پنجاب دے دریاواں اچ پاݨی معمول تے وہندا پئے، پی ڈی ایم اے

لاہور۔ 03 ستمبر (اے پی پی) پنجاب دے ٻہوں سارے دریاواں اچ پاݨی معمول تے وہندا پئے ۔ ترجمان پی ڈی ایم اے موجب دریائے چناب، جہلم، راوی تے ستلج اچ وی پاݨی دا وہݨ نارمل سطح تے اے۔ دیرہ غازی خان رود کوہیاں اچ وی پاݨی نارمل اے۔ دریائے سندھ اچ کالاباغ تے چشمہ دی جاہ تے تلویں درجے دی چھل اے۔ کالاباغ اچ پاݨی دا وہݨ 3 لکھ 51 ہزار کیوسک تے چشمہ اچ پاݨی 2 لکھ 83 ہزار کیوسک اے۔ نالہ بئین شکرگڑھ اچ تلویں درجے دی چھل دی صورت حال اے ڄݙاں جو دریائے راوی دے اہم ملحقہ نالہ ڈیگ اچ اتلے درجے دی چھل اے جتھاں پاݨی دا اخراج 22 ہزار 500 کیوسک اے۔ تربیلا ڈیم 100 فیصد تے منگلا ڈیم 78 فیصد بھر چکئن۔ ڈی جی پی ڈی ایم اے سیف انور جپہ دی شہریاں توں گزارش اے جو موسم تے چھل دی صورتحال پاروں احتیاطی تدابیراختیار کرن تے دریاواں، نہراں تے ندی نالیں دے آسے پاسے سیر تفریح نہ کیتی ونڄے۔