قائم مقام صدر سید یوسف رضا گیلانی نال اٹلی دے سفیر دی ملاقات، پاکستان تے اٹلی دے تعلقات کوں ٻیا مضبوط بݨاوݨ دی لوڑھ تے زور

اسلام آباد۔31اگست (اے پی پی) قائم مقام صدر سید یوسف رضا گیلانی پاکستان تے اٹلی دے تعلقات کوں ٻیا مضبوط بݨاوݨ دی لوڑھ تے زور ݙیندیں ہوئیں آکھیا جو ݙوہائیں ملکاں دے درمیان تجارت، سرمایہ کاری، زراعت، افرادی قوت دی نقل و حرکت تے عوامی روابط دے شعبیاں اچ تعاون کوں ٻیا فروغ ݙتا ونڄے۔ سنوار کوں ایوانِ صدر دے پریس ونگ توں جاری بیان دے مطابق قائم مقام صدر اے ڳالھیں انہاں اٹلی دے سفیر یوگو چیئرلاتانی نال ڳالھ مہاڑ کریندیں ہوئیں کیتا جنھاں ایوانِ صدر اچ انھاں نال ملاقات کیتی۔ سید یوسف رضا گیلانی آکھیا جو پاکستان اٹلی دے نال دیرینہ تے دوستانہ تعلقات کوں انتہائی اہمیت ݙیندے جو آپسی احترام تے مختلف شعبیاں اچ ودھدے ہوئے تعاون تے مبنی ہن۔ انہاں سفیر یوگو چیئرلاتانی کوں اسلام آباد اچ اٹلی دے نویں سفارتی مشن دی تکمیل تے وی مبارکباد ݙتی۔ قائم مقام صدر تکنیکی تے پیشہ ورانہ شعبیاں اچ اٹلی دے تعاون کوں سراہیا جیندے اچ فیصل آباد اچ پاکستان-اٹلی ٹیکسٹائل سینٹر تے لاہور اچ فٹ ویئر سینٹر دے قیام سمیت سائنسی تے ماحولیاتی شعبیاں اچ تعاون وی شامل اے۔ قائم مقام صدر اقوامِ متحدہ دی سلامتی کونسل دی 2025-26ء دی مدت کیتے غیر مستقل رکن دے طور تے پاکستان دے انتخاب اچ اٹلی دی حمایت تے شکریہ ادا کیتا۔ اٹلی دے سفیر یوگو چیئرلاتانی جنھاں حال اچ اسلام آباد اچ آپݨی ذمہ واریاں سنبھالین، آکھیا جو انھاں دی سفارتی مدت دے دوران ترجیحات اچ ݙو پاسہ تعلقات کوں مزید بہتر بݨاوݨ تے پاکستان اچ اطالوی سرمایہ کاری اچ اضافہ شامل تھیسی۔ انہاں اکھیا جو انھاں کوں خوشی اے جو انھاں ایجھے ویلھے پاکستان اچ آپݨی سفارتی ذمہ واریاں سنبھالین ڄݙاں پاکستان خطے اچ امن و سلامتی دے ودھارے کیتے اہم کردار ادا کریندا پئے۔ اطالوی سفیر ݙسایا جو اٹلی اچ پاکستانی نژاد تقریباً 3 لکھ لوک رہندے پئن، کم کریندے پئن اتے تعلیم حاصل کریندے پئن جو ݙوہائیں ملکاں وچال مضبوط تعلقات دے ودھارے اچ آپݨا کردار ادا کریندے پئن۔