پی ڈی ایم اے دا صوبے اچ ٻئے ساوݨ مینھ دے حوالے نال الرٹ جاری

لاہور۔2ستمبر (اے پی پی) پی ڈی ایم اے صوبے اچ ٻیا ساوݨ مینھ وسݨ دے حوالے نال الرٹ جاری کرݙتے۔ ترجمان پی ڈی ایم اے موجب 3 توں 5 ستمبر تئیں صوبے دے اضلاع راولپنڈی، مری، گلیات، جہلم، چکوال، تلہ گنگ، اٹک، سیالکوٹ، نارووال، منڈی بہاؤالدین، گجرات، گوجرانوالہ، حافظ آباد، وزیر آباد، لاہور، قصور تے اوکاڑہ اچ مینھ وسݨ دا امکان اے جݙاں جو 4 توں 5 ستمبر دے دوران فیصل آباد، جھنگ، ٹوبہ ٹیک سنگھ، لیہ، بھکر، ساہیوال، پاکپتن، بہاولنگر، بہاولپور تے ڈیرہ غازی خان اچ وی مینھ وسݨ دا امکان اے۔ترجمان موجب لاہور، راولپنڈی، گوجرانوالہ تے فیصل آباد اچ اربن فلڈنگ دا ݙر اے، جݙاں جو مری، گلیات تے ٻئے پہاڑی علاقیں اچ لینڈ سلائیڈنگ دا خطرہ موجود اے۔ ڈی جی پی ڈی ایم اے محمد سیف انور جپہ آکھیے جو وزیراعلیٰ پنجاب دی ہدایات تے صوبے دے کمشنرز تے ڈپٹی کمشنرز کوں الرٹ رہݨ تے سارے ضروری انتظامات پیشگی مکمل کرݨ دی ہدایات جاری کرݙتن۔ ڈی جی پی ڈی ایم اے آکھیے جو وݙے شہراں اچ ساوݨ مینھ پاروں اربن فلڈنگ  تے انتظامیہ پیشگی اقدامات یقینی بݨاوے۔ برساتی نالیں اچ فلیش فلڈنگ دا خطرہ اے، ایں کیتے سارے متعلقہ ادارے الرٹ رہن۔ انہاں مزید آکھیا جو محکمہ صحت، آبپاشی، تعمیر و مواصلات، لوکل گورنمنٹ تے لائیو سٹاک کوں وی الرٹ جاری کر ݙتا ڳئے۔ڈی جی پی ڈی ایم اے شہریاں توں اپیل کیتی جو خراب موسم دے دوران احتیاطی تدابیر اختیارکرن۔ بوسیدہ تے کچے مکاناں اچ رہائش اختیار نہ کرن کیوں جو ساوݨ سیزن تےکچے تے بوسیدہ مکان ڈہݨ پاروں زیادہ اموات رپورٹ تھئن۔ ڈی جی سیف انور جپہ آکھیا جو اندھاری تے طوفان دی صورتحال اچ محفوظ جاہ تے ریہا ونڄے تے غیر ضروری وی نہ کیتا ونڄے۔شہری آسمانی بجلی توں بچݨ کیتے محفوظ جاہ تے رہن تے بجلی دی کھمݨ گاج ویلھے کھلے آسمان تلے اصلوں نہ ونڄو۔ انہاں والدین توں اپیل کیتی جو ٻالاں دا خصوصی خیال رکھن تے انہاں کوں پاݨی آلے علاقیں اچ جمع تھئے پاݨی بجلی دیاں تاراں تے کھمبے دے نیڑے اصلوں نہ ونڄݨ ݙیون۔ترجمان پی ڈی ایم اے موجب کہیں وی ہنگامی صورتحال اچ شہری پی ڈی ایم اے پنجاب دی ہیلپ لائن 1129 تے رابطہ کرسڳدن۔