وزیرِاعظم محمد شہباز شریف دی ایس سی او سربراہانِ مملکت کونسل دے اجلاس دے موقع تے بیلاروس دے صدر نال ملاقات، مختلف شعبیں اچ تعاون مزید مستحکم کرݨ تے اتفاق

بشکیک۔1ستمبر (اے پی پی) وزیرِاعظم محمد شہباز شریف تے بیلاروس دے صدرالیگزینڈر لوکاشینکو ݙوہیں ملکاں وچال تجارت، صنعت، زراعت، انفارمیشن ٹیکنالوجی تے فنی تربیت دے شعبیں اچ ݙوطرفہ تعاون مزید مستحکم کرݨ تے اتفاق کیتے۔ وزیرِاعظم دفتردے میڈیا ونگ توں جاری بیان موجب وزیرِاعظم محمد شہباز شریف بشکیک اچ شنگھائی تعاون تنظیم (ایس سی او) دے سربراہانِ مملکت دی کونسل دے اجلاس دے موقع تے جمہوریہ بیلاروس دے صدر عالی الیگزینڈر لوکاشینکو نال ملاقات کیتی۔ ݙوہیں رہنماواں پاکستان تے بیلاروس دے تعلقات اچ مثبت پیش رفت تے سیاسی، تجارتی، اقتصادی، دفاعی تے ثقافتی شعبیں اچ مضبوط تعاون تے اطمینان دا اظہار کیتا۔ ݙوہیں رہنماواں نومبر 2024ء اچ صدر لوکاشینکو دے تاریخی دورہِ پاکستان تے ایندے توں بعد اپریل 2025ء اچ وزیراعظم دے بیلاروس دے یادگار دورے دا ذکر کریندے تجارت، صنعت، زراعت، انفارمیشن ٹیکنالوجی تے فنی تربیت کوں ترجیحی شعبیں دے طور تے ݙوطرفہ تعاون مزید مستحکم کرݨ تے اتفاق کیتا۔ وزیرِاعظم شنگھائی تعاون تنظیم دے سربراہانِ مملکت دی کونسل دے آندی چیئرمین دی حیثیت نال بیلاروس دے صدر کوں آندے سال پاکستان دا دورہ کرݨ دی دعوت ݙتی۔ ݙوہیں رہنماواں پاکستان تے بیلاروس وچال پراݨے دوستانہ تعلقات کوں ٻئیا ودھاوݨ کیتے آپݨے سانجھے عزم تے پختہ ارادے دا اعادہ کیتا۔