وفاقی وزیرِپٹرولیم علی پرویز ملک دی زیرِ صدارت پٹرولیم مصنوعات دیاں قیمتاں متعلق کمیٹی دا اجلاس

اسلام آباد۔ 03 ستمبر (اے پی پی) وفاقی وزیر پٹرولیم علی پرویز ملک دی صدارت اچ پٹرولیم مصنوعات دیاں قیمتاں متعلق کمیٹی دا اجلاس منعقد تھیا جیندے اچ قیمتاں دے تعین دے موجودہ نظام دا جائزہ تے ایندھن دیاں قیمتاں کوں ٻیا شفاف تے قابلِ پیش گوئی بݨاوݨ دے نال صارفین کوں قیمتاں اچ غیر ضروری لہہ چڑھ توں تحفظ ݙیوݨ دے اقدامات تے غور کیتا ڳیا۔ ترجمان پٹرولیم ڈویژن موجب کمیٹی موجودہ قیمتاں دے تعین دے نظام کوں ٻیا موثر بݨاوݨ کیتے ٻہوں ساری سفارشات تے اتفاق کیتا تے فیصلہ کیتا جو حتمی رپورٹ وقتی غور تے منظوری کیتے وزیراعظم کوں پیش کیتی ویسی۔ ڈیزل دیاں قیمتاں دے تعین دے حوالے نال کمیٹی ہنگامی صورتحال اچ قواعد و ضوابط دے تحت ممکنہ مداخلت کیتے رہنما اصولاں دی منظوری ݙتی۔ کمیٹی پیٹرول دیاں قیمتاں دے تعین دے فارمولے متعلق سفارشات دا وی جائزہ ڳھدا تے پیٹرول دیاں قیمتاں کوں جون 2027ء تئیں ڈی ریگولیٹ کرݨ دا ممکنہ ہدف مقرر کیتا تاں جو مسابقتی تے مارکیٹ تے مبنی قیمتاں دے نظام دے پاسے بتدریج منتقلی یقینی بݨائی ونڄ سڳے تے صارفین کوں قیمتاں اچ غیر ضروری لہہ چڑھ توں تحفظ حاصل تھیوے۔ اجلاس اچ موجودہ آئی ایف ای ایم نظام دا وی جائزہ ڳھدا ڳیا تے آئی ایف ای ایم دے حساب کیتے نظرثانی شدہ طریقہ کار تے اتفاق کیتا ڳیا۔ اوگرا یقین ݙیوائے مالی سال 2026 کیتے آئی ایف ای ایم دا آڈٹ کیلنڈر سال 2026 دے اختتام تئیں مکمل کرڳھدا ویسی۔ کمیٹی ہدایت کیتی جو اوگرا موجودہ آئل مارکیٹنگ کمپنیاں دے استحکام تے کارکردگی بالخصوص بہترین طریقہ کار تے جدید ٹیکنالوجیز کوں اپناوݨ دے حوالے نال تحریری سفارشات پیش کرے۔ اجلاس اچ قیمتاں دے استحکام دے فنڈ متعلق ذیلی کمیٹیاں دی رپورٹ دا وی جائزہ ڳھدا ڳیا۔ کمیٹی ذیلی گروپ کوں اپݨی تجویزاں ٻیاں بہتر بݨاوݨ دی ہدایت کیتی تاں جو کمیٹی مشاہدہ کیتا جو مارکیٹ دی حتمی ڈی ریگولیشن دے پیشِ نظر استحکام فنڈ دے قیام دے بجائے مناسب مقدار اچ ایندھن دے ذخائر برقرار رکھݨ زیادہ موزوں ہوسی۔ ترجمان دے مطابق نعیم غوری دی سربراہی اچ ذیلی کمیٹی چیئرمین ایف بی آر نال ملاقات کریسی تاں جو بدلدے مارکیٹ حالات دے تناظر اچ ایں امر دا جائزہ ڳھدا ونڄ سڳے جو آیا ٹیکساں دے موجودہ نظام تے نظرثانی دی لوڑھ اے۔