لودھراں ملتان روڈ منصوبے تے عملی پیش رفت، 51 کلومیٹر سڑک دی تعمیر تے بحالی تھیسی، کمشنر ملتان

ملتان۔ 04 ستمبر (اے پی پی) لودھراں، ملتان روڈ منصوبے تے عملی پیش رفت دا آغاز تھی ڳئے۔ ایں حوالے نال کمشنر ملتان ڈویژن عامر کریم خان دی صدارت اہم اجلاس تھیا، ڄیندے اچ منصوبے دی تعمیر تے بحالی، یوٹیلیٹیز دی منتقلی، ٹریفک مینجمنٹ تے تعمیراتی سرگرمیاں دی رفتار دا تفصیلی جائزہ گھدا ڳیا۔ کمشنر آکھیا جو طویل عرصے توں خراب لودھراں، ملتان روڈ دی تعمیر تے بحالی شہریاں کیتے وݙی خوشخبری اے، منصوبے دی پیش رفت دی ذاتی طور تے نگرانی کریساں۔ انہاں آکھیا جو ملتان، وہاڑی روڈ منصوبے وانگوں لودھراں، ملتان روڈ منصوبے دی پیش رفت دا وی تسلسل نال جائزہ گھدا ویسی۔ منصوبے دی تکمیل کیتے واضح ڈیڈ لائن مقرر کیتی ونڄے اتے تعمیراتی کم اچ غیر ضروری تاخیر ہرگز برداشت نہ کیتی ویسی۔ کمشنر بجلی دے کھمبیاں، گیس لائناں، آپٹیکل فائبر تے کیمرہ پولز سمیت تمام یوٹیلیٹیز دی منتقلی دا عمل تیز کرݨ دی ہدایت کیتی۔ کمشنر تعمیراتی کم دے دوران ٹریفک دی روانی برقرار رکھݨ، مناسب ڈائیورژن تے عوامی سہولت کوں یقینی بݨاوݨ دے احکامات وی جاری کیتے۔ انہاں تعمیراتی مقاماں تے گرد و غبار دے خاتمے کیتے باقاعدگی نال چھڑکاؤ کرݨ دی ہدایت کیتی۔ اجلاس کوں بریفنگ اچ ݙسایا ڳیا جو لودھراں، ملتان روڈ منصوبہ ݙو پیکیجاں تے مشتمل اے، ڄیندے تحت مجموعی طور تے 51 کلومیٹر سڑک دی تعمیر تے بحالی تھیسی۔ لودھراں توں وستی ملوک تائیں 29 کلومیٹر ڄݙاں جو بستی ملوک توں ملتان تئیں 22 کلومیٹر سڑک دی تعمیر تے بحالی کیتی ویسی۔ پیکیج ون اچ روڈ دی اپ گریڈیشن ڄݙاں جو پیکیج ٹو اچ سڑک دی بحالی، سائیڈ ڈرین تے نیو جرسی بیریئرز دی تعمیر شامل اے۔ بریفنگ دے مطابق پیکیج ون تے کنٹریکٹر موبلائز، کیمپ آفس تے میٹریل ٹیسٹنگ لیبارٹری قائم کر ݙتی ڳئی اے ڄݙاں جو سروے، سکارفیکیشن، سب بیس تے ایگریگیٹ بیس کورس سمیت ٻئے تعمیراتی کم جاری ہن۔ پیکیج ون اچ تعمیراتی حدود اچ آوݨ آلے 52 بجلی دے کھمبیاں اچوں 20 ڄݙاں جو پیکیج ٹو اچ 139 اچوں 71 بجلی دے کھمبے منتقل کیتے ڳئن۔ اجلاس اچ ملتان تے لودھراں دے ضلعی افسراں، واسا، میپکو، این ایچ اے تے موٹر وے دے افسراں شرکت کیتی۔