سیرتِ طیبہ نوجواناں کیتے دنیا تے آخرت اچ کامیابی دا بہترین رستہ اے، عطاء اللہ تارڑ

اسلام آباد۔ 03 ستمبر (اے پی پی) وفاقی وزیر اطلاعات و نشریات عطاء اللہ تارڑ آکھیے جو نبی کریم ﷺ دی حیاتِ طیبہ ساݙے کیتے اسوہ حسنہ اے، سیرتِ طیبہ تے عمل کرتے اساں دنیا تے آخرت اچ کامیابی حاصل کرسڳدوں۔ اتھاں اسلام آباد ماڈل کالج خواتین اچ قومی رحمت اللعالمین و خاتم النبیین اتھارٹی دے زیرِاہتمام تقریباتِ ربیع الاول دے سلسلے اچ ھک ݙینھ وار سیمینار ’’سیرت کا پیغام، نوجوانوں کے نام‘‘ نال خطاب کریندے وفاقی وزیر اطلاعات آکھیا جو قرآنِ کریم اچ اللہ تعالیٰ اپݨے محبوب نبی کریم ﷺ دی ذاتِ اقدس دا ذکر نہایت شان تے عظمت دے نال فرمائے۔ انہاں آکھیا جو اللہ تعالیٰ نبی کریم ﷺ کوں بے شمار معجزات عطا فرمائے جنہاں اچ قرآن مجید وی ھک عظیم معجزہ اے، نبی کریم ﷺ وجہِ تخلیقِ کائنات، رحمت اللعالمین تے خاتم النبیین ہن۔ انہاں آکھیا جو اللہ تعالیٰ نبی کریم ﷺ کوں سارے انساناں، ساری کائنات تے سارے عالمین کیتے رحمت بݨا تے بھیجا، جے اساں مشاہدہ کروں تاں غیر مسلمان وی نبی کریم ﷺ دی ذاتِ اقدس دے حوالے نال تحریراں لکھئن تے اشعار آکھئن۔ انہاں آکھیا جو مارٹن لنگز دی کتاب ایں دی ایک بہترین مثال اے ڄݙاں جو برصغیر دے ھک سکھ شاعر وی نبی کریم ﷺ دی ذاتِ اقدس دے بارے اچ ایہوجیہے اشعار آکھے ڄہرے ہمیشہ کیتے تاریخ دا حصہ بݨ ڳئے۔ وفاقی وزیر اطلاعات آکھیا جو نبی کریم ﷺ دی ذاتِ اقدس دا جتھاں مسلمان دے دلاں اچ اعلیٰ ترین مقام اے، اتھائیں غیر مسلم وی آپ ﷺ دی شخصیت تے تعلیمات توں ایں قدر متاثر تھئے جو انہاں آپ ﷺ دی شان اچ اشعار آکھئے تے تحریراں لکھئن۔ عطاء اللہ تارڑ آکھیا جو اڄ اساں کوں نبی کریم ﷺ دی سیرتِ طیبہ تے عمل پیرا تھیوݨ دی جتنی لوڑھ اے، شاید ایں توں پہلے کݙاہیں کائناں ہئی۔ انہاں آکھیا جو نبی کریم ﷺ دے والدِ گرامی آپ ﷺ دی ولادتِ باسعادت توں پہلے ہی وفات پا ڳئے ہن ڄݙاں جو آپ ﷺ دی والدہ ماجدہ دے وصال دے ویلھے آپ ﷺ دی عمرِ مبارک صرف چھی سال ہئی، مگر نبی کریم ﷺ نوجواناں کوں والدین دی فرمانبرداری تے احترام دا اہم پیغام ݙتا۔ وفاقی وزیر اطلاعات آکھیا جو نبی کریم ﷺ ھک واری حضرت عمر فاروقؓ تے حضرت علیؓ نال فرمایا جو میݙے بعد ھک بندہ آسی جیندا ناں اویس قرنی ہوسی، او جتھاں وی ملے ایں توں دعا کرویجو۔ انہاں آکھیا جو ڄݙاں حضرت عمرؓ تے حضرت علیؓ حج دے موقع تے حضرت اویس قرنیؒ کوں ڳولیا تے او ھک مقام تے انہاں کوں مل ڳئے تاں ݙوہیں جلیل القدر صحابہؓ انہاں توں دعا دی درخواست کیتی۔ انہاں آکھیا جو حضرت اویس قرنیؒ ایں ڳالھ تے حیران تھئے جو اے ݙوہیں جلیل القدر صحابہؓ مئیں توں دعا دی درخواست کریندے پئن۔ وفاقی وزیر اطلاعات آکھیا جو نبی کریم ﷺ حضرت اویس قرنیؒ دی والدہ دی خدمت تے فرمانبرداری کوں خصوصی اہمیت ݙتی۔ انہاں آکھیا جو ایں واقعے اچ نوجواناں کیتے ساریں توں اہم پیغام والدین دی فرمانبرداری دا اے تے ایہو کامیابی دا رستہ اے۔ عطاء اللہ تارڑ آکھیا جو جے اساں رواداری تے ہم آہنگی دی ڳالھ کروں تاں نبی کریم ﷺ دی حیاتِ طیبہ دے مختلف پہلو، بھاویں او ھک رہنما، کمانڈر، معلم، والد یا شوہردی حیثیت نال ہوون، ساݙے کیتے بہترین مثال ہن، جے اساں اسوہ حسنہ کوں صحیح طور تے سمجھݨ تے اپݨی زندگیاں اچ اپناوݨ شروع کر ݙیوں تاں ایہا دنیا تے آخرت اچ کامیابی دا رستہ اے۔ انہاں آکھیا جو رواداری تے ہم آہنگی دی ھک بہترین مثال ہجرتِ مدینہ دے موقع تے سامݨے آندی اے، ڄݙاں مکہ مکرمہ دے مسلمان اپݨا گھر ٻارتے سارا کجھ چھوڑ تے مدینہ منورہ دی طرف ہجرت کر ڳئے ڄݙاں جو مدینہ منورہ دے لوکاں کھلے دل دے نال اپݨے گھر، مال تے ٻئے وسائل مہاجرین کیتے پیش کر ݙتے۔ وفاقی وزیر اطلاعات آکھیا جو نبی کریم ﷺ دی متاثر کن قیادت دے نتیجے اچ مہاجرین تے انصار دے درمیان ڄہری اخوت، رواداری تے ہم آہنگی قائم تھئی، او دنیا کیتے ھک بہترین مثال اے۔ ایں واقعے اچ نوجواناں کیتے وی ٻہوں وݙا سبق موجود اے۔ انہاں آکھیا جو سانجھے اتحاد و اتفاق دی برکت نال فتحِ مکہ ممکن تھئی۔ فتحِ مکہ دے موقع تے نبی کریم ﷺ ھک عظیم الشان لشکر دے رلے مکہ مکرمہ تشریف گھن آئے تے عام معافی دا اعلان فرمایا۔ ایں عام معافی اچ او لوک وی شامل ہن جنہاں مسلماناں تے وݙے وݙے ظلم ڈھائے ہن۔ نبی کریم ﷺ دی طرفوں فتحِ مکہ دے موقع تے عام معافی دا اعلان عفو و درگزر تے رحمت دی عظیم مثال اے۔ انہاں آکھیا جو طائف دے واقع دے بعد ڄݙاں کفار نبی کریم ﷺ تے پتھر مارئے تاں اللہ تعالیٰ دی طرفوں فرشتے بھیجے ڳئے تے عرض کیتا ڳیا جے آپ ﷺ حکم فرماؤ تاں انہاں کوں پہاڑاں وچال نیست و نابود کر ݙتا ونڄے تاں جو نبی کریم ﷺ انہاں کیتے ہدایت دی امید دا اظہار فرمایا۔ وفاقی وزیر اطلاعات آکھیا جو نبی کریم ﷺ دا اے طرزِ عمل صبر، تحمل، عفو و درگزر تے رواداری دا عظیم درس اے ڄہرا اڄ وی نوجواناں کیتے مشعلِ راہ اے۔ وفاقی وزیراطلاعات آکھیا جو قرآنِ کریم خواتین دے حقوق دے حوالے نال واضح احکامات ݙتن ڄہرے نبی کریم ﷺ دی تعلیمات دا حصہ ہن۔ انہاں آکھیا جو حضرت خدیجہؓ تجارت دے شعبے نال وابستہ ہن تے نبی کریم ﷺ اپݨی حیاتِ طیبہ اچ ھک رہنما، والد تے شوہر دی حیثیت نال ایہوجہیاں بہترین مثالاں قائم کیتیاں جنہاں کوں اڄ وی اپݨی زندگیاں اچ اپنایا ونڄے تاں اللہ تعالیٰ کامیابی ساݙے مقدر اچ لکھسی۔ عطاء اللہ تارڑ آکھیا جو نوجواناں کوں ذمہ واریاں ݙیوݨ دے حوالے نال وی سیرتِ طیبہ اچ بے شمار مثالاں موجود ہن۔ حضرت زید بن ثابتؓ کم عمری اچ وحی دی کتابت دی ذمہ واری انجام ݙتی ڄݙاں جو نبی کریم ﷺ انہاں کوں اہم ذمہ واریاں ݙتیاں۔ ایویں ہی حضرت اسامہ بن زیدؓ کوں کم عمری اچ اہم ذمہ واریاں ݙتیاں ڳئیاں تے انہاں کوں ھک لشکر دی کمان وی ݙتی ڳئی۔ انہاں آکھیا جو سیرتِ طیبہ اچ ایہوجہیاں ٻہوں مثالاں ملدئن جتھاں نوجواناں تے نہ صرف اعتماد دا اظہار کیتا ڳیا انہاں کوں اہم ذمہ واریاں وی ݙتیاں ڳئیاں۔ ایں توں اے پیغام ملدے جو نوجواناں کوں ذمہ واریاں ݙیوݨ نال معاشرے اچ نویں تے تازہ خیالات کوں ودھارا ملدے تے نوجوان انہاں ذمہ واریاں کوں احسن انداز اچ نبھاوݨ دی صلاحیت رکھیندن۔ وفاقی وزیراطلاعات آکھیا جو نبی کریم ﷺ نوجواناں کوں اے پیغام ݙتا جو اعتماد تے ذمہ واری دے ذریعے او معاشرے اچ مثبت کردار ادا کر سڳدن۔ انہاں آکھیا جو نبی کریم ﷺ دا صادق تے امین ہووݨ نوجواناں کیتے ساریں توں اہم سبق اے کیوں جو اللہ تعالیٰ آپ ﷺ دی ذاتِ اقدس اچ صداقت تے امانت دیاں عظیم خوبیاں ودیعت فرمائیاں ہن۔ انہاں آکھیا جو اڄ دے دور اچ سوشل میڈیا تے غلط معلومات (مس انفارمیشن) دے چیلنجز درپیش ہن۔ جے اساں نبی کریم ﷺ دی صداقت تے امانت دیاں انہاں ݙو صفتاں کوں اپݨی زندگیاں اچ اپنا گھنوں تاں ٻہوں سارے مسئلیں دا حل ممکن اے۔ وفاقی وزیر اطلاعات آکھیا جو لوڑھ ایں امر دی اے جو نبی کریم ﷺ دی شخصیت اچ پاتے ونڄݨ آلے اوصافِ حمیدہ تے صحیح معنیں اچ عمل درآمد یقینی بݨایا ونڄے۔ ایں توں نہ صرف نوجوان نسل دی بہتر تربیت ممکن اے انہاں کوں معاشرے اچ مثبت کردار ادا کرݨ دا بہترین موقع وی ݙتا ونڄ سڳدے۔ عطاء اللہ تارڑ قومی رحمت اللعالمین و خاتم النبیین اتھارٹی دے قابلِ قدر کرداردی تعریف کریندے وزارتِ اطلاعات و نشریات تے حکومت دی طرفوں یقین ݙوایا جو ایں سلسلے اچ مزید اقدامات کیتے ہر ممکن تعاون کیتا ویسی۔ انہاں تجویز ݙتی جو ھک کمیٹی بݨائی ونڄے جیندے اچ سوشل میڈیا دے ذمہ دارانہ استعمال تے نبی کریم ﷺ دی ذاتِ اقدس و تعلیمات کوں موثر انداز اچ اجاگر کرݨ دے حوالے نال حکمتِ عملی مرتب کیتی ونڄے۔ انہاں آکھیا جو وزارتِ اطلاعات و نشریات اتھارٹی دے نال رل تے ایں شعبے اچ بھرپور کردار ادا کر سڳدی اے تاں جو سوشل میڈیا دے مثبت استعمال کوں ودھارا ݙتا ونڄ سڳے تے جنریشن زی تے جنریشن الفا کوں وی نبی کریم ﷺ دی ذاتِ اقدس تے آپ ﷺ دی تعلیمات توں روشناس کرایا ونڄ سڳے۔ وفاقی وزیر اطلاعات آکھیا جو نبی کریم ﷺ کوں واقعہ معراج دے ذریعے عظیم سعادت عطا تھئی۔ انہاں آکھیا جو واقعہ معراج نبی کریم ﷺ دے عظیم مقام و مرتبے دا ھک منفرد اعزاز اے تے ایں دے مختلف پہلو نوجوان نسل تئیں موثر انداز اچ پڄائے ونڄ سڳدن۔ انہاں آکھیا جوانہاں سارے پہلوواں کوں ھک آگاہی مہم دے ذریعے جنریشن زی تے جنریشن الفا تئیں پڄایا ونڄ سڳدے تاں جو انہاں کوں اے پیغام ݙتا ونڄ سڳے جو نبی کریم ﷺ دی ذاتِ اقدس تے آپ ﷺ دی تعلیمات اچ ہر طبقے تے ہر عمر دے لوکاں کیتے رہنمائی موجود اے۔ وفاقی وزیراطلاعات آکھیا جوایہو کامیابی دا پیغام اے کیوں جو اللہ تعالیٰ نبی کریم ﷺ کوں خاتم النبیین تے آخری نبی بݨا تے دین کوں مکمل فرمائے۔ انہاں آکھیا جو اے ساݙی خوش قسمتی اے جو اللہ تعالیٰ اساکوں مسلمان پیدا کیتا تے اساں کوں ایں قابل بݨائے جو اڄ اساں اتھاں نبی کریم ﷺ دا ذکرِ مبارک کریندے پیوں۔ وفاقی وزیر اطلاعات عطاء اللہ تارڑ ڈاکٹر علامہ محمد اقبال دے ایں شعر دے نال اپݨے خطاب دا اختتام کیتا ’’کی محمدﷺ سے وفا تو نے تو ہم تیرے ہیں: یہ جہاں چیز ہے کیا، لوح و قلم تیرے ہیں‘‘—