پاکستان دی ترقیاتی ترجیحاں دے حصول اچ گیٹس فاؤنڈیشن دی مسلسل معاونت لائقِ تحسین اے، وفاقی وزیرِ خزانہ دی گیٹس فاؤنڈیشن دے وفد نال ملاقات اچ ڳالھ مہاڑ

اسلام آباد۔ 10 ستمبر (اے پی پی) وفاقی وزیرِ خزانہ تے محصولات سینیٹر محمد اورنگزیب پاکستان دی ترقیاتی ترجیحاں دے حصول اچ گیٹس فاؤنڈیشن دی مسلسل معاونت، مالی تعاون، تکنیکی مہارت تے علم دے تبادلے کوں سراہیا ۔ اے ڳالھیں انہاں خمیس کوں اتھاں گیٹس فاؤنڈیشن دے اعلیٰ سطح دے وفد نال ملاقات اچ کیتا ڄیندے دی قیادت صنفی مساوات ڈویژن دی صدر ڈاکٹر انیتا زیدی کریندی پئی ہن۔ وفد اچ عالمی پالیسی تے ایڈووکیسی ڈویژن دی عبوری صدر کلپنا کوچھر وی شامل ہئن۔ وزیرِ خزانہ وفد دا خیرمقدم کریندیں ہوئیں پاکستان دے نال گیٹس فاؤنڈیشن دے مسلسل تعاون تے رابطے دی تعریف کیتی۔ انہاں آکھیا جو علم دے تبادلے، تکنیکی مہارت تے بین الاقوامی تجربات توں استفادہ کریندیں ہوئیں آپسی تعاون کوں ٻیا وسعت ݙیوݨ انتہائی مفید ثابت تھیسی۔ کلپنا کوچھر وزیرِ خزانہ کوں پاکستان اچ فاؤنڈیشن دی ودھدی ہوئی سرگرمیاں بارے اچ بریفنگ ݙتی تے خاص طور تے انسانی وسائل، ٻالاں دی صحت، غذائیت، ماں دی صحت تے تریمتیں دی معاشی شمولیت دے شعبیاں اچ جاری اقدامات دا ݙسیا۔ انہاں جنوبی خیبر پختونخوا اچ جاری پروگرام دا وی ذکر کیتا ڄیندے تحت نقد مالی معاونت، غذائیت نال متعلق مدد، روزگار تے ہنرمندی دی تربیت تے تریمتیں کیتے شہری سہولت مراکزی تئیں رسائی فراہم کیتی ویندی پئی اے۔ توقع اے جو ایں سال ایں پروگرام توں تقریباً ہک لکھ 70 ہزار تریمتیں تے 4 لکھ 50 ہزار ٻال مستفید تھیسن۔ انہاں ملک بھر اچ غذائیت بارے اقدامات دا وی ذکر کیتا ڄنہاں اچ یونیسف دی لائیولی ہوڈ 2.0 سہولت دے ذریعے غذائی اشیاء تئیں رسائی بہتر بݨاوݨ تے ٻالاں اچ سٹنٹنگ دے مسئلے نال نبڑݨ کیتے اقدامات شامل ہن۔ ڈاکٹر انیتا زیدی وزیرِ خزانہ کوں فاؤنڈیشن دے زچہ و بچہ دی صحت نال متعلق اقدامات تے صحت دے بہتر نتائج دے حصول کیتے مصنوعی ذہانت دے استعمال بارے بریفنگ ݙتی۔ انہاں ݙسایا جو لمز اے آئی ہب صوبائی حکومتاں دے نال رَل تے حمل تے زچگی دے دوران تریمتیں تے خانداناں کیتے انہاں دیاں ضرورتاں دے مطابق خصوصی حل تیار کرݨ تے کم کریندا پئے۔ انہاں کمزور یا محدود انٹرنیٹ رابطے آلے علاقیاں تے بنیادی اینڈرائیڈ ڈیوائسز کیتے مصنوعی ذہانت تے مبنی ایہوجھے حل وی اجاگر کیتے ڄہڑے مقامی زباناں اچ کم کرݨ دی صلاحیت رکھیندن تانجو ڈیجیٹل صحت دیاں سہولیات ودھ توں ودھ لوکاں تئیں پڄ سڳن اتے مقامی ضرورتاں نال ہم آہنگ ہوون۔ ملاقات اچ آبادی اچ ودھارے تے ایں دے ماں تے ٻال دی صحت، غذائیت، غربت تے چھوہریاں دی تعلیم تے اثرات دا وی جائزہ گھدا ڳیا۔ وزیرِ خزانہ وفد کوں وزیرِ اعظم دی زیرِ صدارت قائم قومی آبادی کونسل بارے اچ آگاہ کیتا اتے وفاق تے صوبیاں دے درمیان بہتر رابطہ کاری، تریمتیں دی تعلیم و بااختیاری، افرادی قوت اچ تریمتیں دی زیادہ توں زیادہ شرکت تے ٻالاں دی پیدائش اچ مناسب وقفے دی اہمیت تے زور ݙتا۔ انہاں آکھیا جو آبادی نال متعلق مسائل دے حل کیتے علماء کرام تے ٻئے متعلقہ فریقاں کوں وی اعتماد اچ گھنݨ ضروری اے۔ وزیرِ خزانہ ملکی سرمایہ کاراں دے اعتماد دی اہمیت، نجکاری تے اخراجات اچ اصلاحات دے حوالے نال حکومتی اقدامات تے وی روشنی پاتی۔ انہاں سرکاری اداریاں اچ رائٹ سائزنگ تے حکومتی کارکردگی بہتر بݨاوݨ کیتے ڈیجیٹل ٹیکنالوجی دے ودھ توں ودھ استعمال دی ضرورت تے زور ݙتا۔ وزیرِ خزانہ چھوٹے تے درمیانے درجے دے کاروبار، زراعت تے ٻئے کم سہولت یافتہ شعبیاں کیتے حکومت دے مالیات تائیں رسائی دے ایجنڈے تے وی روشنی پاتی۔ انہاں آکھیا جو ایں سلسلے اچ ڈیجیٹل مالیاتی ذرائع، بہتر ڈیٹا ایکسچینج تے کاروباری نقد بہاؤ دی بنیاد تے قرضیاں دی فراہمی تے توجہ ݙتی ویندی پئیے۔محصولات اچ ودھارے دے حوالے نال وزیرِ خزانہ قوانین دے نفاذ، سہولت کاری تے اعتماد کوں بنیادی اہمیت دا حامل قرار ݙیندیں ہوئیں ٹیکس اسیسمنٹ تے آڈٹ دے عمل کوں ٻیا شفاف تے موثر بݨاوݨ کیتے ڈیجیٹائزیشن تے آٹومیشن دی ضرورت تے زور ݙتا۔ گیٹس فاؤنڈیشن دے نمائندیاں پاکستان دے مالیاتی شعبے اچ تھیوݨ آلی پیش رفت دا خیرمقدم کیتا تے خاص طور تے چھوٹے تے درمیانے درجے دے کاروباراں کیتے مالی سہولیات تائیں رسائی ودھاوݨ اچ تعاون اچ دلچسپی ظاہر کیتی۔ انہاں بہتر معلوماتی نظام، ڈیجیٹل فٹ پرنٹس تے کاروبار دے نقد بہاؤ دی بنیاد تے قرضیاں دی فراہمی کوں ایں سلسلے اچ اہم قرار ݙتا۔ انہاں آکھیا جو ڈیجیٹل تے ڈیٹا تے مبنی حل چھوٹے کاروباراں تے ریٹیلرز کیتے مالی وسائل تئیں رسائی دے رستیاں کوں بہتر بݨاوݨ دے نال نال سہولت کاری، شفافیت تے اعتماد کوں فروغ ݙیوݨ اچ اہم کردار ادا کر سڳدن۔ ملاقات اچ زراعت، ڈیجیٹل معیشت تے نجی شعبے دی قیادت اچ سرمایہ کاری دے مواقع دا وی جائزہ گھدا ڳیا۔ سینیٹر محمد اورنگزیب نجی ایکویٹی اچ ودھدی ہوئی دلچسپی دا ذکر کریندیں ہوئیں پاکستان اچ نجی ایکویٹی دے نظام کوں مضبوط بݨاوݨ تے پیداواری سرمایہ کاری کیتے ملکی تے غیر ملکی طویل مدتی سرمایہ کاری کوں متحرک کرݨ دے حوالے نال حکومت دیاں کوششاں بارے وفد کوں ݙسیا۔ وزیرِ خزانہ پاکستان دی ترقیاتی ترجیحاں دے حصول اچ گیٹس فاؤنڈیشن دی مسلسل معاونت، مالی تعاون، تکنیکی مہارت تے علم دے تبادلے کوں سراہیا۔ ڈاکٹر انیتا زیدی پاکستان کیتے فاؤنڈیشن دے عزم دا اعادہ کیتا۔ ایں موقع تے فریقین انسانی وسائل، صحت، مالی شمولیت تے ڈیجیٹل جدت دے شعبیاں اچ تعاون کوں ٻیا مستحکم کرݨ تے اتفاق کیتا۔ وفد اچ انکلوسیو فنانشل سروسز دے سینئر پروگرام آفیسر سید علی محمود، صنفی مساوات دے شعبے اچ لیڈرشپ انگیجمنٹ امپلی منٹیشن دی پروگرام آفیسر عائشہ سلمان، ڈویلپمنٹ پالیسی اینڈ فنانس دے سینئر پروگرام آفیسر عمار خان، گلوبل پالیسی اینڈ ایڈووکیسی دے ڈپٹی ڈائریکٹر تے جنوبی و جنوب مشرقی ایشیا دے سربراہ جمال خان، کارانداز پاکستان دے چیف ایگزیکٹو آفیسر وقاص الحسن، گروپ ہیڈ تیمور علی تے چیف ڈیجیٹل آفیسر شرجیل مرتضیٰ شامل ہئن۔ وزارتِ خزانہ دے سینئر حکام وی اجلاس اچ شرکت کیتی۔