سکیورٹی فورسز دی چاغی تے پشین اچ مختلف واقعات اچ جوابی کارروائی، بھارتی حمایت یافتہ فتنہ الہندوستان تے فتنہ الخوارج دے 21 دہشت گرد جہنم واصل، آئی ایس پی آر

راولپنڈی۔1ستمبر (اے پی پی) سکیورٹی فورسز صوبہ بلوچستان دے اضلاع چاغی تے پشین اچ مختلف واقعات اچ جوابی کارروائی دے دوران بھارتی حمایت یافتہ فتنہ الہندوستان تے فتنہ الخوارج نال تعلق رکھݨ آلے 21 دہشت گرداں کوں جہنم واصل کرݙتا۔ پاک فوج دے شعبہ تعلقاتِ عامہ (آئی ایس پی آر) توں جاری بیان موجب 31 اگست تے یکم ستمبر دی وچلی رات ضلع چاغی دے علاقے نوکچا تے ضلع پشین دے علاقے زیارت کراس اچ پیش آوݨ آلے مختلف واقعات دے دوران سکیورٹی فورسز دی مؤثر جوابی کارروائی دے نتیجے اچ ‘فتنہ الہندوستان’ تے ‘فتنہ الخوارج’ دے بھارتی پراکسیز نال تعلق رکھݨ آلے 21 دہشت گرد جہنم واصل کر ݙتے ڳئن۔ 31 اگست کوں ‘فتنہ الہندوستان’ نال تعلق رکھݨ آلے دہشت گردں بھتہ خوری کیتے غیر قانونی چوکی قائم کرتے این-40 کوئٹہ-تفتان ہائی وے تے مسافراں دی پرامن آونڄ اچ خلل پاوݨ دی کوشش کیتی۔ سکیورٹی فورسز تکھے ردِعمل ظاہر کیتا تے شدید فائرنگ دے تبادلے توں بعد 11 دہشت گرداں کوں موقع تے ہی ہلاک کرݙتا۔ دہشت گرداں دے قبضے توں وݙی مقدار اچ اسلحہ، گولہ بارود تے دھماکہ خیز مواد وی برآمد کیتا ڳئے۔ 31 اگست تے یکم ستمبر وچلی رات، ‘فتنہ الخوارج’ نال تعلق رکھݨ آلے دہشت گردں کسٹمز ہاؤس اچ آوݨ دی کوشش اچ ہک مربوط حملہ کیتا۔ سکیورٹی فورسز مؤثر جوابی کارروائی کیتی تے شدید فائرنگ دے تبادلے توں بعد 10 دہشت گرداں کوں ہلاک کر ݙتا۔ ایں توں انڄ فرار تھیوݨ آلے دہشت گرداں دا وی سکیورٹی فورسز تعاقب کیتا تے انھاں کوں مزید جانی نقصان پُڄایا۔ کسٹمز ہاؤس تے حملہ دہشت گردی تے جرائم دے گٹھ جوڑ دا مظہر ہئی جیندا مقصد کسٹمز حکام کوں انھاں دے قانونی فرائض دی ادائیگی توں روکݨ تے ایں طرح علاقے اچ مجرمانہ سرگرمیاں دے تسلسل کوں ممکن بݨاوݨ ہئی تاں جو فائرنگ دے تبادلے دے دوران وطن دے چھی بہادر سپوتاں فرض دی ادائیگی دے دوران آپݨی جان دا نذرانہ پیش کیتا تے شہادت دا رتبہ پاتا جنھاں اچ ݙو افسران تے کسٹمز ڈیپارٹمنٹ دا ہک سرکاری اہلکار شامل ہن۔ نواحی علاقیں اچ ‘سینیٹائزیشن آپریشنز’ جاری ہن تاں جو کہیں وی باقی ماندہ دہشت گرد دا خاتمہ کیتا ونڄ سڳے تے مقامی آبادی دے نال نال اہم قومی شاہراہواں دے تحفظ تے سلامتی کوں یقینی بݨایا ونڄ سڳے۔ نیشنل ایکشن پلان تے وفاقی ایپکس کمیٹی دی طرفوں منظور شدہ “عزمِ استحکام” دے وژن دے تحت دہشت گردی دے خلاف جاری مسلسل مہم پورے عزم و استقلال دے نال جاری رہسی۔ آئی ایس پی آر آکھیے جو سکیورٹی فورسز تے قانون نافذ کرݨ آلے ادارے ملک توں غیر ملکی سرپرستی تے حمایت یافتہ دہشت گردی دی لعنت دے خاتمے کیتے پرعزم ہن۔