تراہیں مسلح افواج وچال ٻیا موثر انضمام، حالات دے مطابق آپݨے آپ کوں ڈھالݨ دی صلاحیت تے زمینی تے معلوماتی شعبیاں اچ مؤثریت ضروری اے، ایڈمرل نوید اشرف

راولپنڈی۔2ستمبر (اے پی پی) پاک بحریہ دے سربراہ ایڈمرل نوید اشرف آکھیا جو بدلدے ہوئے سکیورٹی ماحول اچ غیر متزلزل تیاری، تراہیں مسلح افواج وچال ٻیا موثر انضمام، حالات دے مطابق آپݨے آپ کوں ڈھالݨ دی صلاحیت تے زمینی تے معلوماتی شعبیاں اچ مؤثریت ضروری اے۔ بدھ کوں پاک فوج دے شعبہ تعلقات عامہ آئی ایس پی آر توں جاری بیان دے مطابق پاکستان نیوی دی کراچی اچ میجر میری ٹائم ایکسرسائز سی سپارک-2026 شروع تھی ڳئی اے، جیندے نال پاک بحریہ آپݨی جنگی تیاری تے آپریشنل صلاحیت دا بھرپور مظاہرہ کیتا۔ چیف آف دی نیول اسٹاف ایڈمرل نوید اشرف مشق دی افتتاحی بریفنگ دی صدارت کیتی، جݙاں جو پاک افواج دے مختلف شعبیاں دے سینئر افسراں وی انہاں دے نال موجود ہن۔ مشق دے دوران پاکستان نیوی دی روایتی تے ابھردے ہوئے بحری خطراں دے خلاف جنگی تیاری کوں سخت جانچ دے عمل توں گزاریا ویندا پئے۔ مشق اچ بحری جہازاں، آبدوزاں، طیاریاں، بغیر پائلٹ نظام، میرینز، سپیشل فورسز سمیت پاک فوج تے پاک فضائیہ دے مشترکہ وسائل کوں مربوط کیتا ڳئے۔ ایں توں پہلے چیف آف دی نیول سٹاف پاک بحریہ دے فلیٹ یونٹس دا دورہ کیتا اتے جاری آپریشنز دا جائزہ گھدا۔ افسراں تے جواناں نال خطاب کریندیں ہوئیں انہاں آکھیا جو بدلدے ہوئے سکیورٹی ماحول اچ غیر متزلزل تیاری، تراہیں مسلح افواج دے وچال ٻیا موثر انضمام، حالات دے مطابق آپݨے آپ کوں ڈھالݨ دی صلاحیت تے زمینی تے معلوماتی شعبیاں اچ مؤثریت ضروری اے۔ مشق سی اسپارک-2026 دا مقصد ملٹی ڈومین آپریشنز دی مشق کرݨ اے، جیندے اچ سمندری، فضائی، زمینی، سائبر تے خلائی معاون صلاحیتاں کوں مربوط کیتا ویندا پئے۔ ایں دے نال نال انفارمیشن انوائرنمنٹ اچ آپریشنز تے وی توجہ مرکوز کیتی ویندی پئی اے، تاکہ سمندر اچ جاری فعال کارروائیاں دے نال ہم آہنگی برقرار رکھیندیں ہوئیں معلوماتی جنگ دے میدان اچ فیصلہ کن برتری حاصل کیتی ونڄ سڳے۔