پاکستان “ڈیجیٹل نیشن پاکستان ایکٹ” دی قانون سازی دے ذریعے آپݨی ڈیجیٹل تبدیلی کوں مستحکم کیتے، شزہ فاطمہ خواجہ دا لیپ کانفرنس توں خطاب

ریاض۔1ستمبر (اے پی پی) وفاقی وزیر انفارمیشن ٹیکنالوجی و ٹیلی کمیونیکیشن شزہ فاطمہ خواجہ ایں ڳالھ تے زور ݙتے جو پاکستان “ڈیجیٹل نیشن پاکستان ایکٹ” دی قانون سازی دے ذریعے آپݨی ڈیجیٹل تبدیلی کوں مستحکم کیتے، ادارہ جاتی ملکیت کوں یقینی بݨاوݨ کیتے “نیشنل ڈیجیٹل کمیشن” تے “پاکستان ڈیجیٹل اتھارٹی” قائم کیتی ڳئی اے۔ اے ڳالھ انہاں اتھاں منعقدہ “لیپ 2026” کانفرنس اچ “اساں ڈیجیٹل قوم کیویں بݨائی” دے عنوان نال خطاب کریندے آکھی۔ ایں موقع تے وفاقی وزیر”ٹیک ڈسٹینیشن پاکستان پویلین” دا باقاعدہ افتتاح وی کیتا۔آپݨے کلیدی خطاب اچ وفاقی وزیر شزہ فاطمہ خواجہ ایں ڳالھ تے زور ݙتا جو پاکستان “ڈیجیٹل نیشن پاکستان ایکٹ” دی قانون سازی دے ذریعے آپݨی ڈیجیٹل تبدیلی کوں مستحکم کیتے، ایندے تحت ادارہ جاتی ملکیت کوں یقینی بݨاوݨ کیتے “نیشنل ڈیجیٹل کمیشن” تے “پاکستان ڈیجیٹل اتھارٹی” بݨائی ڳئی اے۔ انہاں مزید آکھیا جو ایں قانونی بنیاد کوں کنکٹیویٹی تے مسابقت اچ سرمایہ کاری دے ذریعے تقویت ݙتی ڳئی اے جیندے اچ سپیکٹرم (فائیو جی) دی ساریں توں وݙی نیلامی، خصوصی ٹیکنالوجی زونز دا قیام تے آئی ٹی انڈسٹری کیتے ٹیکساں اچ کمی شامل اے۔شزہ فاطمہ خواجہ آکھیا جو ڈیجیٹل تبدیلی دا اے سفر وزیرِاعظم محمد شہباز شریف دے وژن دی رہنمائی اچ تے خصوصی سرمایہ کاری سہولت کونسل (ایس آئی ایف سی) دے تعاون نال جاری اے جیندی صدارت وزیرِاعظم محمد شہباز شریف تے چیف آف آرمی سٹاف و چیف آف ڈیفنس فورسز فیلڈ مارشل سید عاصم منیر کریندے پئن ڄݙاں جو ایندے اچ سارے صوبائی وزرائے اعلیٰ وی شریک ہن۔ پاکستان دے ڈیجیٹل سفر دے تجربے و نکات شیئر کریندے وفاقی وزیر آکھیا جو حکومتاں ٹھوس پالیسی سازی تے مضبوط اداریں دے ذریعے پیش رفت کریندن جیندے نال ایہوجیہا سازگار ماحول پیدا تھیندے جیندے اچ نجی شعبہ معاشی ترقی دی قیادت کرسڳدے۔آپݨے خطاب دے اختتام تے وفاقی وزیر سعودی عرب دے نال شراکت داری کوں مزید تکڑا بݨاوݨ دے عزم دا اعادہ کیتا تے ایں اعتماد دا اظہار کیتا جو ڈیجیٹل جدت، صلاحیتاں اچ ودھارے تے جدید ٹیکنالوجیز اچ مسلسل تعاون نال ݙوہیں ملکاں کیتے مشترکہ ترقی تے خوشحالی دے نویں رستے کھلسن۔ایندے توں پہلے ݙینھ دے آغاز اچ وفاقی وزیر “ٹیک ڈسٹینیشن پاکستان پویلین” دا باقاعدہ افتتاح کیتا جیندے اچ 25 سٹارٹ اپس تے 50 معروف پاکستانی ٹیکنالوجی کمپنیاں اے آئی، آٹومیشن تے ڈیجیٹل ٹیکنالوجیز اچ آپݨے جدید حل پیش کریندیاں پئن۔