دہشت گردی کوں ایندی تمام اقسام تے مظاہر بشمول ریاستی دہشت گردی، قابلِ مذمت قرار ݙتا ونڄݨاں چاہیدے، وزیرِ اعظم شہباز شریف دا ایس سی او پلس اجلاس توں خطاب

بشکیک۔1ستمبر (اے پی پی) وزیرِ اعظم محمد شہباز شریف ایس سی او دی حقیقی صلاحیتاں کوں استعمال کرݨ کیتے پاکستان دے پختہ عزم تے عہد دا اعادہ کریندیں ہوئیں آکھیا جو دہشت گردی ایس سی او ملکاں کیتے مشترکہ خطرہ اے، دہشت گردی کوں ایندی تمام اقسام تے مظاہر بشمول ریاستی دہشت گردی، واضح تے غیر مبہم الفاظ اچ قابلِ مذمت قرار ݙتا ونڄݨاں چاہیدے، پاکستان عالمی امن دی کوششاں اچ فعال کردار ادا کریندا پئے، مکہ مشترکہ دفاعی معاہدہ اتحاد تے مشترکہ عزم دا واضح سنیھا اے، عالمی برادری کوں بے گناہ فلسطینی عوام دی تکالیف دے خاتمے تے انھاں دے ناقابلِ تنسیخ حقِ خودارادیت دے تحفظ کیتے فیصلہ کن اقدامات کرݨے پوسن، آبی وسائل بارے معاہدیاں دا مکمل احترام کیتا ونڄݨاں چاہیدے۔ اے ڳالھیں انہاں منگل کوں اتھاں شنگھائی تعاون تنظیم دے ایس سی او پلس اجلاس توں خطاب کریندیں ہوئیں کیتا۔ وزیرِ اعظم اکھیا جو انھاں کیتے اے وݙے اعزاز دی ڳالھ اے جو انھاں کوں شنگھائی تعاون تنظیم دے ایس سی او پلس دے دوستاں تے شراکت داراں دے اجتماع توں خطاب دا موقع ملیے، شنگھائی تعاون تنظیم اچ ودھدی ہوئی دلچسپی دا مشاہدہ یقیناً حوصلہ افزا اے جو ایں اہم علاقائی فورم دے ودھدے ہوئیں اثر و رسوخ تے اہمیت دا ثبوت اے۔ انہاں اکھیا جو دنیا ایں ویلھے بے مثال ہنگامہ خیزی تے تبدیلی دے دور توں گزردی پئی اے، 80 ورھیں پہلے اقوامِ متحدہ دا قیام ایں عالمگیر خواب کوں حقیقت بݨاوݨ کیتے عمل اچ آندا ڳیا ہا جو تمام جنگاں تے تنازعات دا خاتمہ تھیوے تے پائیدار امن قائم کیتا ونڄ سڳے۔ انھاں اٹھ ݙہاکیاں دے دوران پاکستان اقوامِ متحدہ دے چارٹر کیتے مکمل طور تے پرعزم تے کاربند رہیے، اساں ایں کوں ہک ایہوجہے موقعے دے طور تے ݙیکھدوں جیندے ذریعے زیادہ مساوی، جمہوری تے منصفانہ بین الاقوامی نظام تشکیل ݙتا ونڄ سڳدے جڈانجو اڄ اقوامِ متحدہ کوں فوری طور تے اصلاحات دی ضرورت اے، اینکوں زیادہ جوابدہ تے حالات دے تقاضیاں دے مطابق موثر بݨݨاں ہوسی۔ وزیرِ اعظم اکھیا جو اقوامِ متحدہ دی سلامتی کونسل دے غیر مستقل رکن دی حیثیت نال پاکستان گزریل ݙو ورھیاں دے دوران عالمی سطح تے قیامِ امن دی کوششاں اچ فعال کردار ادا کریندا رہیے، اساݙی امن کوششاں اسلام آباد مفاہمتی یادداشت تے دستخط دے نال آپݨے اہم مرحلے کوں پڄیاں اے خلیجی خطے اچ جاری تنازعے دے خاتمے کیتے سبھ توں ودھ قابلِ عمل تے دیرپا راستہ اے اتے تمام فریقاں کیتے مذاکرات تے سفارت کاری دے ذریعے امن دے حصول دی ہک وسیع طور تے قابلِ قبول بنیاد اے۔ وزیرِ آعظم اکھیا جو پاکستان مکہ مشترکہ دفاعی معاہدے دا وی دستخط کنندہ اے جیندے اتحاد تے مشترکہ عزم دا واضح سنیھا ݙے تے خطے اچ امن دے امکانات کوں ٻیا مضبوط کیتے اتے نال ای خطے اچ ترقی تے خوشحالی دے فروغ دی راہ ہموار کیتی اے۔ انہاں اکھیا جو غزہ تے مغربی کنارے دی صورتحال بدستور انتہائی تشویشناک اے، عالمی برادری کوں بے گناہ فلسطینی عوام دی تکالیف دے خاتمے تے انھاں دے ناقابلِ تنسیخ حقِ خودارادیت دے تحفظ کیتے فیصلہ کن اقدامات کرݨے پوسن، ایہے حقوق ٻیاں تمام مظلوم اقوام کوں وی ݙتے ونڄݨے چاہیدن۔ وزیرِ اعظم آکھیا جو پاݨی اساݙے خطے دی شہ رگ اے جو لکھاں انساناں دی زندگیاں دا سہارا اے اساݙی زمیناں کوں سیراب کریندے اتے اساݙیاں آوݨ آلی نسلاں دے مستقبل کوں محفوظ بݨیندے پاݨی کوں کݙاہیں ہتھیار دے طور تے استعمال نئی کیتا ونڄݨاں چاہیدا اتے نہ ای اینکوں سیاسی دباؤ پاوݨ کیتے استعمال کیتا ونڄݨاں چاہیدے۔وزیرِ اعظم آکھیا جو دہشت گردی اساݙے رکن ملکاں اتے درحقیقت اتھاں “ایس سی او پلس” اچ نمائندگی رکھݨ آلے ٻیاں ملکاں کیتے وی ہک مشترکہ خطرہ اے، اساں علاقائی انسدادِ دہشت گردی ڈھانچے دے تحت آپݨے مشترکہ اہداف کوں اڳوں ودھاوݨ کیتے مکمل طور تے پرعزم ہیسے جنھاں اچ ترائے برائیاں “دہشت گردی، علیحدگی پسندی تے مذہبی انتہا پسندی” نال نبڑݨ شامل اے، پاکستان دہشت گردی دی لعنت دا بہادری تے ثابت قدمی نال مقابلہ تے اینکوں شکست ݙیوݨ دا سلسلہ جاری رکھیسی، 90 ہزار توں ودھ قیمتی جاناں دی قربانی تے 150 ارب ڈالر دے معاشی نقصانات دے باوجود اساݙی قوم دہشت گردی دے خلاف نہ صرف آپݨے کیتے بلکہ پوری دنیا کیتے وی پرعزم اتے ثابت قدم تھی تے جدوجہد کیتی اے۔ وزیرِ اعظم آکھیا جو جیویں ای پاکستان شنگھائی تعاون تنظیم (ایس سی او) دی سربراہی سنبھلیندا پئے، اساں ایں پختہ یقین دے نال آپݨی ذمہ واریاں نبھیسوں جو ایس سی او کوں آپݨے عوام کیتے ٹھوس تے عملی فائدے فراہم کرݨے چاہیدن۔ وزیرِ اعظم آکھیا جو آئندہ ہک سال دے دوران اساں انفارمیشن ٹیکنالوجی تے مصنوعی ذہانت، توانائی، ترقی تے غربت دے خاتمے، آفات نال نبڑݨ، صحت، ثقافت تے کھیݙاں دے شعبیاں کوں ترجیح ݙیسوں۔ وزیرِ اعظم ایس سی او دی حقیقی صلاحیتاں کوں استعمال کرݨ کیتے پاکستان دے پختہ عزم تے عہد دا اعادہ کریندیں ہوئیں آکھیا جو ایس سی او کوں ٻیا عظیم بلندیاں تئیں گھن ونڄݨ دی آپݨی کوششاں اچ اساں ایں مقصد کیتے ایس سی او دے رکن ملکاں تے آپݨے قابلِ قدر ایس سی او پلس خاندان دے بھرپور تے مخلصانہ تعاون دے خواہاں ہیسے۔ وزیرِ اعظم شنگھائی تعاون تنظیم دے رہنمائاں کوں 2027ء اچ اسلام آباد اچ ایس سی او پلس اجلاس دے آئندہ ایڈیشن اچ شرکت دی دعوت وی ݙتی۔