پاکستان ایس سی او دی چیئرمین شپ “وژن کوں عمل اچ بدلݨ، رابطہ کاری، جدت تے مشترکہ خوشحالی” دے عنوان تحت انجام ݙیسی، وزیرِاعظم شہباز شریف

بشکیک۔1ستمبر (اے پی پی) وزیرِاعظم محمد شہباز شریف آکھیے جو ایس سی او ترقی تے مضبوطی دیاں نویاں منازل طے کریندی رہسی تے آپݨے ترائے ارب توں ودھ عوام دی زندگیاں اچ بامعنی تے مثبت بہتری گھن آسی۔ سماجی رابطے دی ویب سائٹ ایکس تے ہک بیان اچ وزیرِاعظم آکھیا جو انہاں کوں ایں ڳالھ تے ماݨ اے جو پاکستان دی طرفوں 2027 کیتے شنگھائی تعاون تنظیم (ایس سی او) دی چیئرمین شپ سنبھالݨ دے موقع تے انہاں کوں بشکیک اچ ایس سی او کونسل آف ہیڈز آف سٹیٹ دے اجلاس توں خطاب دا اعزاز حاصل تھیا۔ انہاں کامیاب سربراہ اجلاس دے انعقاد تے تنظیم دی منفرد انداز اچ قیادت کرݨ تے کرغز جمہوریہ کوں مبارخ ݙتی۔ انہاں آکھیا جو شنگھائی سپرٹ دی رہنمائی اچ ایس سی او چھیکڑی 25 سالاں دے دوران علاقائی تعاون دے ہک اہم فورم دے طور تے ابھری اے۔ وزیرِاعظم دہشت گردی دے خلاف جنگ اچ پاکستان دیاں بے پناہ قربانیاں دا ذکر کریندے ایں ڳالھ دا اعادہ کیتا جو دہشت گردی دی ہر شکل تے ہر صورت اچ مذمت کیتی ونڄݨی چاہیدی اے۔ وزیراعظم آکھیے جو انہاں ایس سی او ملکاں کوں اے وی یاد ݙیوائے جو پاݨی ساݙے خطے دی شہ رڳ اے اینکوں کݙاہیں ہتھیار دے طور تے استعمال نی کیتا ونڄݨا چاہیدا تے سانجھے آبی وسائل متعلق معاہدیں دی روح موجب پاسداری کیتی ونڄݨی چاہیدی اے۔ وزیرِاعظم آکھیا جو پاکستان آپݨی چیئرمین شپ “وژن کوں عمل اچ بدلݨ، رابطہ کاری، جدت تے مشترکہ خوشحالی” دے عنوان تحت انجام ݙیسی۔ انہاں آکھیا جو انہاں کوں یقین اے جو ایس سی او ترقی تے مضبوطی دیاں نویاں منازل طے کریندی رہسی تے آپݨے ترائے ارب توں ودھ عوام دی زندگیاں اچ بامعنی تے مثبت بہتری گھن آسی۔