پاکستان شنگھائی تعاون تنظیم دی صدارت سنبھال ڳھدی، آندے سال ایس سی او کونسل آف ہیڈز آف سٹیٹ دے اجلاس دی میزبانی کریسی، ترجمان دفتر خارجہ طاہر حسین اندرابی دی پریس بریفنگ

اسلام آباد۔2ستمبر (اے پی پی) ترجمان دفتر خارجہ طاہر حسین اندرابی آکھیے جو پاکستان شنگھائی تعاون تنظیم دی صدارت سنبھال ڳھدی اے جئیں دوران او آندے سال ایس سی او کونسل آف ہیڈز آف سٹیٹ دے اجلاس دی میزبانی کریسی۔ اتھاں پریس بریفنگ نال خطاب کریندے ترجمان دفتر خارجہ طاہر حسین اندرابی آکھیا جو پاکستان مستقل ثالثی عدالت دے فیصلے اچ سامݨے آوݨ آلے ’’واضح تے مستند اعلانات‘‘ دا خیرمقدم کیتے جیندے اچ ایں ڳالھ دی توثیق کیتی ڳئی اے جو پاکستان کوں سندھ طاس معاہدے دے تحت اپݨے آبی حقوق دے تحفظ کیتے سارے سفارتی تے قانونی رستے اختیار کرݨ دا حق حاصل اے جݙاں جو نئی دہلی تے زور ݙتا ڳئے جو او معاہدے دی مکمل پاسداری دی طرف واپس آوے۔ ترجمان آکھیا جو عدالت دا متفقہ فیصلہ سندھ طاس معاہدے دی حرمت تے بین الاقوامی قانون دی بالادستی دی توثیق اے۔انہاں آکھیا جو مستقل ثالثی عدالت دے فیصلے پاکستان دے ایں موقف دی تائید کیتی اے جو سندھ طاس دے پاݨی متعلق اختلافات کوں سندھ طاس معاہدے دے دائرہ کار دے اندر تے بین الاقوامی قانون موجب ہی حل کیتا ونڄݨا چاہیدے۔ انہاں آکھیا جو ثالثی عدالت اچ کارروائی سندھ طاس معاہدے اچ طے شدہ جھیڑے دے حل دے طریقہ کار دے تحت عمل اچ آنی ڳئی۔ ترجمان آکھیا جو عدالت دے فیصلے کوں بھارت دی طرفوں مسترد کیتے ونڄݨ نال ایجھے خدشات پیدا تھیندن جو موجودہ جھیڑے کوں کتھائیں اڳوں گھن ویندن ۔ بھارت بین الاقوامی قانون کوں اپݨی سہولت موجب استعمال نی کرسڳدا جو جتھاں فیدہ ہووے اتھاں ایں کوں تسلیم کرے تے جتھاں اوکھ ہووے اتھاں مسترد کر ݙیوے۔ترجمان آکھیا جو بھارت پابند معاہداتی ذمہ واریاں تے قانونی طریقہ کار کوں نظرانداز نی کرسڳدا، بھارت دا ایجھا طرزِ عمل معاہدیں دی حرمت کوں ضیان پڄیندے، بین الاقوامی جھیڑے دے طے شدہ حل دے طریقہ کار تے اعتماد کوں کمزور کریندے تے ٻئے خطیں کیتے منفی مثالاں قائم کریندے۔ انہاں آکھیا جو بھارت کوں معاہدے دی مکمل پاسداری دی طرف واپس آوݨا چاہیدے، معاہدے دے تحت قائم ادارہ جاتی تے جھیڑے دے حل دے طریقہ کار دا احترام کرݨا چاہیدے تے ایں فریم ورک دے اندر پاکستان دے نال تعمیری انداز اچ ڳالھ مہاڑ کرݨی چاہیدی اے۔ انہاں آکھیا جو بھارتی وزارتِ خارجہ دا بیان سندھ طاس معاہدے دے تحت بھارت دی ذمہ واریاں یا ثالثی عدالت دے فیصلے تے عملدرآمد دی ایں دی ذمہ واری کوں ختم یا تبدیل نی کر سڳدا۔ترجمان آکھیا جو پاکستان ایں فیصلے تے پوری سنجیدگی نال عملدرآمد کیتے پرعزم اے تے او معاہدے دیاں دفعات دے مطابق ایں دی پاسداری کریسی، اساں بھارت تے وی زور ݙیندے رہسوں جو او ایں طرزِعمل دا مظاہرہ کرے تے معاہدے دی روح تے سارے قانونی ودستاویزی دفعات دی مکمل پاسداری کوں یقینی بݨاوے۔ چین دے افغانستان کیتے خصوصی نمائندے دے پاکستان دے دورے متعلق سوال دے جواب اچ انہاں آکھیا جو پاکستان افغانستان متعلق امور تے چین دے تعمیری تے مسلسل رابطے کوں قدر دی نگاہ نال ݙیکھدے۔ طاہر حسین اندرابی آکھیا جو پاکستان افغانستان دے معاملے تے تعمیری مذاکرات کیتے ہمیشہ مثبت طور تے رابطے اچ ریہے  تاں جو پیش رفت دا انحصار عبوری طالبان حکومت دی طرفوں ٹی ٹی پی، بی ایل اے تے ٻیاں دہشت گرد تنظیماں دے خلاف ٹھوس تے قابلِ تصدیق اقدامات تے ہوسی جو افغان سرزمین توں پاکستان دے خلاف کارروائیاں کریندیاں پئن۔امریکہ تے ایران وچال جاری جھیڑے تے اسلام آباد مفاہمتی یادداشت بارے سوال تے انہاں آکھیا جو پاکستان صورتحال تے گھاٹی نظر رکھی ہوئی اے، اساکوں تشویش اے تے اے کشیدگی یقیناً کہیں دے مفاد اچ نی، تاں جو اساں مایوس نی تھئے تے اپݨا رابطہ جاری رکھیا ہویا اے۔ ترجمان آکھیا جو کشیدگی اچ ودھارے کوں ثالثی دے عمل دی ناکامی قرار نی ݙتا ونڄݨا چاہیدا کیوں جو پاکستان امن عمل دے نال پوری سنجیدگی نال اپݨا رابطہ برقرار رکھیے۔ انہاں آکھیا جو ایرانی صدر نال ملاقات دے بعد وزیراعظم شہباز شریف واضح کیتے جو اسلام آباد مفاہمتی یادداشت فریقین کوں مذاکرات دی میز تے واپس آون تے ڳالھ مہاڑ کرن بشمول تکنیکی سطح دے مذاکرات کیتے ہک فریم ورک ݙیندی اے تاں جو ایں تعطل دا طویل المدت تے پائیدار حل ڳولیا ونڄ سڳے۔کشمیری رہنما یاسین ملک دے خلاف فوجداری مقدمے بارے سوال تے انہاں آکھیا جو جموں و کشمیر دے حوالے نال پاکستان دے موقف اچ کہیں وی قسم دی تبدیلی دا سوال ہی پیدا نی تھیندا۔ انہاں آکھیا جو جموں و کشمیر بارے پاکستان دا موقف اقوامِ متحدہ دی سلامتی کونسل دیاں قرارداداں، بین الاقوامی قانون تے کشمیری عوام دیاں خواہشات تے مضبوطی نال قائم اے، اساں متعلقہ بین الاقوامی فورمز تے ایں معاملے کوں پوری طرح اجاگر کریندے رہسوں۔ انہاں آکھیا جو بشکیک اچ قیادت دیاں ملاقاتاں دے دوران وزیراعظم شہباز شریف تے نائب وزیراعظم و وزیرخارجہ محمد اسحاق ڈار اقوامِ متحدہ دے سیکرٹری جنرل نال وی ملاقاتاں کیتیاں تے ایں ڳالھ دا اعادہ کیتا جو جموں و کشمیر اقوامِ متحدہ اچ پاکستان دی اولین ترجیحات اچ شامل اے۔یورپی کمیشن دی طرفوں ہݨے ہی جاری کیتی ڳئی ݙو سالہ جی ایس پی مانیٹرنگ رپورٹ تے تبصرہ کریندے ترجمان آکھیا جو پاکستان ایں رپورٹ تے بین الاقوامی کنونشنز دے تحت پاکستان دی مسلسل پاسداری دے حوالے نال کمیشن دے اعتراف دی تعریف کریندے تاں جو انہاں آکھیا جو رپورٹ دا مجموعی بیانیہ پاکستان دی کارکردگی دی مکمل طور تے متوازن تصویر پیش نی کریندا۔ ہک سوال دے جواب اچ انہاں آکھیا جو پاکستان اچ انسدادِ دہشت گردی دے داخلی تے خارجی ݙوہیں پہلو ہن۔ داخلی محاذ تے سکیورٹی فورسز دی طرفوں وݙے پیمانے تے کارروائیاں جاری ہن۔ خارجی پہلو اچ افغانستان اچ موجود عناصر بشمول عبوری طالبان حکومت دی طرفوں پاکستان دے اندر سرگرم دہشت گرداں کوں ݙتی ونڄݨ آلی معاونت شامل اے جݙاں جو ٻاہرلے خطے دے عناصر بالخصوص بھارت دی طرفوں وی دہشت گردی دی حمایت تے معاونت کیتی ویندی پئی اے جیندے پاکستان کنے ٹھوس شواہد موجود ہن۔گزریل ہفتے دے دوران سفارتی سرگرمیاں کوں اجاگر کریندے ترجمان آکھیا جو پاکستان سفارتی محاذ تے فعال طور تے مصروف ریہے تے اعلیٰ سطحی ݙوپاسہ، علاقائی تے کثیرالجہتی رابطیں دا ہک سلسلہ جاری ریہا جنہاں دا مقصد پاکستان دی خارجہ پالیسی دیاں ترجیحات کوں اڳوں ودھاوݨ تے اہم شراکت داراں دے نال تعلقات کوں ٻیا تکڑا بݨاوݨ اے۔ انہاں وزیراعظم شہباز شریف دے شنگھائی تعاون تنظیم سربراہی اجلاس اچ شرکت کیتے کرغزستان دے جاری سرکاری دورے دا حوالہ ݙتا جتھاں وزیراعظم اہم بیانات ݙتے جݙاں جو انہاں دے علاوہ نائب وزیراعظم محمد اسحاق ڈار وی عالمی رہنماواں دے نال اجلاس دیاں سائیڈ لائنز تے ٻہوں ملاقاتاں کیتیاں۔ انہاں آکھیا جو پاکستان شنگھائی تعاون تنظیم دی صدارت وی سنبھال ڳھدی اے جیندے دوران او آندے سال ایس سی او کونسل آف ہیڈز آف سٹیٹ دے اجلاس دی میزبانی کریسی۔ترجمان پاکستان، سعودی عرب تے ترکیہ وچال مکہ مشترکہ دفاعی معاہدے دے تحت قائم سٹریٹجک سیاسی و دفاعی کمیٹی دے استنبول اچ تھیوݨ آلے افتتاحی اجلاس دا ذکر کریندے آکھیا جو ترائے ملکاں علاقائی امن، استحکام تے کشیدگی اچ کمی کیتے رل تے کم کرݨ دے عزم دا اعادہ کیتا جیندے اچ تحمل دا مظاہرہ تے بحراناں دا پرامن حل وی شامل اے۔ انہاں آکھیا جو ہک سیکرٹری جنرل دی سربراہی اچ سیکرٹریٹ سعودی عرب اچ بݨایا ویسے جݙاں جو ابتدائی طور تے ترائے سال کیتے سربراہی پاکستان نال تعلق رکھݨ آلے سیکرٹری جنرل کریسن۔