چین پاکستان تعاون دے ایکشن پلان تے عملدرآمد دا ہک سال مکمل، وفاقی وزیرِاحسن اقبال دا پیشرفت تے جائزہ اجلاس

اسلام آباد۔31اگست (اے پی پی) وفاقی وزیر منصوبہ بندی، ترقی و خصوصی اقدامات پروفیسر احسن اقبال دی زیرِ صدارت وزیرِاعظم پاکستان دے اگست 2025ء دے دورہِ چین دے دوران طے پاوݨ آلے 2025ء توں 2029ء دے ایکشن پلان تے عملدرآمد دے ہک سال دی تکمیل تے تفصیلی جائزہ اجلاس منعقد تھیا۔ اجلاس توں خطاب کریندے ہوئیں وفاقی وزیراحسن اقبال آکھیا جو پاکستان چین دے تعاون نال مختلف شعبیں اچ استعداد ودھاوݨ تے جدید ٹیکنالوجی توں فیدہ چاوݨ کیتے اقدامات کریندا پئے۔ انہاں آکھیا جو چین دے نال رل تے پاکستان دے آئی ٹی شعبے دی استعداد ودھائی ویندی پئی اے جݙاں جو نوجوان نسل کوں جدید ہنر نال آراستہ کرݨ حکومت دی اہم ترجیح اے۔ احسن اقبال آکھیا جو نوجوان نسل پاکستان دا قیمتی اثاثہ اے، ایں کیتے نوجواناں کوں جدید تے مارکیٹ دیاں ضرورتاں نال ہم آہنگ ہنر دی تربیت یقینی بݨائی ویسی، چین دے تعاون نال تعلیم، آئی ٹی، زراعت، ماحولیات تے ٻئے شعبیں اچ انسانی وسائل دی استعداد ودھاوݨ تے وی خصوصی توجہ ݙتی ویندی پئی اے۔ وفاقی وزیر ݙسایا جو ہک ہزار پاکستانی طالبِ علماً کوں زرعی تربیت کیتے چین بھیجا ڳئے۔ انہاں زرعی شعبے اچ جدید تحقیق، ٹیکنالوجی تے تربیت کیتے چین دے تعاون تے شکریہ ادا کریندے آکھیا جو پاکستان زرعی پیداوار تے برآمدات اچ ودھارے کیتے جدید چینی تجربیں توں فیدہ چیندا پئے۔ انہاں آکھیا جو پاکستان موسمیاتی تبدیلیاں توں شدید متاثرہ ملکاں اچ شامل اے، ایں کیتے چین دے تعاون نال گرین پاکستان دے مختلف منصوبے شروع کیتے ویندے پئن، ماحولیاتی تحفظ، موسمیاتی لچک تے پائیدار ترقی کیتے ݙوہیں ملکاں وچال تعاون کوں مزید وسعت ݙتی ویسی۔ احسن اقبال اُڑان پاکستان پروگرام دا ذکر کریندے آکھیا جو اے پروگرام ملکی معیشت کیتے ٻہوں مفید ثابت تھیندا پئے۔ انہاں آکھیا جو معاشی استحکام کیتے پاکستان کوں آپݨیاں برآمدات اچ ودھارا کرݨا ہوسی تے ملکی مصنوعات کوں عالمی منڈیاں اچ مسابقت دے قابل بݨاوݨا ہوسی۔ وفاقی وزیر آکھیا جو حکومت “میڈ ان پاکستان” کوں عالمی سطح تے ہک مضبوط سنڄاݨ بݨاوݨ کیتے اقدامات کریندی پئی اے۔ انہاں ایں عزم دا اظہار کیتا جو چین پاکستان اقتصادی تعاون کوں صنعتی ترقی، برآمدات، زراعت، آئی ٹی، نوجواناں دی تربیت تے ماحول دوست ترقی دے نال مزید مربوط کیتا ویسی۔ اجلاس اچ 2025ء توں 2029ء دے ایکشن پلان دے تحت مختلف شعبیں اچ تھیوݨ آلی پیشرفت، آندے اہداف تے منصوبیں تے عملدرآمد کوں مزید تکھا کرݨ دے حوالے نال وی تفصیلی غور کیتا ڳیا