حکومت عوام کوں وقتی ریلیف ݙیوݨ دے نال مستقبل اچ بجلی دیاں قیمتاں تے اضافی ٻوجھ توں وی بچاوݨ دی کوشش کریندی پئی اے، وفاقی وزراء اویس لغاری، علی پرویز ملک

اسلام آباد۔31اگست (اے پی پی) وفاقی وزیرِ توانائی سردار اویس احمد خان لغاری تے وفاقی وزیرِ پٹرولیم علی پرویز ملک آکھیے جو حکومت عوام کوں وقتی ریلیف ݙیوݨ دے نال نال مستقبل اچ بجلی دیاں قیمتاں تے اضافی ٻوجھ توں وی بچاوݨ دی کوشش کریندی پئی اے، حکومت عوام کوں ریلیف ݙیوݨ تے توانائی دی لوڑھ پوری کرݨ کیتے ہر ممکن اقدامات کیتے، علاقائی تے عالمی توانائی بحران پاروں گیس تے آر ایل این جی دی سپلائی کوں پیش آندی مشکلات بجلی دی پیداوار تے طلب پوری کرݨ کیتے چیلنجز پیدا کیتن تاں جو حکومت عوام کوں ریلیف ݙیوݨ، بجلی بہتر بݨاوݨ تے توانائی دی اضافی لاڳت دا ٻوجھ صارفین تے گھٹ توں گھٹ منتقل کرݨ کیتے بھرپور اقدامات کریندی پئی اے، مقامی گیس دی دستیابی ودھاوݨ، اضافی آر ایل این جی دے انتظام تے توانائی شعبے دے اداریں دے سانجھے تعاون نال موجودہ صورتحال تے قابو پاوݨ دیاں کوششاں جاری ہن۔ اے ڳالھ انہاں میڈیا تے آکھی اے۔ میڈیا تے ڳالھ مہاڑ کریندے وفاقی وزیرِ توانائی (پاور ڈویژن) سردار اویس احمد خان لغاری آکھیے جو گیس دی سپلائی اچ کمی پاروں رات دے اوقات اچ بجلی دی طلب پوری کرݨ اچ اوکھ دا سامݨا اے تاں جو حکومت صورتحال تے قابو پاوݨ کیتے ہر ممکن اقدامات کریندی پئی اے۔ وفاقی وزیر آکھیا جو تقریباً 5 ہزار میگاواٹ بجلی گیس نال چلݨ الے پاور پلانٹس پیدا کریندن جیڑھے بالخصوص رات دے اوقات اچ بجلی دی طلب پوری کرݨ اچ اہم کردار ادا کریندن۔ رات ویلھے بجلی دی طلب ودھ تے 20 توں 25 ہزار میگاواٹ تئیں پڄ ویندی اے جئیں پاروں گیس نال چلݨ آلے پلانٹس دی ضرورت مزید ودھ ویندی اے۔ انہاں آکھیا جو اڄوکے سال اپریل اچ لوڈشیڈنگ تقریباً ختم تھی چکی ہئی تاں جو ایں ویلھے ݙو بنیادی وجوہات دی بناء تے بجلی دی پیداوار اچ کمی دا سامݨا اے، ہک پاسوں گیس دی دستیابی اچ کمی آئی جݙاں جو ٻئے پاسوں پن بجلی دی پیداوار وی زرعی شعبے دی پاݨی دی ضرورتاں نال منسلک اے۔ سردار اویس احمد خان لغاری واضح کیتا جو ایں ویلھے ݙینہہ دے اوقات اچ بجلی دی فراہمی اچ حکومت دی طرفوں کوئی کمی نی کیتی ویندی پئی تے نہ ہی گزریل ہک ہفتے دے دوران ݙینہہ دے ویلھے سپلائی اچ کمی تھئی اے۔ انہاں آکھیا جو رات کوں بجلی دی طلب اچ ودھارے پاروں گیس نال چلݨ آلے پلانٹس دے بغیر طلب پوری کرݨ اوکھا تھی ویندے جیندے نتیجے اچ عارضی لوڈشیڈنگ کرݨی پوندی پئی اے۔ وفاقی وزیرآکھیا جو موجودہ صورتحال دی بنیادی وجہ بین الاقوامی سطح تے گیس دی سپلائی تے آر ایل این جی دے مسئلے ہن، حکومت سپاٹ مارکیٹ توں وی گیس گھن سڳدی اے تاں جو ایں صورت اچ موجودہ مہینے دے دوران بجلی دی قیمت تے تقریباً پنج یا چھی روپے فی یونٹ اضافی ٻوجھ پئے سڳدے۔ انہاں آکھیا جو حکومت عوام کوں فوری ریلیف ݙیوݨ دے نال نال مستقبل اچ بجلی دی قیمتاں تے اضافی ٻوجھ توں وی بچاوݨ دی کوشش کریندی پئی اے۔ انہاں آکھیا جو حیدرآباد تے ٻئے علاقیں اچ وی بجلی دی صورتحال تے نظر رکھی ویندی پئی اے، جتھاں بجلی چوری نی تھیندی پئی اتھاں غیر ضروری لوڈشیڈنگ نی کیتی ویندی پئی جݙاں جو بجلی چوری آلے علاقیں اچ طے شدہ شیڈول موجب لوڈشیڈنگ کیتی ویندی پئی اے۔  انہاں وزیرِاعظم، وزارتِ پٹرولیم تے حکومت دی طرفوں عوام کوں یقین ݙوایا جو گیس دا موجودہ مسئلہ تکھے حل کر ڳھدا ویسی۔انہاں امید ظاہر کیتی جو آندے ہک ہفتے دے دوران موسمی حالات پاروں بجلی دی طلب اچ مزید کمی آیسی تے حکومت گیس دی اضافی دستیابی دا وی انتظام کر گھنسی۔ وفاقی وزیر وزارتِ پٹرولیم دا شکریہ ادا کریندے ہوئیں آکھیا جو جتھاں آر ایل این جی دی ضرورت گھٹ تھئی، اتھاں توں مقامی گیس کوں بجلی دے شعبے دے پاسے موڑ تے تعاون کیتا ڳیا جیندے نال بجلی دی قیمت تے گیس دی مہنگائی دے اثرات کوں گھٹ رکھݨ اچ مدد ملی۔ انہاں عوام دے صبر تے برداشت کوں خراجِ تحسین پیش کریندے آکھیا جو حکومت عوام دی مشکلات دا احساس رکھیندی اے تے موجودہ صورتحال توں نکلݨ کیتے بھرپور کوششاں جاری رکھیسی۔ میڈیا نال ڳالھ کریندے وفاقی وزیرِ پٹرولیم علی پرویز ملک آکھیے جو گزریل 6 مہینے دے دوران خطے دی صورتحال پاروں عالمی توانائی منڈیاں اچ سپلائی تے قیمتاں دے حوالے نال شدید چیلنجز سامݨے آئے تاں جو حکومت عوام کوں ریلیف ݙیوݨ تے توانائی دی ضرورتاں پوری کرݨ کیتے ہر ممکن اقدامات کیتے۔ انہاں آکھیا جو علاقائی بحران دے دوران توانائی دی عالمی منڈیاں اچ دستیابی دے مسئلے پیدا تھئے کیوں جو ٻہوں سارے ملک آپݨی ضرورت پوری کرݨ کیتے درآمدات تے مختلف ذرائع تے انحصار کریندن، سپلائی اچ رکاوٹاں دے نال نال قیمتاں اچ ودھارے دنیا اچ حکومتاں، عوام تے کاروباری شعبے دے بجٹ کوں متاثرکیتا۔ علی پرویز ملک آکھیا جو وزیرِاعظم شہباز شریف دی قیادت اچ وفاقی حکومت تقریباً 130 ارب روپے آپݨے وسائل توں استعمال کیتے تاں جو عوام کوں موجودہ اوکھی صورتحال اچ سہارا ݙتا ونڄ سڳے، صوبائی حکومتاں دے نال رل تے کمزور طبقیں کوں وی سپورٹ ݙیوݨ دی کوشش کیتی ڳئی۔ انہاں آکھیا جو حکومت دی بنیادی کوشش خطے اچ مستقل جنگ بندی تے پائیدار امن دے قیام دی اے، کیوں جو ایں صورت اچ موجودہ بحران دا مستقل حل ممکن اے۔ وفاقی وزیر قطر دی طرفوں پاکستان کوں آر ایل این جی ݙیوݨ اچ تعاون تے وی اظہارِ تشکر کیتا۔ انہاں آکھیا جو قطر دی طرفوں عالمی سطح تے آپݨیاں سپلائیز معطل کیتیاں ونڄݨ دے باوجود پاکستان دی درخواست تے چھی توں ست آر ایل این جی کارگوز نسبتاً گھٹ لاڳت تے ݙتے ڳئن۔ انہاں ایران دی طرفوں وی پاکستان دی توانائی ضروریات دے حوالے نال سہولت کاری تے شکریہ ادا کیتا تے آکھیا جو ٻئے دوست ملکاں وی پاکستان دیاں اوکھ کوں ݙیکھدے تعاون کیتا۔ علی پرویز ملک آکھیا جو گرمیاں دے موسم اچ بجلی دی طلب اچ نمایاں ودھارا تھئے جئیں پاروں پاکستان کوں سپاٹ مارکیٹ توں آر ایل این جی سودھے ٻئے توانائی وسائل گھنݨے پئے، کجھ کارگوز معمول دی قیمت توں ݙو ڳنا توں وی زیادہ مہانگے ہن تاں جو حکومت کوشش کیتی جو توانائی دی اضافی لاڳت دا زیادہ ٻوجھ صارفین دے ٹیرف تے منتقل نہ تھیوے۔ انہاں ݙسایا جو موجودہ صورتحال اچ پاکستان کوں ڈالر دے استعمال تے کرنٹ اکاؤنٹ دے دٻاؤ کوں وی مدِ نظر رکھݨا پئے۔ وفاقی وزیر آکھیا جو وزیرِاعظم تے متعلقہ اداریں دے تعاون نال حکومت زرمبادلہ کوں گھٹ رکھݨ دی کوشش کیتی جݙاں جو مقامی گیس کمپنیاں وی پاور ڈویژن کوں گیس ݙیوݨ جاری رکھی، مقامی گیس دی دستیابی نال بجلی پیدا کرݨ تے کھاد دے شعبے کوں مناسب لڳگت تے چلاوݨ اچ مدد ملی۔ علی پرویز ملک آکھیا جو پٹرولیم ڈویژن موجودہ توانائی بحران نال نبڑݨ کیتے پاور ڈویژن دے نال مکمل تعاون جاری رکھیسی، جے ہنگامی بنیاداں تے آر ایل این جی دی اضافی سورسنگ یا کہیں ٻئے پٹرولیم سپورٹ دی لوڑھ پئی تاں عوام کوں ریلیف ݙیوݨ کیتے پٹرولیم ڈویژن آپݨا بھرپور کردار ادا کریسی