نجی شعبے کوں زیادہ مواقع ملݨ تے معیشت اچ نجی شعبے دے موثر کردار کوں یقینی بݨاوݨ کیتے حکومت مختلف شعبیاں اچ اصلاحات کریندی پئی اے، وزیرِ خزانہ دا لندن اچ پاکستان انویسٹمنٹ راؤنڈ ٹیبل نال خطاب

اسلام آباد۔ 17 ستمبر (اے پی پی) وفاقی وزیرِ خزانہ تے محصولات سینیٹر محمد اورنگزیب آکھیا جو نجی شعبے کوں زیادہ مواقع ملݨ تے معیشت اچ نجی شعبے دے موثر کردار کوں یقینی بݨاوݨ کیتے حکومت مختلف شعبیاں اچ اصلاحات کریندی پئی اے، اصلاحات، مالی معاملات اچ شفافیت تے کاروبار اچ آسانی دے اقدامات نال ملک دی معیشت ٻئی مستحکم تھیسی۔ انہاں اے ڳالھ پاکستان ہائی کمیشن لندن ولوں پاکستان انویسٹمنٹ راؤنڈ ٹیبل نال خطاب کریندیں ہوئیں آکھی ڄیندے اچ لندن دے معروف سرمایہ کاراں تے عالمی مالیاتی اداریاں دے نمائندیاں شرکت کیتی۔ وفاقی وزیرِ خزانہ و محصولات سینیٹر محمد اورنگزیب تقریب اچ بطور مہمانِ خصوصی شرکت کیتی۔ گورنر سٹیٹ بینک آف پاکستان جمیل احمد، وزیرِ خزانہ دے مشیر خرم شہزاد تے برطانیہ اچ پاکستان دے ہائی کمشنر ٹیپو عثمان وی ایں موقع تے موجود ہن۔ وزیرِ خزانہ سینیٹر محمد اورنگزیب آکھیا جو حکومتِ پاکستان ملک دی معیشت کوں مستحکم کرݨ تے پائیدار معاشی ترقی کیتے بھرپور کوششاں کریندی پئی اے۔ انہاں آکھیا جو حکومت مختلف شعبیاں اچ اصلاحات کریندی پئی اے تانجو نجی شعبے کوں زیادہ مواقع ملن تے او معیشت اچ مؤثر کردار ادا کر سڳے۔ وزیرِ خزانہ آکھیا جو حکومت دی مالی پالیسی دے مثبت نتائج آندے پئن۔ بجٹ خسارے اچ ڳھٹکی تھئی اے، حکومتی آمدݨ اچ اضافہ تھیے اتے مالی تے ادارہ جاتی اصلاحات اچ پیش رفت تھئی اے۔