صدرِ مملکت دی ویت نام دی حکومت تے عوام کوں 81 ویں قومی ݙینھ تے مبارکباد

اسلام آباد۔2ستمبر (اے پی پی) صدرِ مملکت آصف علی زرداری ویت نام دے صدر ٹو لام، حکومت تے ویت نام دے عوام کوں 81 ویں قومی ݙینھ دے موقعے تے دلی مبارکباد پیش کیتی اے۔ بدھ کوں ایوانِ صدر دے پریس وِنگ دے مطابق صدرِ مملکت آپݨے تہنیتی خط اچ آکھیا جو 1945ء اچ آزادی حاصل کرݨ دے بعدوں ویت نام متعدد چیلنجاں تے قابو پاتے اتے سیاسی، معاشی تے سماجی شعبیاں اچ نمایاں پیش رفت کیتی اے۔ انہاں آکھیا جو پاکستان ویت نام دے نال آپݨے خوشگوار تے دوستانہ تعلقات کوں انتہائی قدر دی نگاہ نال ڈیکھدے اتے ݙوہیں ملکاں دے آپسی مفاد کیتے ݙوپاسہ تعاون کوں ٻیا مضبوط بݨاوݨ تے ایندی مکمل صلاحیت توں فیدہ چاوݨ کیتے پرعزم اے۔ صدر آصف علی زرداری آکھیا جو پاکستان تے ویت نام آندے سال سفارتی تعلقات دے قیام دی 55 ویں سالڳرہ منیسن۔ ایں اہم سنگِ میل دے موقعے تے صدرِ مملکت صدر ٹو لام کوں پاکستان دے دورے دی دعوت وی ݙتی تانجو ایں اہم موقعے کوں رَل تے یادگار بݨایا ونڄ سڳے اتے ݙوہیں ملکاں وچال دوستی کوں ٻیا مضبوط بݨایا ونڄ سڳے۔