نائب وزیراعظم اسحاق ڈار دی صدارت اچ ملک اچ کݨک دے ذخیریں دا جائزہ گھنݨ کیتے اجلاس

اسلام آباد۔ 03 ستمبر (اے پی پی) نائب وزیراعظم تے وزیرِخارجہ اسحاق ڈار ملک اچ کݨک دے ذخیریں دی صورتحال دا جائزہ گھنݨ کیتے اجلاس دی صدارت کیتی۔ نائب وزیراعظم دے دفتر توں جاری بیان موجب نائب وزیراعظم کݨک دی درآمد متعلق امور دے حل، قیمتاں اچ استحکام تے ذخیرہ اندوزی روکݨ کیتے سارے صوبیں، وزارتِ قومی غذائی تحفظ و تحقیق تے وزارتِ تجارت دی طرفوں تعاون تے سانجھے رابطے کوں چنڳاں آکھیا۔ انہاں پاسکو کوں ہدایت کیتی جو ای سی سی تے سٹیئرنگ کمیٹی دے منظور تھئے کوٹے موجب صوبیں کوں وقتی کݨک ݙتی ونڄے۔ انہاں صوبیں کوں وی ہدایت کیتی جو کݨک دی وقتی ادائیگی کرن تے اپݨا حصہ ویلھے تے چاون۔ اجلاس اچ ھک ملین میٹرک ٹن تئیں کݨک درآمد کرݨ دے فیصلے دا اعادہ کیتا ڳئے جیندے کیتے ٹی سی پی کوں وقتی طور تے عملدرآمد شروع کرݨ دی ہدایت کیتی ڳئی۔ پہلے مرحلے اچ 250,000 میٹرک ٹن کݨک درآمد کیتی ویسی جیندی ترسیل نومبراچ مقرر کیتی ڳئی اے۔ نائب وزیراعظم آکھیا جو سارے متعلقہ ادارے نیڑے رابطے نال کم جاری رکھن تاں جو ملک اچ کݨک دی وافر دستیابی، قیمتاں اچ استحکام تے صارفین کوں ریلیف یقینی بݨایا ونڄ سڳے۔ اجلاس اچ وفاقی وزیرقومی غذائی تحفظ و تحقیق، وفاقی وزیر تجارت، وزیراعظم دے معاونِ خصوصی طارق باجوہ، سیکرٹری تجارت تے قومی غذائی تحفظ و تحقیق، صوبائی حکومتاں دے نمائندیں تے وفاقی و صوبائی حکومتاں دے سینئر افسراں شرکت کیتی۔