اسلام آباد ۔ 10 جنوری (اے پی پی) معروف چینی اخبار آکھیے جو سی پیک منصوبیاں نال پاکستان اچ 12 لکھ توں ودھ لوکاں کوں روزگارملسی جڈاں جو حال اچ ہی چینی سرمایہ کاری اچ ودھارے نال پاکستان اچ روزگار دے مواقع بئے ودھسن۔ ”گلوبل ٹائمز“دی رپورٹ دے مطابق جیکر پاکستان دی حکومت مینوفیکچررز کیتے کاروباری ماحول دی ساز گاری کیتے اینجھاں کوششاں جاری رکھیاں تاں پاکستان اچ بالواسطہ طورتے 12 لکھ توں ودھ لوکاں کوں روزگارملسی۔ رپورٹ دے مطابق سی پیک ثابت کرڈتے جو اجوکی چینی سرمایہ کاری اچ ودھارے نال پاکستان اچ لوکاں کوں روزگار دے ودھ موقع ملین۔ اخبار تجویز ڈیندے آکھیا جو ہنڑ جڈاں سی پیک دے پہلے مرحلہ اچ انفراسٹرکچر منصوبیاں تے توجہ اے تاں ڈوجھے مرحلے اچ اقتصادی استحکام اتے خصوصی اقتصادی زونز دے قیام دے زریعے روزگار دے مواقع تے توجہ ڈیونڑی چاہیدی اے، سی پیک کوں ہنڑ لوکاں کوں روزگار ڈیونڑ تے ودھ توجہ دی لوڑھ اے۔ سی پیک فریم ورک دے تحت ٹرانسپورٹیشن انفراسٹرکچر دی تعمیر نال مقامی لوکاں کوں روزگار دے مواقع ملین جیہڑے غربت دے خاتمے دیاں کوششاں اچ اہم پیشرفت اے بھل انفراسٹرکچر کم نال لوکاں کوں محدود مدت کیتے روزگار مل ویندے جڈاں جو 20کروڑ دی آبادی تے مشتمل ملک پاکستان کوں طویل المدتی روزگار دے مواقع دی لوڑھ اے۔ اخبارآہدے جو پاکستانی مینوفیکچرنگ سیکٹر اتے انہاں دی صنعت کاری کوں ودھاونڑ کیتے سی پیک دے خصوصی اقتصادی زونز تے کم شروع کرنڑ دی لوڑھ اے جیندے نال پاکستانی عوام روزگار دے طویل المدتی مواقع ملسن۔
