اسلامیہ یونیورسٹی بہاولپور دے شعبہِ سرائیکی دے محقق اطہرلاشاری پی ایچ ڈی کرڳھدی

اسلام آباد۔7ستمبر(اے پی پی) اسلامیہ یونیورسٹی بہاولپور دے شعبہِ سرائیکی دے محقق اطہرلاشاری شعبہِ سرائیکی اچ اپݨا پی ایچ ڈی دا تحقیقی مقالہ کامیابی نال مکمل کرڳھدے۔اطہر لاشاری اپݨا تحقیقی مقالہ “دبستان بہاول پور دی سرائیکی نثری روایت دا تنقیدی ویورا”  دے عنوان تے تحریر کیتے۔ ایں تحقیق اچ ریاستِ بہاولپور اچ سرائیکی نثر دی تاریخی، ادبی تے تنقیدی روایت دا تفصیلی احاطہ کیتا ڳئے، ایندے وچ ایں خطے دی ادبی خدمات کوں نکھار تے سامݨے گھن آندا ڳئے۔ایں تحقیقی مقالے دی نگرانی شعبہِ سرائیکی دے سابق چیئرمین پروفیسر ڈاکٹر جاوید حسان چانڈیو کیتی اے تے وائیوا کیتے ڈاکٹر شکیل پتافی صاحب دیاں خذمتاں ڳھدیاں ڳئن۔ ایں مقالے دے سیشن 2020ء توں 2025ء دے تحت مکمل تھیوݨ تے یونیورسٹی دے علمی و ادبی حلقیں اطہرلاشاری تے انھاں دے نگرانِ تحقیق کوں مبارخ ݙتی اے تے ایں تحقیق کوں سرائیکی زبان و ادب دی ترقی کیتے ہک اہم پیشرفت قرار ݙتے۔(ڈاکٹرسعدیہ کمال)