹاک تے نغمے دے مختصر کلپس، خصوصاً پاک ترک روایتی سازاں دے امتزاج کوں نمایاں پذیرائی ملی۔ “دو دل ایک جان” دی خوبصورت پیشکش پاکستان تے ترکیہ دے مضبوط عوامی، ثقافتی تے برادرانہ رشتے دی عکاس بݨ ڳئی اے۔