ڈاکٹر غلام علی ملاح دا آئی بی سی سی کراچی دفتردا دورہ

کراچی 31 اگست (اے پی پی) انٹر بورڈز کوآرڈینیشن کمیشن (IBCC) دے ایگزیکٹو ڈائریکٹر ڈاکٹر غلام علی ملاح آئی بی سی سی دے کراچی ریجنل دفتر دا دورہ کیتا۔ ایں موقع تے ڈائریکٹر جنرل آئی بی سی سی عثمان خان وی انھاں دے نال ہن۔ ڈاکٹر ملاح افسران تے عملے نال ملاقات کیتی تے طالبِ علماں تے عوام کوں بہتر سہولتاں ݙیوݨ کیتے انھاں دی محنت، پیشہ ورانہ صلاحیت تے عزم دی تعریف کیتی۔ کراچی دفترپُڄݨ تے اعجاز احسن تے انھاں دی ٹیم ایگزیکٹو ڈائریکٹر دا پرتپاک استقبال کیتا۔ ایں موقع تے افسران تے عملے ڈاکٹر غلام علی ملاح کوں حکومتِ پاکستان دی طرفوں تمغۂ امتیاز عطا کیتے ونڄݨ دے اعلان تے مبارخ ݙتی۔ ڈاکٹر ملاح ٹیم دی محبت تے نیک تمناواں تے شکریہ ادا کریندے آکھیا جو اے قومی اعزاز کہیں ہک فرد دی کامیابی نی بلکہ آئی بی سی سی دی پوری ٹیم دیاں سانجھیاں کوششاں، محنت تے وزارتِ وفاقی تعلیم و پیشہ ورانہ تربیت دی مسلسل سرپرستی، رہنمائی تے اعتماد دا نتیجہ اے۔ انہاں آکھیا جو آئی بی سی سی اچ ڈیجیٹلائزیشن، عوامی سہولت کاری، خدمات دی بہتری تے امتحانی و اسیسمنٹ نظام اچ اصلاحات جیھے اقدامات ادارے دے افسران تے ملازمین دی اجتماعی محنت نال ممکن تھئن۔ ڈاکٹر ملاح کراچی دفتر دی ٹیم تے زور ݙتا جو او ایں جذبے، دیانت داری تے پیشہ ورانہ لگن دے نال طالبِ علماں تے عوام دی خدمت جاری رکھے۔ انہاں آکھیا جو آئی بی سی سی دی اصل طاقت ایں دی ٹیم تے عوام کوں مؤثر، شفاف تے وقتی خدمات ݙیوݨ دا عزم اے۔