کرغز-پاکستان شراکت داری ٻئی تکڑی کیتی ویسی، قیادت علاقائی اتے بین الاقوامی ایجنڈے دے اہم امور تے الائے، وزیرِ اعظم دے دورہ کرغزستان دا مشترکہ اعلامیہ

بشکیک۔ 02 ستمبر(اے پی پی)وزیر اعظم محمد شہباز شریف کرغزستان دے صدر صادیر ژاپاروف دی دعوت تے 02 ستمبر کوں کرغزستان دا سرکاری دورہ کیتے جیندے اچ کرغز جمہوریہ دے صدر aتے وزیرِ اعظم دے مذاکرات تھئن جیندے اچ ݙوہائیں رہنماواں کرغز-پاکستان تعلقات دے تمام پہلوئاں دے نال نال علاقائی اتے بین الاقوامی ایجنڈے دے اہم امور تے جامع گالھ مہاڑ کیتی۔ دفترِ خارجہ دے مطابق بدھ کوں اتھاں جاری مشترکہ اعلامیہ اچ آکھیا ڳئے جو مذاکرات روایتی دوستانہ اتے خوشگوار ماحول اچ تھئے جیڑھے کرغزستان اتے پاکستان وچال اعلیٰ سطح دے سیاسی مفاہمت اتے باہمی اعتماد دی عکاسی کریندن۔ ݙوہائیں رہنماواں باہمی احترام، خودمختار مساوات، علاقائی سالمیت، اندرونی معاملات اچ عدم مداخلت اتے باہمی مفاد دے اصولاں تے مبنی ݙوطرفہ تعلقات اچ مسلسل مثبت پیش رفت تے اطمینان کریندے کرغز-پاکستان شراکت داری کوں ٻیا مستحکم کرݨ دے عزم کوں دوہرایا۔ رہنماواں آکھیا جو پاکستان دے وزیرِ اعظم دا سرکاری دورہ اعلیٰ سطح فعال سیاسی مکالمے دا منطقی تسلسل اے جیڑھا کرغز جمہوریہ دے صدر صادیر ژاپاروف دے 03 توں 04 دسمبر 2025 تئیں پاکستان دے سرکاری دورے تے صدرِ مملکت آصف علی زرداری دے 06 توں 09 جولائی 2026 تئیں کرغزستان دے سرکاری دورے اچ جاری رہے۔ ݙوہاں فریقاں طے پاوݨ والے معاہدیاں تے مستقل عملدرآمد دے عزم کوں دوہریندے ہوئیں تجارت و اقتصادیات، سرمایہ کاری، نقل و حمل و لاجسٹکس، توانائی اتے انسانی بنیاداں تے تعاون ٻیا ودھا تے ݙوطرفہ تعاون کوں عملی طور تے ہک نویں اتے معیاری سطح تئیں ڳھن ونڄݨ دا عزم دوہرائے۔

انہاں 2026-2027 کیتے کرغزستان دی وزارتِ خارجہ اتے پاکستان دی وزارتِ خارجہ دے تعاون دے پروگرام تے دستخط دا خیرمقدم کیتے اتے قرار ݙتا جو اے ݙوہاں ملکاں دی وزارتِ خارجہ دے سیاسی مکالمے اتے تعاون کوں ٻیا مضبوط ٻݨاوݨ اچ اہم کردار ادا کریسی۔ انہاں ایں ڳالھ دی توثیق کیتی جو تجارتی، اقتصادی اتے سرمایہ کاری دے تعاون کوں ٻیا ڳاڑھا کرݨ کرغزستان-پاکستان شراکت داری دی اہم ترجیحاں اچ شامل اے۔ ایں سانڳے انہاں ݙوہاں ملکاں دیاں حکومتاں کوں ہدایت کیتی جو اعلیٰ سطح دے دوریاں اچ طے پاوݨ والے معاہدیاں تے مستقل عملدرآمد یقینی ٻݨایا ونڄے، تجارت، اقتصادی، سائنسی و تکنیکی تعاون بارے کرغز-پاکستان بین الحکومتی کمیشن دی عملی کارکردگی ٻئی موثر ٻݨائی ونڄے اتے ݙوہاں ملکاں دے سرکاری اداریاں، متعلقہ تنظیماں، مالیاتی اداریاں اتے کاروباری برادری وچال موثر روابط یقینی ٻݨائے ونڄن۔ مشترکہ اعلامیہ دے مطابق رہنماواں اقتصادی شراکت داری کوں ہک نویں مرحلے اچ منتقل کرݨ تے زور ݙتا جیندا مقصد باہمی تجارت دا حجم ودھاوݨ، سرمایہ کاری تعاون اچ توسیع، صنعتی تعاون دا ودھارا، مشترکہ منصوبیاں دا قیام اتے معیشت دے ترجیحی شعبیاں اچ باہمی مفاد دے منصوبیاں تے عملدرآمد اے۔ ݙوہاں فریقاں کان کنی اتے معدنیات دی پراسیسنگ، زراعت، خوراک، ٹیکسٹائل اتے ہلکی صنعت، ادویہ سازی، حلال صنعت اتے ڈیجیٹل ٹیکنالوجی دے شعبیاں اچ صنعتی اتے سرمایہ کاری تعاون ودھاوݨ تے اتفاق کیتا ڄݙاں جو مشترکہ منصوبیاں دے قیام، مقامی سطح تے پیداوار، ٹیکنالوجی دے تبادلے اتے باہمی مفاد دے سرمایہ کاری منصوبیاں تے خصوصی توجہ ݙیوݨ تے زور ݙتا۔

انہاں متعلقہ سرکاری حکام کوں جامع ایکشن پلان ٻݨاوݨ اتے اوندے تے عملدرآمد دی ہدایت کیتی جیندا مقصد مرحلہ وار ݙوطرفہ تجارت دے حجم کوں 200 ملین ڈالر تئیں ودھاوݨ، باہمی تجارت دے طریقۂ کار کوں بہتر ٻݨاوݨ، مشترکہ سرمایہ کاری منصوبیاں دی حمایت، صنعتی تعاون ودھاوݨ اتے ݙوہیں ملکاں وچال کاروباری سرگرمیاں ودھاوݨ اے۔ فریقین ݙوطرفہ کاروباری برادری دے براہِ راست روابط دے فروغ اچ کرغز-پاکستان مشترکہ بزنس کونسل دے اہم کردار تے زور ݙیندے ہوئیں ݙوطرفہ تجارت، سرمایہ کاری اتے صنعتی منصوبیاں سانڳے ایندیاں سرگرمیاں اچ سہولت ݙیوݨ تے اتفاق کیتے۔ ݙوہائیں رہنماواں کرغز جمہوریہ دے چیمبر آف کامرس اینڈ انڈسٹری اتے فیڈریشن آف پاکستان چیمبرز آف کامرس اینڈ انڈسٹری وچال تعاون دے معاہدے تے دستخط دا خیرمقدم کیتا۔ انہاں بین الاقوامی سرمایہ کاری، جدید مالیاتی ٹیکنالوجیز، جدت اتے عالمی کاروبار کوں متوجہ کرݨ کیتے کرغز جمہوریہ اچ تمچی اسپیشل فنانشل انویسٹمنٹ ٹیریٹری دے قیام دا خیرمقدم کیتا۔ انہاں تمچی اسپیشل فنانشل انویسٹمنٹ ٹیریٹری اتے پاکستان دے مالیاتی اداریاں، سرمایہ کاری فنڈز، بینکاں اتے کاروباری برادری وچال تعاون ودھاوݨ اچ دلچسپی ݙکھائی جیندے اچ مشترکہ سرمایہ کاری منصوبیاں، مالیاتی ذرائع اتے ڈیجیٹل حل دی ترقی وی شامل اے۔ فریقین تمچی اسپیشل فنانشل انویسٹمنٹ ٹیریٹری ولوں ݙتے ڳئے موقعیاں توں عملی فیدے کیتے ݙوہیں ملکاں دیاں متعلقہ تنظیماں اتے کاروباری برادری وچال براہِ راست روابط دی حمایت کیتی۔

انہاں زور ݙتا جو کرغزستان اتے پاکستان وچال براہِ راست اقتصادی روابط، بشمول تجارت، سرمایہ کاری، صنعتی تعاون، مالیاتی تعاون اتے نقل و حمل و لاجسٹکس دے روابط اچ توسیع، جنوبی ایشیا اتے وسطی ایشیا وچال اقتصادی رابطے مضبوط ٻݨاوݨ اچ عملی کردار ادا کریسی۔ رہنماواں کرغیز جمہوریہ دے صدر دے ماتحت نیشنل ایجنسی فار ورچوئل ایسٹس اینڈ بلاک چین ٹیکنالوجیز اتے پاکستان ورچوئل ایسٹس ریگولیٹری اتھارٹی وچال ورچوئل اثاثیاں دے شعبے اچ تعاون دی یادداشت تے دستخط دا خیرمقدم کیتا۔ انہاں آکھیا جو اے دستاویز ݙوطرفہ اقتصادی شراکت داری کوں ٻیا تکڑا کرݨ دے ہک نویں مرحلے دی علامت اے۔ فریقین انہاں دستاویزاں دی تزویراتی اہمیت کوں اڳونہا کیتے جیڑھے مالیاتی منڈیاں دے انضمام، محفوظ تے شفاف ڈیجیٹل اثاثہ جاتی نظام دے قیام، سرحد پار سرمایہ کاری دے فروغ تے عالمی ڈیجیٹلائزیشن دے دور اچ ݙوہاں ملکاں وچال تکنیکی جدت سانڳے مضبوط بنیاد ݙیندن۔ مشترکہ اعلامیہ دے مطابق انہاں کرغز جمہوریہ اتے پاکستان وچال نقل و حمل تے ٹرانزٹ تعاون کوں ٻیا ودھاوݨ دا آکھیے اتے قابلِ اعتماد اتے اقتصادی طور تے موثر ٹرانسپورٹ و لاجسٹکس رستیاں دی ترقی، باہمی مال برداری دا حجم ودھاوݨ اتے ݙوہاں ملکاں دے سامان دی پائیدار ترسیل کیتے سازگار حالات پیدا کرݨ اچ دلچسپی کوں دوہرایا۔ رہنماواں کرغز جمہوریہ دی کابینہ اتے پاکستان دی حکومت وچال ٹرانزٹ تجارت دے معاہدے تے دستخط دا خیرمقدم کیتا تے زور ݙتا جو اے تزویراتی دستاویز علاقائی انضمام دے فروغ، باہمی تجارت دے حجم اچ اضافے اتے لاجسٹکس رستیاں کوں بہتر بݨاوݨ کیتے نویاں راہواں کھلیندی اے جیندے نال ݙوہیں ملک جنوبی اتے وسطی ایشیا وچال اہم ٹرانسپورٹ مرکز ٻݨ سڳدن۔ ݙوہائیں رہنماواں ٹرانزٹ ٹریفک بارے اڄوکے چار ملکی معاہدے تے موثر عملدرآمد دی اہمیت دوہریندے معاہدے دے تحت مقرر کیتے ڳئے ٹرانسپورٹ روٹ دے پائیدار آپریشن کوں یقینی ٻݨاوݨ، متعلقہ ٹرانسپورٹ، کسٹمز اتے انتظامی طریقۂ کار کوں سوکھا کرݨ اتے مال برداری اچ عملی رکاوٹاں کوں دور کرݨ کیتے مشترکہ کوششاں جاری رکھݨ تے اتفاق کیتا۔ فریقین کرغزستان دی بیرونی تجارت اتے ٹرانزٹ دے موقعیاں کوں وسعت ݙیوݨ، نقل و حمل کوں فروغ ݙیوݨ اتے ݙو طرفہ ٹرانسپورٹ و لاجسٹکس دے رستیاں کوں متنوع بݨاوݨ کیتے پاکستان دی سمندری بندرگاہواں دی استعداد توں ٻیا فیدہ چاوݨ اچ دلچسپی ݙکھائی۔

ݙوہائیں رہنماواں متعلقہ حکام کوں ہدایت کیتی جو مال بردار گاݙیاں کیتے سازگار حالات پیدا کرݨ لو عملی کم جاری رکھیا ونڄے تاں جو باہمی مال برداری دا حجم ودھایا ونڄے۔ فریقین “کرغز پوسٹ” تے پاکستان پوسٹ وچال ڈاک خدمات اتے ای کامرس دے شعبے اچ باہمی مفاد تے مبنی تعاون دے ارادے دے ݙوطرفہ معاہدے تے دستخط دا خیرمقدم کیتا اتے براہِ راست اقتصادی روابط ودھاوݨ کیتے جدید ترسیلی ذرائع اتے ای کامرس دی ترقی دی اہمیت کوں اڳونہا کیتے۔ انہاں توانائی دے شعبے اچ تعاون ودھ مضبوط کرݨ اچ دلچسپی ݙکھائی اتے پائیدار ترقی دے حصول کیتے مشترکہ منصوبیاں کوں اڳو تے ٹورݨ دیاں کوششاں اچ باہمی حمایت دا عزم دوہرایا۔ ݙوہیں فریقاں کاسا 1000 منصوبے تے ویلھے تے عملدرآمد دی اہمیت تے زور ݙتے۔ انہاں توانائی دے شعبے اچ مشترکہ ورکنگ گروپ دے قیام تے اطمینان کریندے ہدایت کیتی جو بجلی، پن بجلی، قابلِ تجدید توانائی دے ذرائع، توانائی دے بنیادی ڈھانچے اتے جدید ٹیکنالوجی دے استعمال دے شعبیاں اچ تعاون کیتے ٹھوس تجاویز ݙتیاں ونڄن ڄیکوں بعد اچ کرغز-پاکستان بین الحکومتی کمیشن برائے تجارت، اقتصادی، سائنسی و تکنیکی تعاون دے فریم ورک اچ زیرِ غور لایا ونڄے۔ ݙوہاں ملکاں ثقافت، تعلیم، سائنس اتے جدت طرازی دے شعبیاں اچ تعاون ٻیا ودھاوݨ دی نمایاں استعداد کوں دوہرایا اتے تعلیمی و ثقافتی تبادلیاں کوں وسعت ݙیوݨ، اعلیٰ تعلیمی اداریاں، ثقافتی اداریاں اتے تحقیقی مراکز وچال شراکت داری مضبوط ٻݨاوݨ اتے مشترکہ ثقافتی و انسانی، تعلیمی اتے سائنسی منصوبیاں تے عملدرآمد اچ دلچسپی ݙکھائی۔ فریقین طبی تعلیم دے شعبے اچ تعاون ٻیا بہتر ٻݨاوݨ اتے ݙوہاں ملکاں دے متعلقہ حکام اتے پیشہ ورانہ ریگولیٹری اداریاں وچال روابط دی اہمیت تے زور ݙتا تاں جو طبی تربیت دے اعلیٰ معیار کوں یقینی بݨایا ونڄ سڳے۔ انہاں کرغز جمہوریہ دی وزارتِ سائنس و اعلیٰ اتے پاکستان دی وزارتِ سائنس و ٹیکنالوجی وچال سائنسی و تکنیکی تعاون دے معاہدے، کرغزستان دی وزارتِ تعلیم اتے پاکستان دی وزارتِ وفاقی تعلیم و پیشہ وارانہ تربیت وچال تعلیم دے شعبے اچ تعاون دی یادداشت، کرغزستان دی وزارتِ صحت اتے پاکستان دے پاکستان میڈیکل اینڈ ڈینٹل کونسل وچال طبی تعلیم دے شعبے اچ تعاون دی یادداشت، پاکستان دی نیشنل ڈیفنس یونیورسٹی اتے کرغزستان دے صدر دے ماتحت نیشنل انسٹی ٹیوٹ فار اسٹریٹیجک انیشی ایٹوز وچال علمی تحقیق اتے مشترکہ سرگرمیاں دے شعبے اچ مفاہمت دی یادداشت تے انسٹی ٹیوٹ آف سٹرٹیجک سٹڈیز اسلام آباد تے کرغزستان دے صدر دے ماتحت نیشنل انسٹی ٹیوٹ فار سٹرٹیجک سٹڈیز وچال مفاہمت دی یادداشت تے دستخط دا خیرمقدم کیتا ستے انہاں دستاویزاں دی خصوصی اہمیت تے زور ݙتا۔ فریقین قرار ݙتا جو اے معاہدے سائنسی اتے تعلیمی تعاون کیتے مضبوط قانونی اتے ادارہ جاتی بنیاد ݙیندن، تعلیمی نقل و حرکت کوں سوکھا ٻݨیدن، اعلیٰ تربیت یافتہ ماہرین دی تیاری کیتے نویں موقعے کݙھیندن اتے ماہرین دی سطح تے روابط کوں تکڑا کریندن جیڑھے باہمی خیرسگالی اتے عوامی سطح تے روابط دے ودھارے اچ اہم کردار ادا کریسن۔ فریقین سیاحت دے شعبے اچ تعاون دے نمایاں امکانات تے زور ݙیندے ہوئیں باہمی سیاحتی آمدورفت اچ اضافے، سیاحتی آپریٹرز دے درمیان براہِ راست روابط دے فروغ اتے ݙوہاں ملکاں دے سیاحتی امکانات کوں اڳونہا کرݨ کیتے سوکھ ݙیوݨ تے اتفاق کیتا۔ انہاں کرغز-پاکستان مشترکہ ورکنگ گروپ برائے سیاحت دے قیام تے اطمینان کریندے ہدایت کیتی جو مشترکہ طور تے سیاحتی مصنوعات دے فروغ، تجربیاں دے تبادلے اتے ݙوطرفہ سیاحتی صنعتاں دے نمائندیاں وچال روابط سودھا تعاون دے مخصوص شعبیاں دی نشاندہی کرے۔ قیادت دہشتگردی، انتہاپسندی، بین الاقوامی منظم جرائم، منشیات، نفسیاتی اثرات رکھݨ والے مادیاں اتے انہاں دے پیش خیمہ کیمیائی اجزا دی غیر قانونی سمگلنگ، انسانی سمگلنگ، غیر قانونی ہجرت، سائبر جرائم اتے ٻئے اڄوکے دور دے چیلنجز اتے خطریاں نال نمٹݨ کیتے ݙوہاں ملکاں دے متعلقہ حکام وچال تعاون ٻیا مضبوط ٻݨاوݨ دا عزم دوہرایا۔ فریقین کرغزستان اتے پاکستان وچال حوالگی دے معاہدے، فوجداری معاملیاں اچ باہمی قانونی معاونت دے معاہدے سودھا کرغز جمہوریہ دی وزارتِ داخلہ اتے پاکستان دی وزارتِ داخلہ و انسدادِ منشیات وچال منشیات، نفسیاتی اثرات رکھݨ والے مادیاں، نویں نفسیاتی اثرات رکھݨ والے مادیاں، انہاں دے پیش خیمہ کیمیائی اجزا تے متعلقہ امور دی غیر قانونی اسمگلنگ دے خلاف تعاون دی یادداشت تے دستخط دا خیرمقدم کیتا۔ رہنماواں انہاں دستاویزاں دے مجموعے کوں مذکورہ شعبیاں اچ تعاون مضبوط ٻݨاوݨ کیتے بنیادی اہمیت آلا قرار ݙتا۔ انہاں آکھیا جو اے معاہدے بین الاقوامی جرائم کوں موثر طور تے روکݨ کیتے مضبوط بین الاقوامی قانونی بنیاد ݙیندن، ݙوہاں ملکاں دی سرزمین تے شہریاں دے حقوق تے جائز مفادات دے تحفظ دے موقعیاں کوں وسعت ݙیندن تے کرغزستان تے پاکستان دے قانون نافذ کرݨ والے اداریاں وچال ادارہ جاتی تعاون کوں نویں سطح تئیں گھن ویندن۔ انہاں دفاع دے شعبے اچ تعاون ٻیا ودھاوݨ، ݙوہاں ملکاں دے متعلقہ اداریاں وچال روابط مضبوط بݨاوݨ اچ دلچسپی کوں دوہرایا۔ رہنماواں ثقافتی و انسانی، بین العلاقائی تے بین البلدیاتی روابط ودھاوݨ تے زور ݙیندے انہاں کوں کرغزستان تے پاکستان دے عوام وچال دوستی اتے باہمی مفاہمت کوں مضبوط بݨاوݨ دا اہم عنصر قرار ݙتا۔ ایں سانڳے فریقین کرغز جمہوریہ دے شہر اوش اتے پاکستان دے شہر لاہور وچال سسٹر سٹی تعلقات دے قیام دے معاہدے تے دستخط دا خیرمقدم کیتا۔ وزیرِ اعظم محمد شہباز شریف کرغز جمہوریہ کوں چھیویں نومیڈ گیمز دی میزبانی تے مبارکباد ݙتی اتے انہاں کھیڈاں دے بین الاقوامی ثقافتی و انسانی تعاون دے فروغ، تاریخی و ثقافتی ورثے دے تحفظ اتے تہذیباں دے مکالمے ودھاوݨ کیتے نویکلے کردار کوں سراہیا۔ کرغزستان پاکستانی کھیڈاں دے وفد دی شرکت کوں بھرپور انداز اچ سراہیا۔ رہنماواں باہمی دلچسپی دے امور تے اقوامِ متحدہ، شنگھائی تعاون تنظیم، اسلامی تعاون تنظیم، اقتصادی تعاون تنظیم تے ٻئیاں بین الاقوامی و علاقائی تنظیماں وچال ودھ رابطے اتے تعاون دے عزم کوں دوہرایا۔ پاکستان 2025-2026 اچ شنگھائی تعاون تنظیم دی کامیاب صدارت تے تنظیم دی 25 ویں سالگرہ دے موقع تے بشکیک اچ ایس سی او کونسل آف ہیڈز آف اسٹیٹ دے اجلاس دے کامیاب انعقاد کوں سراہیا اتے تنظیم اچ ودھ تعاون کیتے آمادگی ݙکھائی۔ کرغزستان 2026-2027 کیتے شنگھائی تعاون تنظیم تے اقتصادی تعاون تنظیم دی صدارت کیتے پاکستان دی حمایت دا عزم کریندے علاقائی استحکام، رابطہ تے پائیدار ترقی دے فروغ کیتے اقدامات کوں اڳو تے ودھاوݨ سانڳے کوششاں تے زور ݙتے۔ وزیرِ اعظم کرغزستان کوں 2027-2028 کیتے اقوامِ متحدہ دی سلامتی کونسل دا غیر مستقل رکن منتخب تھیوݨ تے مبارکباد ݙیندے ہوئیں بین الاقوامی امن، سلامتی تے پائیدار ترقی سانڳے اقوامِ متحدہ اچ رابطیاں اتے تعاون کیتے آمادگی کوں دوہرایا۔ کرغزستان دے صدر اقوامِ متحدہ اچ کرغزستان دی حمایت تے پاکستان دا شکریہ ادا کیتا۔ انہاں 2025-2026 دے دوران اقوامِ متحدہ دی سلامتی کونسل دے غیر مستقل رکن دی حیثیت نال پاکستان دی بین الاقوامی امن تے سلامتی کیتے خدمات کوں وی سراہیا۔ فریقین کرغز جمہوریہ دی سلامتی کونسل دی رکنیت دی مدت دے دوران علاقائی تے بین الاقوامی امن و سلامتی دے امور تے ودھ جاری رکھݨ تے اتفاق کیتے۔ فریقین قرار ݙتا جو خطے اچ استحکام تے پائیدار اقتصادی ترقی جنوبی ایشیا تے وسطی ایشیا وچال تجارت، نقل و حمل، توانائی دے تعاون تے رابطہ کاری ودھاوݨ کیتے ݙاݙھی اہم اے۔ خطے اتے ایںدے توں ٻاہرو تھیوݨ والے دہشت گرد حملیاں دی مذمت کریندے رہنماواں دوہرایا جو خطے اچ امن تے استحکام ترقی اتے خوشحالی کیتے ضروری ہین۔ انہاں دہشت گردی دے خلاف اقوامِ متحدہ، شنگھائی تعاون تنظیم تے اسلامی تعاون تنظیم سودھا سارے  فورمز تے رل تے کم کرݨ تے اتفاق کیتا۔ انہاں افغانستان اچ استحکام تے سلامتی کوں جنوبی ایشیا تے وسطی ایشیا وچال بلا تعطل رابطہ دے وژن کوں عملی شکل ݙیوݨ کیتے اہم شرط قرار ݙتا۔ ݙوہیں رہنماواں آکھیا جو افغانستان دی سرزمین کوں ٻئے ملکاں دی سلامتی کیتے خطرہ بݨݨ والیاں سرگرمیاں کیتے استعمال نئیں تھیوݨا چاہیدا۔ انہاں اتفاق کیتا جو جنوبی ایشیا اتے وسطی ایشیا وچال تعاون اتے رابطہ دی وسیع صلاحیت کوں استعمال کرݨ کیتے محفوظ اتے سازگار ماحول ضروری اے۔ انہاں زیرِ التوا تنازعیاں اتے اختلافات کوں یکطرفہ طرزِ عمل اختیار کرݨ دے بجائے بین الاقوامی قانون تے اقوامِ متحدہ دے منشور دے اصولاں تے مقاصد دے مطابق پرامن ذرائع نال فوری اتے پرامن طور تے حل کرݨ تے زور ݙتا۔ پاکستان عالمی سطح اتے پہاڑی علاقیاں بارے ایجنڈے، پہاڑی خطیاں دی پائیدار ترقی اتے موسمیاتی تبدیلی نال مطابقت پیدا کرݨ کیتے کرغزستان دے بین الاقوامی اقدامات دی حمایت کوں دوہرایا جنہاں اچ 2027 اچ ݙوجھے عالمی ماؤنٹین سمٹ “بشکیک+25” کراوݨ وی شامل اے اتے اوندے کم اچ فعال شرکت کیتے آمادگی ݙکھائی۔ انہاں کرغزستان دی وزارتِ قدرتی وسائل، ماحولیات و تکنیکی نگرانی اتے پاکستان دی وزارتِ موسمیاتی تبدیلی و ماحولیاتی رابطہ وچال ماحولیات اتے موسمیاتی تبدیلی دے شعبے اچ تعاون دی مفاہمتی یادداشت تے دستخط دا خیرمقدم کیتا۔ مشترکہ اعلامیہ دے مطابق اتفاق تھیا جو وزیرِ اعظم محمد شہباز شریف دا سرکاری دورہ کرغزستان-پاکستان تعاون اچ ہک نویں باب اے جیندی بنیاد طے پاوݨ والے معاہدیاں تے مستقل عمل درآمد، تجارت، اقتصادیات اتے سرمایہ کاری دے تعاون اچ ٻیا توسیع، ٹرانسپورٹ و لاجسٹکس تعاون کوں مضبوط بݨاوݨ اتے باہمی دلچسپی دے شعبیاں اچ باہمی مفاد تے مبنی شراکت داری ودھاوݨ اچ مدد ݙیسی۔ آکھیا ڳیا جو سرمایہ کاری تعاون اچ توسیع، صنعتی تعاون دی ترقی تے ٹرانسپورٹ و لاجسٹکس تعاون اچ بہتری کرغز جمہوریہ تے پاکستان دے عوام دے طویل المدتی مفاداں نال جڑی ہوئی اے، اے ݙوطرفہ تعلقات دی ٻیا معیاری ترقی کیتے مضبوط بنیاد ݙیندی اے۔ وزیرِ اعظم محمد شہباز شریف کرغزستان دے صدر کوں تیکھے پاکستان دا دورہ کرݨ دی دعوت ݙتی۔ کرغزستان دے صدر اے دعوت قبول کر ڳھدی، دورے دی تاریخ سفارتی ذرائع نال باہمی مشاورت دے ذریعے طے کیتی ویسی۔