پاکستان تے سری لنکا وچال ترائے میچاں دی ٹی 20 انٹرنیشنل سیریز جمعہ توں راولپنڈی اچ شروع تھیسی

راولپنڈی۔8 اکتوبر (اے پی پی) پاکستان تے سری لنکا وچال ترائے میچاں دی ٹی 20 انٹرنیشنل سیریز جمعہ توں راولپنڈی اچ شروع تھیسی، سیریز دا پہلا میچ 9 اکتوبر کوں راولپنڈی کرکٹ سٹیڈیم اچ کھیڈیا ویسے۔ ٻیا ٹی 20 میچ 11 اکتوبر جڈانجو تریجھا تے آخری میچ 13 اکتوبر کوں تھیسی، ترائے میچ رات 8 وجے شروع تھیسن۔ پی سی بی دے مطابق سیریز دے ترائے میچ پی سی بی لائیو تے براہِ راست نشر کیتے ویسن۔ شائقین پی سی بی لائیو ایپ تے ویب سائٹ دے ذریعے میچ براہِ راست ݙیکھ سڳسن جݙانجو اینڈرائیڈ، آئی او ایس تے ویب صارفین وی لائیو سٹریمنگ توں مستفید تھی سڳسن۔ پی سی بی دے او ٹی ٹی پلیٹ فارم تے براہِ راست میچاں دے علاوہ ہائی لائٹس، انٹرویوز، تجزیے تے خصوصی کرکٹ مواد وی دستیاب ہوسی۔ پی سی بی لائیو تے پاکستان کرکٹ دے لائیو ایکشن دے نال ڈومیسٹک تے آرکائیو مواد وی شائقین کوں فراہم کیتا ویندا پئے۔ پی سی بی دے مطابق پاکستان تے آسٹریلیا وچال 3 میچاں تے مشتمل ون ڈے سیریز وی پی سی بی لائیو تے براہِ راست نشر کیتی ڳئی ہئی جیندے بعد پاکستان کرکٹ دے آندے میچ وی ایں پلیٹ فارم تے براہِ راست ݙٹھے ونڄ سڳسن۔ پاکستان کرکٹ بورڈ آپݨے او ٹی ٹی پلیٹ فارم تے لائیو کرکٹ دے حآلے نال ٹی وی کمرشل وی جاری کر ݙتے۔