سماجی شعبے دی ترقی کیتے سرکاری تے نجی شعبے کوں رل تے اڳوں ودھݨا ہوسی،وزیرِ مملکت خزانہ بلال اظہر کیانی

اسلام آباد۔31اگست (اے پی پی) وزیرِمملکت خزانہ و محصولات بلال اظہر کیانی آکھیے جو سماجی شعبے دی ترقی کیتے سرکاری تے نجی شعبے کوں رل تے اڳوں ودھݨا ہوسی، صوبائی سطح تے وسائل دی تلویں سطح تے منتقلی نی تھی سڳی، این ایف سی دے نال نال صوبائی مالیاتی کمیشنز دا انعقاد وی ضروری اے، وسائل تے اختیارات کوں لوکلائز کرݨ نال تلویں سطح تے ٻہوں مسئلے حل تھی سڳدن۔ اتھاں ایس ڈی پی آئی، یونیسیف تے جی آئی زی دے زیراہتمام منعقدہ تقریب توں خطاب کریندے وزیرِمملکت آکھیا جو سماجی شعبے دی ترقی کیتے مربوط مالیاتی نظام ناگزیر ہن، پاکستان دے مستقبل دی ترقی سماجی شعبے اچ سرمایہ کاری نال وابستہ اے، سماجی شعبے دی ترقی کیتے سرکاری تے نجی شعبے کوں رل تے اڳوں ودھݨا ہوسی، ملک اچ سماجی شعبے دی فنانسنگ کیتے جدید تے پائیدار ماڈلز دی لوڑھ اے، ترقی دے ثمرات معاشرے دے معاشی طور تے کمزور طبقے تئیں پڄاوݨ حکومت دی ذمہ واری اے۔ نویں قومی مالیاتی کمیشن دے حوالے نال ڳالھ مہاڑ دا سلسلہ جاری اے، این ایف سی اچ وفاقی یونٹاں دے جتنے نمائندے ہن انشاء اللہ  او کھلے اذہان دے نال مذاکرات دے ذریعے مستقبل دے حوالے نال بہتر انتظامات تے متفق تھیسن۔ وزیرِمملکت آکھیا جو صوبیں محصولات اچ ودھارے کیتے اقدامات کیتن، ایویں طرح وفاقی سطح تے ایف بی آر دی طرفوں وی محصولات اچ ودھارے تے ٹیکس دی بنیاد اچ وسعت کیتے اقدامات دا سلسلہ جاری اے، نان فائلرز کوں ٹیکس نیٹ اچ گھن آیا ویندا پئے۔ وزیرِ مملکت آکھیا جو وسائل تے اتھارٹی کوں لوکلائز کرݨ نال تلویں سطح تے ٻہوں مسئلے حل تھی سڳدن۔ ایں توں مقامی سطح تے محصولات جمع کرݨ اچ وی مدد ملسی، جے اساں وسائل تے اختیارات کوں لوکلائز کریسوں تاں ایں توں اساں بہتر نتیجے گھنسوں