پاکستان بیلٹ اینڈ روڈ انیشی ایٹو دا حامی اے، چین پاکستان اقتصادی راہداری معاشی منظرنامے کوں نویں شکل ݙیندی پئی اے، وفاقی وزیرِ تجارت جام کمال خان

اسلام آباد۔ 10 ستمبر (اے پی پی) وفاقی وزیرِ تجارت جام کمال خان آکھیا جو پاکستان بیلٹ اینڈ روڈ انیشی ایٹو دا حامی اے، چین پاکستان اقتصادی راہداری پاکستان دے معاشی منظرنامے کوں نویں شکل ݙیندی پئی اے، سی پیک پاکستان کوں علاقائی روابط دے ہک اہم مرکز دے طور تے ابھاریے، پاکستان وسطی ایشیا تے مغربی چین کوں گرم پاݨیاں تے بندرگاہواں نال منسلک کریندا پئے۔ اے ڳالھیں انہاں خمیس کوں ہانگ کانگ اچ تھیوݨ آلی 11ویں بیلٹ اینڈ روڈ سمٹ نال خصوصی خطاب کریندیں ہوئیں کیتا۔ وفاقی وزیرِ تجارت آکھیا جو بی آر آئی محض اقتصادی منصوبہ نئی ٻلکہ ملکاں تے قوماں کوں نیڑے گھن آوݨ دا موثر پلیٹ فارم اے۔ انہاں آکھیا جو علاقائی تعاون ہݨ تجارتی رستیاں توں اڳوں ودھ تے مربوط ویلیو چینز اچ تبدیل تھیندا پئے، ڈیجیٹل جدت، پائیداری تے ہنرمند روزگار کوں تجارتی ڈھانچے دا حصہ بݨاوݨ ضروری اے۔ جام کمال خان آکھیا جو پاکستان مغربی، وسطی تے مشرقی ایشیا وچال ہک اہم تجارتی پل بݨدا پئے، ریلوے، سڑکاں تے ٹرانزٹ ٹریڈ روابط دی توسیع پاکستان کوں وسطی ایشیا کیتے مختصر تے موثر رستہ بݨیندی پئی اے، علاقائی روابط پاکستان کیتے ݙیڈھ ارب صارفین تے مشتمل وسیع منڈی دے دروازے کھولیندے پئن۔ انہاں آکھیا جو بندرگاہی اصلاحات، ڈیجیٹل کسٹمز تے جدید لاجسٹکس توں تجارتی وقت تے لاگت گھٹ کیتی ویندی پئی اے۔ پاکستان ہک ابھردے ہوئے ٹرانس شپمنٹ مرکز دے طور تے سرمایہ کاراں کوں وسیع علاقائی منڈیاں تائیں رسائی فراہم کر سڳدے۔ انہاں آکھیا جو پاکستان دی معاشی بحالی تے بہتر کریڈٹ ریٹنگ توں سرمایہ کاراں دے اعتماد اچ ودھارا تھیے، توانائی، بنیادی ڈھانچے، معدنیات تے صنعت اچ نویں سرمایہ کاری پاکستان تے ودھدے اعتماد دی عکاس اے۔ وفاقی وزیرِ تجارت آکھیا جو پاکستان دی معاشی حکمتِ عملی برآمدات اچ ودھارے، صنعتی جدیدکاری تے سرمایہ کاری دی سہولت تے مبنی اے۔ ٹیکسٹائل، زرعی مصنوعات، علم تے مبنی صنعتاں تے خذمتاں کوں عالمی ویلیو چینز نال منسلک کیتا ویندا پئے، پاکستان زراعت، اہم معدنیات تے انسانی وسائل دے وسیع امکانات دا حامل ملک اے۔ جام کمال خان آکھیا جو جدید ٻج، موسمیاتی سمارٹ زراعت تے بہتر سپلائی چینز توں غذائی تحفظ تے برآمدات ودھائیاں ونڄ سڳدن، تانبے، کوئلے تے اہم معدنیات دے شعبیاں اچ سرمایہ کاری دے وسیع مواقع موجود ہن۔ وفاقی وزیرِ تجارت سرمایہ کاراں کوں شفاف تے کاروبار دوست نظام دے تحت معدنی وسائل اچ سرمایہ کاری دی دعوت ݙیندے ہوئیں آکھیا جو پاکستانی افرادی قوت دیاں صلاحیتاں دا ثبوت تقریباً 40 ارب ڈالر دی سالانہ ترسیلاتِ زر ہن، بی آر آئی شراکت دار سی پیک فیز ٹو دے تحت پاکستان اچ دستیاب سرمایہ کاری دے مواقع توں فیدہ چاون۔ پاکستان مذہبی، ثقافتی تے قدرتی سیاحت دے بے مثال مواقع رکھیندے۔