وزیر اعظم شہباز شریف دے دورہ کرغزستان اچ 17 دستاویز تے دستخط کیتے ڳئن، نائب وزیر اعظم اسحاق ڈار

اسلام آباد۔ 02 ستمبر(اے پی پی)نائب وزیر اعظم اتے وزیر خارجہ سینیٹر محمد اسحاق ڈار آکھیے جو وزیر اعظم محمد شہباز شریف دے جمہوریہ کرغزستان دے دورے اچ 17 ݙوطرفہ دستاویزاں تے دستخط کیتے ڳئن جیندے اچ وزیر اعظم شہباز شریف اتے کرغزستان دے صدر صادر ژاپاروف دا مشترکہ اعلامیہ وی شامل اے۔ سماجی رابطہ دے پلیٹ فارم ایکس تے ہک بیان اچ نائب وزیر اعظم آکھیا جو انہاں دستاویزاں اچ ٹرانزٹ تجارت، حوالگی، باہمی قانونی معاونت، انسدادِ منشیات، تعلیم، علمی تحقیق و تبادلے، موسمیاتی تبدیلی، سائنس اتے ٹیکنالوجی سودھا ٻئے اہم شعبیاں کوں پاتا ڳئے۔ نائب وزیر اعظم تے وزیر خارجہ سینیٹر محمد اسحاق ڈار آکھیا جو میں چار دستاویزاں تے دستخط کیتن جنہاں اچ پاکستان اتے کرغزستان دی وزارتِ خارجہ دے تعاون دا پروگرام، حوالگی دا معاہدہ، باہمی قانونی معاونت دا معاہدہ اتے علمی تحقیق و تبادلے بارے مفاہمت دی یادداشت شامل ہین۔ انہاں آکھیا جو ݙوہیں ملکاں باہمی تجارت دا حجم 20 کروڑ ڈالر تئیں ودھاوݨ دا عزم دوہرائے۔ اسحاق ڈار دے مطابق اے معاہدے ݙوہیں ملکآں وچال ادارہ جاتی روابط ٻئے مضبوط ٻݨاوݨ دے نال نال باہمی مفاد تے مبنی تعاون دے نویں موقعے ݙیسن۔