وزیرِ داخلہ محسن نقوی دا بلوچستان اچ کامیاب آپریشنز تے فورسز کوں خراجِ تحسین

اسلام آباد۔1ستمبر (اے پی پی) وفاقی وزیرِ داخلہ محسن نقوی بلوچستان اچ “آپریشن رد الفتنہ 3” دے تحت فتنہ الہندوستان تے فتنہ الخوارج دے دہشت گردں دے خلاف کامیاب کارروائیاں تے سکیورٹی فورسز کوں زبردست خراجِ تحسین پیش کیتے۔ وزیرِ داخلہ محسن نقوی نوکچہ (چاغی) تے زیارت کراس (پشین) اچ 21 دہشت گرداں کوں جہنم واصل کرݨ تے سکیورٹی فورسز دیاں پیشہ ورانہ صلاحیتاں دی تعریف کیتی۔ انہاں فرض دی راہ اچ جامِ شہادت نوش کرݨ آلے کسٹمز افسراں سودھے وطن دے 6 بہادر سپوتاں کوں زبردست خراجِ عقیدت پیش کریندے آکھیا جو شہداء آپݨیاں جاناں دا نذرانہ ݙے تے کسٹمز ہائوس تے حملہ ناکام بݨائے۔ محسن نقوی دا آکھݨ ہئی جو شہداء دی اے عظیم قربانیاں دہشت گردی دے خلاف قوم دے پختہ عزم دا واضح ثبوت ہن، سکیورٹی فورسز بلوچستان اچ قیامِ امن کیتے مکمل پرعزم ہن تے دہشت گرداں دے مذموم عزائم مٹی اچ رلاوݨ آلے فورسز دے بہادر جواناں کوں پوری قوم سلام پیش کریندی اے۔ وفاقی وزیرِ داخلہ آکھیا جو دہشت گردں تے انھاں دے سہولت کاراں دا مکمل خاتمہ پوری قوم دی آواز اے تے پوری قوم ایں ناسور دے خاتمے کیتے آپݨی سکیورٹی فورسز دے رلے کھڑی اے۔