گڈانی کوں جدید تے ماحول دوست شپ ری سائیکلنگ مرکز بݨیسوں، وفاقی وزیربحری امور جنید انوار چوہدری

اسلام آباد۔ 03 ستمبر (اے پی پی) وفاقی وزیربحری امور محمد جنید انوار چوہدری آکھیے جو گڈانی اچ شپ بریکنگ انڈسٹری کوں جدید تے ماحول دوست شپ ری سائیکلنگ مرکز اچ تبدیل کرݨ کیتے 12 ارب روپے دے منصوبے تے عملی کم شروع تھی ڳئے۔ انہاں اے ڳالھ گڈانی شپ بریکنگ اینڈ ری سائیکلنگ انڈسٹری دی جدید کاری، اپ گریڈیشن تے متعلقہ سہولتاں دی ترقی متعلق سٹیئرنگ کمیٹی دے اجلاس دی صدارت کریندے آکھی۔ وفاقی وزیر کوں بریفنگ اچ ݙسایا ڳیا جو منصوبے دے تحت 30 بستراں تے مشتمل ہسپتال، سکول، مزدور کالونی تے سولر انرجی سہولتاں دی تعمیر شروع تھی چکی اے۔ وفاقی وزیر بحری امور آکھیا جو گڈانی ملکی بحری معیشت تے سٹیل سکریپ مارکیٹ اچ اہم کردار ادا کریندے، تاں جو روایتی شپ بریکنگ طریقہ کار کوں محفوظ، جدید تے ماحول دوست شپ ری سائیکلنگ نظام اچ تبدیل کرݨ ویلھے دی لوڑھ اے۔ انہاں آکھیا جو منصوبے اچ طبی عملے کیتے رہائش، مزدور کالونی، پبلک پارک تے تقریباً 32 کلومیٹر سڑکاں دی تعمیر وی شامل اے ڄݙاں جو صنعتی تے خطرناک فضلے دے ذخیرے تے تلفی کیتے سہولتاں، فائر اینڈ ریسکیو سروسز تے پاݨی ݙیوݨ ٹریٹمنٹ دا نظام وی بݨایا ویسی۔ وفاقی وزیر آکھیا جو جدید کاری دے عمل اچ مزدوراں دی صحت، حفاظت تے فلاح کوں مرکزی حیثیت حاصل ہووݨی چاہیدی اے۔ گڈانی کوں ذمہ وار شپ ری سائیکلنگ دا ایہوجیھا ماڈل بݨاوݨا اے جتھاں معاشی سرگرمی، مزدوراں دے تحفظ تے ماحولیاتی پائیداری سڳے نال اڳوں ودھن۔ انہاں آکھیا جو گڈانی دی اپ گریڈیشن نال سرکلر اکانومی کوں وی ودھارا ملسی کیوں جو ناکارہ بحری جہازاں توں سٹیل تے ٻئے مواد دا بہتر استعمال ممکن ہوسی۔ انہاں آکھیا جو شپ ری سائیکلنگ صرف بحری شعبے دی سرگرمی نی ایں دا براہِ راست تعلق سٹیل سکریپ دی معیشت، روزگار تے صنعتی سپلائی چین نال اے۔ حکومت مالی سال 2026-27 دے وفاقی پبلک سیکٹر ڈویلپمنٹ پروگرام دے تحت منصوبے کیتے 78 کروڑ روپے مختص کیتن۔ وزیر آکھیا جو جدید کاری پروگرام دا مقصد گڈانی اچ شپ ری سائیکلنگ دے طریقہ کار کوں ہانگ کانگ انٹرنیشنل کنونشن فار دی سیف اینڈ انوائرنمنٹلی ساؤنڈ ری سائیکلنگ آف شپس دے تقاضیں نال ہم آہنگ کرݨ وی اے۔